ތާރީހުގެ ތެރެއިން: ޕްރިންސް ހަސަން އިއްޒުއްދީނުގެ “ޕާޓީ ލައިފްގެ” ވާހަކަ

ޝަމްސުއްދީން ރަދުންގެ ދަރި، ޕްރިންސް ހަސަން އިއްޒުއްދީން ހެންވޭރު ގަނޑުވަރަށް ބަދަލުވީ އުމުރުން 20 އަހަރުގައެވެ. ގަނޑުވަރަށް ދިރިއުޅުން ބަދަލުކޮށް މާގިނަ ދުވަހެއް ނުވެ އުމުރުން 12 އަހަރުގެ އަތިރީގޭ އާމިނާ ދީދީ އާއި ކައިވެނިކުރިއެވެ. އޭނާ އަށް އާގޭ ދީދީއޭވެސް ކިޔައި އުޅެއެވެ. ކައިވެނީގެ ކުރިން އެކަކު އަނެކަކަށް ނުފެނި، އާއިލާގެ ރޭވުމަކުން ކުރި މި މިކައިވެނި ޕާޓީއަށް 300 އަންހެނުންނަށް ދައުވަތުދިނެވެ.

advertisement

މިއީ ޝާހީ ރަސްކަމާއި، ސަރުކާރު ހިންގަމުން އައި ބޮޑުވަޒީރުގެ ޢާއިލާއާ އިތުރަށް ގުޅުވާލުމުގެ ގޮތުން ކުރި ކައިވެންޏެއް ވެސްމެއެވެ. މި ކައިވެންޏަށް މާ ގިނަ ދުވަސް ނުވެ ޕްރިންސް އާއި އާގޭ ދީދީ އާއި މެދު މައްސަލަޖެހި ޕްރިންސް އެހެން ކައިވެންޏެއް ކުރިއެވެ.

ޕާޓީ ލައިފް ފެށުން

ފުރަތަމަ ކައިވެންޏަށް ފަހު ޕްރިންސް ހަސަން އިސްކޮށްހުރެ ގަނޑުވަރުތެރޭގައި ގަދައަށް ޕާޓީ ބާއްވަމުން އައި ކަމަށް ވެއެވެ. ސްރީލަންކާއިން މިއުޒިކް ކިޔަވައިގެން ހުރި ޕްރިންސް ހަސަންގެ އަޑުވެސް ނުހަނު ރީއްޗެވެ. ގިޓާ ވެސް ކުޅުނެވެ. އަދި އެހެން މިއުޒިކު އާލާތްތައް ވެސް ކުޅެއުޅުނެވެ. ލަވަވެސް ކިޔައި އުޅުނެވެ.

ރޭގަނޑުގެ މިމަޖަލުގައި އޭނާ އަނބިމީހާ ބައިވެރިނުކުރެއެވެ. އަނބިމީހާ ހުންނަނީ ކޮޓަރިއެއްގައި ބަންދުކޮށްފައެވެ. އާދީދީގެ ބައްޕަ އަށް މި ޕާޓީތަކާއި އެގެއަށް މާގިނައިން ފިރިހެނުން ދާކަމުގެ ހަބަރު އިވުމާއި އެކު އާދީދީގެ އުމުރުން 15 އަހަރުގައި މި ކައިވެނި ރޫޅިއްޖެއެވެ.

އޭގެ ފަހުން ވެސް ޕްރިންސް ގިނަ ކައިވެނިތަކެއް ކުރިއެވެ. ގިނަ ފަހަރަށް ދެއަނބިން ތިބި ނަމަވެސް ދިރިއުޅެމުން އައީ އަނބިންނާއި ވަކިން، އެހެނަސް ގަނޑުވަރުތެރޭގައެވެ. ރޭގަނޑު އަނބިން ތިބެންޖެހެނީ ހާދިމުންނާއެކު އުނދޯލި ހެއްލަން އުނދޯލިގޭގައެވެ. ޕާޓީކުރާ ތަނަށް ދިޔުމުގެ ހުއްދައެއް އެމީހުންނަކަށް ނޯވެއެވެ.

ވެރިކަން ގެއްލުން

މީރުބަހުރު މުޙައްމަދު އިސްމާޢީލް ދީދީގެ ލިޔުމެއްގައި ވެއެވެ. “ޢައްޔާޝީ މަޖަލާއި ޖިންސީ އުފަލުގެ ތެރެއަށް ވެދެވަޑައިގެންނެވިލެއް ބޮޑުކަމުންކަންވެސް ނޭނގެއޭ، ދުވަސްކޮޅެއްވިއިރު، ނާރުފުޅުތަކުގެ ބާރުދެރަވެ، ޢަޞްބީ އާލާސްކަންފުޅެއް ހުށަހޮޅިއްޖެއެވެ.”

ޢަޞްބީ އާލާސްކަންފުޅެކޭ ބުނެފައިއެވަނީ ކިހުނު ބައްޔަށެވެ. އެއީ ޖިންސީ ގުޅުމުން އަރާ ބައްޔެކެވެ. އެބަލި ޖެހުމާއި އަދި އޭނާގެ އުޅުން ހުރި ގޮތުން އޭނާ އަކީ ރަސްކަމަށް ކުފޫ ހަމަވާ މީހެއް ނޫންކަމަށް ދައުލަތުގެ އިސް ވެރިން ނިންމިއެވެ. 1932 ވަނަ އަހަރުގައި އެކުލަވާލި ރާއްޖޭގެ ފުރަތަމަ ޤާނޫނު އަސާސީގައި ދިވެހި ރަސްކަން، ދޮންބަންޑާރައިންގެ ދަރިފަސްކޮޅުގެ ރަސްކަލަކަށް ކާފަ ވިދާޅުވާ ބޭފުޅަކަށް ވާރުތަވާނެ ކަމަށް ލިޔުނެވެ.

އެ ހިސާބުން ޕްރިންސް ޙަސަން ޢިއްޒުއްދީނަށް ޚާއްޞަވެފައި އޮތް ވެރިކަމުގެ ތާޖު ގެއްލުނީއެވެ. އޭގެ ފަހުން ދެން ގަނޑުވަރުތެރޭ ކުރި މަޝްވަރާތަކަށް ފަހުވެސް ރަސްކަން ވާރުތަވާނެ ގޮތެއް ޕްރިންސް ހަސަނަށް އަދި އެ އާއިލާއަކަށް ނުހޯދުނެވެ. ސިޔާސީ ކުޅިގަނޑެއް ފެށީ އެކަންތައް ނިމިގެން ދިޔައީ “ޤާނޫނީ ހަމަތަކުގެ މަތިން” ޕްރިންސް ހަސަންގެ ބައްޕަ ޝަމްސުއްދީން ރަސްކަމުން ވަކިކުރުމާއެކުއެވެ.

އެދެމީހުންނާ އެކު 30 މީހަކަށް ހުކުމްކޮށް އަދަބު ކަނޑައެޅުނެވެ. އޭގެތެރޭގައި ހިމެނުނީ ޕްރިންސް ޙަސަން ޢިއްޒުއްދީނުގެ ގާތް އެކުވެރިންނާއި ހެންވޭރުގަނޑުވަރުގެ ނާޗަރަންގީގެ ބައިވެރިންނެވެ. އެ މައްސަލައިގައި ހެންވޭރުގަނޑުވަރު ދައުލަތަށް ނެގީއެވެ.