އެޗްޑީސީގެ ފައިބާ ނެޓްވޯކް: ކައުންސިލްތަކަށް ނަމޫނާއެއް!

ތަރައްގީގެ ދުވެލީގައި އަދި ހާއްސަކޮށް ޒަމާނީ ސިޓީއެއް ތަރައްގީކުރުމުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަނީ އެތައް ކަމެއްގައި ނަމޫނާ ދައްކާފައެވެ. ހުޅުމާލެ އައި ހުޅުމާލޭގެ ދެ ވަނަ ފިޔަވައްސަކީ އޭގެ ރީތި މިސާލެކެވެ. ހާއްސަކޮށް ހުޅުމާލޭގެ ދެ ވަނަ ފިޔަވައި ތަރައްގީކުރުމުގައި އެޗްޑީސީން ވަނީ ޒަމާނީ އެތައް ވަސީލަތްތަކެއް ބޭނުންކޮށްފައެވެ.

ހަމަ އެކަނި ޑިޒައިންކުރުމާއި އިމާރާތްތަކުގައި އެކަންޏެއް ނޫނެވެ. އެހެން ބައެއް ކަންކަމުގައި ވެސް ޒަމާނީ ޓެކްނޮލޮޖީ އާއި ނިޒާމުތައް އަންނަނީ ބޭނުންކުރަމުންނެވެ. އޭގެ ތެރެއިން ފާހަގަކޮށްލެވޭ އެއް ކަމަކީ އެ ކުންފުނިން ގާއިމުކުރި އޯޕަން އެކްސެސް ނެޓްވޯކެވެ.

advertisement

ތަފާތު އެކި ހިދުމަތްތައް ފޯރުކޮށްދިނުމަށް ނަރުތައް ވަޅުލުމަށް މަގުތައް ކޮނުމަކީ މާލޭގެ މަގުތައް ހަލާކުވުމަށް ކުރިމަތިވާ އެންމެ ބޮޑު އެއް ސަބަބެވެ. މިއީ ހަމައެކަނި މާލެ އަށް އޮތް ކަމެއް ނޫނެވެ. ރަށްރަށުގައި ވެސް އިންޓަނެޓާއި ޓީވީ ފަދަ ޒަމާނީ ހިދުމަތްތައް ފޯރުކޮށްދިނުމަށް މަގުތައް ކޮނުމުގެ ސަބަބުން އާންމު ފަރުދުންނަށް ވަރަށް ބޮޑެތި އުނދަގޫތައް ކުރިމަތިވެއެވެ.

އަދި އެ މަސައްކަތް އެކި ފަރާތްތަކުން ކުރާތީ ކޮނުމުގެ މަސައްކަތް މޮނިޓާކުރުމަކީ ކަމާ ބެހޭ އިދާރާތަކަށް ވެސް ފަސޭހަ ކަމެއް ނޫނެވެ. އެހެންކަމުން ނަރު ވަޅުލަން ކޮންނަ ސަރަހައްދު ވަޅުގަނޑަކަށް ބަދަލުވުމަކީ އާންމު ކަމެކެވެ. އަދި މާލޭގައި ނަމަ މަގުގައި އަތުރާފައިވާ ގާތަށް އެކި ކުންފުނިތަކުގެ ބޭނުމަށް ނަގައި އަލުން އަތުރާއިރު މަގުތައް ވަރަށް ބޮޑަށް ހަލާކުވެއެވެ. އަދި ތާރުއަޅާފައިވާ މަގުތަކުގައި ވެސް އަރިމަތީގައި ގާއިމުކޮށްފައިވާ ޑަކްޓްތަކުގެ މަސައްކަތަށް ކޮނެ ހެދުމުން އެތައް އުނދަގޫތަކެއް ކުރިމަތިވެއެވެ.

އެޗްޑީސީން ދެ ވަނަ ފިޔަވަހީގައި ގާއިމުކުރި އޯޕަން އެކްސެސް ނެޓްވޯކަކީ މަގު ކޮނުމަށް ގެނެސްދިން ވަރަށް ބޮޑު ހައްލެކެވެ. އަނެއްކޮޅުން އާންމު ކުންފުނިތަކުން ބޭނުންވާ ހިދުމަތްތައް އާންމު ފަރުދުންނަށް ފޯރުކޮށްދިނުން ވެސް މި ނެޓްވޯކްގެ ސަބަބުން އަވަސްވެގެން ހިނގައްޖެއެވެ. މިހާރު ކޮނެގެން ނަރު ވަޅުލަންދެން އިންޓަނެޓް ނުލިބިފައި ހުންނާކަށް ނުޖެހެއެވެ.

އެޗްޑީސީގެ ނެޓްވޯކް ބޭނުންކޮށްގެން ކޮންމެ ކުންފުންޏަކަށް ވެސް ހިދުމަތް ދިނުމުގެ ފުރުސަތު އޮވެއެވެ. ހުޅުމާލޭ ދެ ވަނަ ފިޔަވަހީގައި ދިރާގާއި އުރީދޫ އާއި ކޭބަލް ޓީވީގެ ހިދުމަތް ފޯރުކޮށްދޭ މީޑިއާނެޓުން ވެސް ބޭނުންކުރަމުން އަންނަނީ އެޗްޑީސީގެ ޒަމާނީ ފައިބާ ނެޓްވޯކެވެ.

