ވިލާ ކޮލެޖުގެ 2023 ވަނަ އަހަރަށް ހުޅުވާލާ ސްކޮލަރޝިޕް ތަކުގައި ބައިވެރިވުމުގެ ފުރުސަތު ހުޅުވާލައިފި

ވިލާ ކޮލެޖުގެ ސްކޮލަޝިޕްސްކީމަށް ކުރިމަތިލުމުގެ ފުރުސަތު ވަނީ ހުޅުވާލައިފި އެވެ. ސްކޮލަރޝިޕް ސްކީމްތަކަށް ކުރިމަތިލުމުގެ ފުރުސަތު ހުޅުވާލެވުނީ އެކަމަށްޓަކައި، ވިލާކޮލެޖުގައި އިއްޔަ ބޭއްވުނު ނޫސްވެރިންގެ ބައްދަލުވުމެއްގައެވެ.

މި ނޫސް ވެރިންގެ ބައްދަލުވުމުގައި ވަނީ  ތިން ދާއިރާއަކުން ސްކޮލަޝިޕްތަކަށް ހުޅުވާލާފައެވެ. މީގެ ތެރެގައި ހިމެނެނީ ވިލާ ކޮލެޖު އޯޕަން ސްކޮލަޝިޕާއި ،ވިލާ ކޮލެޖު/ ވިލާ އިންޓަނޭޝަނަލް ހައި ސްކޫލު ސްކޮލަޝިޕާއި ވިލާ ކޮލެޖު އެލަމްނައި ސްކޮލަޝިޕް އެވެ. އަދި ކުރިއަށްއޮތް ތަނުގައި ވިލާ ކޮލެޖުގެ އަތޮޅުތެރޭގެ ކެމްޕަސްތަކުން، ރަށު ކައުންސިލް ތަކާއި ގުޅިގެން، ކެމްޕަސްތަކުގައި ކިޔެވުމަށް ޚާއްސަކޮށްގެން ކޮމިއުނިޓީ އެންގޭޖްމަންޓް ސްކޮލަރޝިޕްތަކަށް ކުރިމަތިލުމަށް ހުޅުވާލުމަށް ވަނީ ހަމަޖެހިފައެވެ.

advertisement

ވިލާ ކޮލެޖު އޯޕަން ސްކޮލަޝިޕް

މި ކެޓަގަރީން ހުޅުވާލާފައިވަނީ ޖުމްލަ ތިން ސްކޮލަޝިޕެވެ. އެއީ ފައުންޑޭޝަނާއި ޑިގްރީ އަދި މާސްޓާސްގެ ކޮންމެ ޕްރޮގްރާމަކުން ވެސް އެއް ފުރުސަތެވެ. ވިލާ ކޮލެޖުގައި ހިންގާ ޕްރޮގްރާމްތަކުގެ ތެރެއިން އެ ދާއިރާތަކުގެ ކޯސްތަކަށް ޝަރުތު ހަމަވާ ކޮންމެ ދިވެއްސަކަށް ވެސް ކުރިމަތިލެވޭއިރު، ކޯހަށް ދަރިވަރުން ހޮވުމުގައި އެންމެ ބޮޑަށް އިސްކަން ދޭނީ ތަޢުލީމީ ނަތީޖާއަށްކަމަށް ވިލާ ކޮލެޖުން ފާހަގަ ކުރެއްވިއެވެ.

ވިލާ ކޮލެޖު/ ވިލާ އިންޓަނޭޝަނަލް ހައި ސްކޫލު ސްކޮލަޝިޕް

މިއީ ވިލާ އިންޓަނޭޝަނަލް ހައި ސްކޫލުން އޭ ލެވެލް ހަދާ ދަރިވަރުންގެ ތެރެއިން ވިލާ ކޮލެޖުގައި ޑިގްރީ ހަދަން ދޭ ފުރުސަތަކެވެ. މި ސްކޮލަޝިޕް ދޭން ނިންމާފައިވަނީ ދެ ދަރިވަރުންނަށެވެ. ވިލާކޮލެޖުން އިން ބުނި ގޮތުގައި މި ދާއިރާއިން ސްކޮލަޝީޕަށް ކުރިމަތިލެވޭނީ ވިލާ ހައި ސްކޫލުން އޭ ލެވެލް ނިންމިތާ ގިނަވެގެން ދެ އަހަރު ނުވާ ދަރިވަރުންނަށެވެ.

