ތާރީހުގެ ތެރެއިން: މަދަރުސާ އަށް ގޮސް ކިޔެވުން އަންހެން ކުދީންނަށް މަނާ ކުރުން

1911 ވަނަ އަހަރުގެ ބޯހިމެނުން ދައްކާގޮތުން އޭރުވެސް ރާއްޖޭގެ އަންހެނުންނަށް ހުރީ އޭރުގެ ފެންވަރުން ތައުލީމު ލިބިފައެވެ. އޭރު އައްޑޫގެ 95% އަންހެނުން، އަދި މާލޭގެ 89% އަންހެނުން ލިޔަން ކިޔަން ދަނެއެވެ.

1932 ވަނަ އަހަރު ރާއްޖޭގެ ފުރަތަމަ ގާނޫނު އަސާސީގައި “ކޮންމެ ދިވެހި ރައްޔިތަކުގެ މައްޗަށް ގުރުއާން ކިޔެވުމާއި އަރަބި އަކުރާއި ތާނަ އަކުރު ލިޔާން ކިޔާން ދަސްކުޅައުމީ މި ގާނޫނު އަސާސީ ލާޒިމުކުރާ ކަމެކެވެ”، މިގޮތަށް ލިޔެ އެ ގާނޫނު އަސާސީ ފާސްވުމާއި އެކު ވަޒީރުންގެ މެދުގައި މަޝްވަރާކޮށް ނިންމީ އަންހެން ކުދިން ވެސް މަދަރުސާތަކަށް ގެނެސް ކިޔަވައި ދިނުމަށެވެ. މިގޮތަށް ފާސްވީ ކިރިޔާއެވެ.

advertisement

އަންހެން ކުދިންނަށް ކިޔަވައި ނުދިނުމަށް ބޭނުންވި ވަޒީރުން ގިނަކަމުންނެވެ. ސަނިއްޔާގައި އަންހެން ކުދިންގެ ގޮތްޕެއް ހަދައި ކިޔަވައިދޭން ފަށައިގެން އައިސް 1935 ވަނަ އަހަރުގެ ތެރޭގައި އަންހެން ކުދިންނަށް މަދަރުސާގައި ކިޔަވައި ދިނުން މަނާ ވެއްޖެއެވެ. މިކަން މަނާ ކުރީ ރައްޔިތުންގެ މަޖިލިސް ޖަލްސާއަކުންނެވެ.

އެޖަލްސާއިން ނިންމީ އަންހެނުން މަދަރުސާއަށް ނުކުމެ ކިޔެވުމުގެ ބަދަލުގައި އެކުދީންގެ ގޭގެއަށް ސަރުކާރުން ބަޔަކު ފޮނުވައިގެން ކިޔަވައިދޭށެވެ. އަންހެނުންނާއި ފިރިހެނުން އެއްތަނަކަށް ގޮސް ކިޔެވުން އެއީ ރަނގަޅު ކަމެއްކަމަށް އޭރުގެ މަޖިލީހަށް ނުފެނުނީއެވެ.

އަންހެނުން ގޭގައި ބައިތިއްބައިގެން ކިޔަވައިދީ، އެކަށިގެންވާ އަންހެނުން އުފެދުނީމާ އެމީހުން މަދަރުސާއަށް ފޮނުވައިގެން އެހެން އަންހެނުންނަށް ކިޔަވައިދޭނީ ކަމަށްވެސް އެމަޖިލީހަށް ފެންނަކަމަށް ނިންމާފައިވެއެވެ. އަންހެނުންނަށް ކިޔަވައިދޭން އަލުން ފަށާފައިވަނީ، އޭގެ 9 އަހަރުފަހުން 1944 ވަނަ އަހަރުގައެވެ