އެޗްޑީސީން ބުނެފައިވާ ގޮތުގައި ދެ ވަނަ ފިޔަވަހި ތަރައްގީވަމުން އަންނަ އިރު ޒަމާނީ އެތައް ހިދުމަތެއް ފޯރުކޮށްދިނުމަށް އެ ކުންފުނީގެ އޯޕަން އެކްސެސް ނެޓްވޯކް އެހީއަކަށް ވާނެއެވެ. އެ ގޮތުން ފޯނާއި ޓީވިގެ ހިދުމަތެ އިތުރުން ސްމާޓް ޕާކިން، ރިމޯޓް އެމްޕްލޯއީމެންޓް ވޭސްޓް މެނޭޖްމަންޓާއި އަދި ސެކިއުރިޓީ ހިދުމަތްތައް ފޯރުކޮށްދިނުމުގައި ވެސް މި ނެޓްވޯކް ބޭނުންކުރެވޭނެއެވެ.

މި ނެޓްވޯކް ތަރައްގީކޮށްފައި ވަނީ އިތުރު ނެޓްވޯކްތަކެއް ނާޅައި މި ސިސްޓަމްގެ ތެރެއިން މިފަދަ އެތައް ހިދުމަތެއް ފޯރުކޮށްދެވޭ ގޮތަށެވެ.

އޯޕަން އެކްސެސް ނެޓްވޯކަކީ ޒަމާނީ ސިޓީތަކުގައި މުހިންމު ހިދުމަތަކަށްވާއިރު ރާއްޖޭގެ ކުދި ރަށްތައް ތަރައްގީކުރުމުގައި ވެސް އެޗްޑީސީން ނަމޫނާ ނެގުމަކީ ކުރެވިދާނެ ކަމެކެވެ. އަދި މާލޭގެ މަގުތަކުގައި ތާރު އެޅުމުގެ މަސައްކަތްކުރަމުންދާ އިރު ސިޓީ ކައުންސިލުން ވެސް މިފަދަ ވިސްނުމަކަށް ދިއުމަކީ އެތައް ކަމަކަށް ފަސޭހަ ވެގެންދާނެ ކަމެކެވެ. މިހާރު އޮންނަ ގޮތުން މާލެއެކޭ އެއްގޮތަށް ރަށްރަށުގައި ވެސް މަގުތައް ކޮނުމުގައި އެއްވެސް އުސޫލެއް ނޯވެއެވެ.

ޓީވީގެ ހިދުމަތާއި ފޯނުގެ ހިދުމަތް ފޯރުކޮށްދިނުމަށް ނަރު އެޅުމުގެ މަސައްކަތް އެތައް ކުންފުންޏަކުން ކުރުމުގެ ސަބަބުން މަގުތައް ވަރަށް ބޮޑަށް ހަލާކުވެއެވެ. ނަމަވެސް އެޗްޑީސީން ގާއިމުކުރި ފަދަ ނެޓްވޯކެއް ކައުންސިލުން ނުވަތަ ކައުންސިލުން ކަނޑައަޅާ ބަޔަކު މެނޭޖްކުރާ ނަމަ މި މައްސަލަ އަށް ވަރަށް ބޮޑު ހައްލެއް ލިބިގެންދާނެއެވެ.

ކައުންސިލްތަކަށް ވިޔަފާރިކުރެވޭ ގޮތަށް ގާނޫނު އިސްލާހުކޮށްފައިވާ އިރު އެ ރަށެއްގައި ގާއިމުކުރާ އޯޕަން އެކްސެސް ނުވަތަ ފައިބާ ނެޓްވޯކެއްގެ ސަބަބުން ވެސް އާމްދަނީ މަގު ތަނަވަސްކުރެވިދާނެއެވެ. އެ ގޮތުން އެފަދަ ނެޓްވޯކެއް ގާއިމުކުރުމަށް ފަހު ވިޔަފާރި އުސޫލުން ކުންފުނިތަކަށް އެ ނެޓްވޯކް ބޭނުންކުރެވޭނެ މަގު ތަނަވަސްކުރެވިދާނެއެވެ.

އަދި އެފަދަ ނެޓްވޯކެއް ގާއިމުކުރުމަށް ފަހު ނަރު ވަލުލުން ފަދަ ކަންކަމަށް ހުއްދަ ނުދޭ ގޮތަށް އުސޫލްތައް ކަނޑައަޅައި ކައުންސިލްގެ ބެލުމުގެ ދަށުން އެކަން ކުރެވިއްޖެ ނަމަ އެތައް ގޮތަކުން ފައިދާ ލިބިގެނދާނެއެވެ. އެޗްޑީސީން އެ ވަނީ ހުޅުމާލެ ދެވަނަ ފިޔަވަހީގައި ނަމޫނާ ދައްކާފައެވެ. މިއީ އެހެން ރަށްތަކުގައި ވެސް ކުރެވިދާނެ ނަމޫނާ މަސައްކަތެކެވެ.