ވިލާ ކޮލެޖު އެލަމްނައި ސްކޮލަޝިޕް

ވިލާ ކޮލެޖުން ކިޔެވުން ނިންމި ދަރިވަރުންނަށް އަމާޒުކޮށްގެން ހުޅުވާލާފައިވާ މި ދާއިރާގައި މާސްޓާސް ފެންވަރަށް ކިޔެވުމަށް އެއް ފުރުސަތާއި ޑިގްރީއަށް ކިޔެވުމަށް އެއް ފުރުސަތު ދެ އެވެ. މި ކެޓަގަރީގެ ސްކޮލަޝިޕަށް ލެވޭނީ އެ ކޮލެޖުން ކުރިން ކިޔަވާފައިވާ ދަރިވަރުންނަށެވެ.

ވިލާ ކޮލެޖުގެ ވައިސް ރެކްޓާ ޑރ. އަލީ ނަޖީބު ވިދާޅުވީ މިއަދު މި އިޢުލާން ކުރެވުނު ސްކޮލަޝިޕް ޕްރޮގްރާމުން 7 ދަރިވަރުންނަށް ފުރުސަތު ދޭނެ ކަމަށެވެ. ނަމަވެސް ކޮމިއުނިޓީ އެންގޭޖްމަންޓް ސްކޮލަޝިޕަކީ ކެމްޕަސްތަކުގައި ތިބި ދަރިވަރުންގެ އަދަދަށް ބެލުމަށް ފަހު ދޭ ސްކޮލަޝިޕަކަށް ވުމުން، އެ ސްކޮލަރޝިޕްތައް އިޢުލާން ކުރެވޭ އިރު މި އަދަދަށް ބަދަލު އަންނާނެ ކަމަށް ވިދާޅުވި އެވެ.

ވިލާ ކޮލެޖު މި ސްކޮލަޝިޕްތައް ހާއްސަކޮށްފައިވަނީ  އަންނަ އަހަރުގެ ޖެނުއަރީ އިންޓޭކުގައި ކިޔަވާ ދަރިވަރުންނަށެވެ. ސްކޮލަރޝިޕް އަށް ހުށައަޅާ ދަރިވަރުން، ސްކޮލަރޝިޕަށް ކުރިމަތިލާ އިރު، އެ ކުރިމަތިލާ ކޯހަކުން ކިޔެވުމަށް ޕްލޭސްމަންޓް ލިބިފައިވާކަމުގައި ވާން ޖެހޭނެއެވެ. ސްކޮލަރޝިޕް އާއި ބެހޭ މަޢުލޫމާތު ވިލާކޮޖެގު މާލޭގައި ހުންނަ ކިއު.އައި ކެމްޕަސް، ވިލާ ކޮލެޖުގެ ސޯޝިއަލް މީޑިއާ އަދި ވިލާ ކޮލޮޖުގެ ވެބްސައިޓުން ލިބެންހުނާނެއެވެ.

މި ސްކޮލަރޝިޕްތަކަށް ކުރިމަތިލުމުގެ މުއްދަތު ހަމަވާ ތާރީޚަކީ 16 ޖެނުއަރީ 2023 އެވެ. 2016 ވަނައަހަރު ވިލާ ކޮލެޖުން ތަޢާރްފް ކުރެވުނު މި ސްކޮރލަޝިޕް ސްކީމްގެ ދަށުން މިހާހިސާބަށް 34 ދަރިވަރުންނަށް ހިލޭ ކިޔެވުމުގެ ފުރުސަތު ވަނީ ފަހިކޮށްދެވިފައެވެ.