ކާށި އަދި އޭގެ އެކި އުފެއްދުންތަކަށް 49 މިލިޔަން ރުފިޔާގެ މާކެޓެއް — މިހާރު ގެންނަނީ ބޭރުގެ ގައުމުތަކުން

ދިވެހި ބިމުގައި މާ ބޮޑު މަސައްކަތަކާއި ނުލައި ހެދި ބޮޑުވާ އެކައްޗަކީ ދިވެހި ރުކެވެ. މީގެ އެތަކެއް ސަތޭކަ އަހަރުކުރިން ވެސް ދިވެހިން އެ އެއްޗެއް ވިއްކައިގެން އާމްދަނީ ހޯދި އަދި ދިރިއުޅުމުގެ ބޮޑު ބައެއް އެއަށް ބަރޯސާވެފައި އޮތް މުދަލަކީ ވެސް ރުކެވެ. މިހާރުވެސް ރުކުން އެކި ފައިދާ ހޯދާ މީހުން ރާއްޖޭގައި ގިނައެވެ. ކާށި، ކުރުނބާ، ގަބުޅި ވިއްކުމާއި ފަން ހޮވައިގެން ފަންވިނުމަކީ އާމްދަނީ ހޯދަން މީހުން ކުރާ ކަންކަމެވެ.

2021 ވަނަ އަހަރު ރާއްޖެއަށް 49 މިލިޔަން ރުފިޔާގެ ކާށި އަދި ކާށީގެ ބާވަތްތައް އެތެރެކޮށްފައިވެއެވެ. މީގެ މާނަ އަކީ ރާއްޖޭގައި މިތަކެތި އުފައްދައި ބާޒާރަށް ނެރޭ ނަމަ މި ފައިސާ އަކީ ދިވެހިންނަށް ލިބެން އޮތް ފައިސާ ކަމެވެ. މިތަކެތި ރާއްޖެއަށް އެންމެ ގިނައިން އެތެރެކުރަނީ މެލޭޝިއާ، ލަންކާ، ތައިލެންޑް، އިންޑިއާ ފަދަ ގައުމުތަކުންނެވެ.

advertisement

މީގެ ތެރޭގައި ހިމެނެނީ ކާށި ހުނި، ކާށި، ކާށި ބޮނބި، ބޮނބި ކުނޑި، ކާށި ތެލުގެ އެކި ބާވަތްތައް، ކާށި ކިރެވެ. އެހެން އުފެއްދުން ތަކަށް ބަލާއިރު، މިދިޔަ އަހަރުގެ ޖަނަވަރީ އިން ޑިސެމްބަރާ ހަމައަށް 10 މިލިޔަން ރުފިޔާގެ ބަރަބޯ، 11 މިލިޔަން ރުފިޔާގެ ފަޅޯ، އަދި 26 މިލިޔަން ރުފިޔާގެ ދޮންކެޔޮ ބޭރުގެ ގައުމުތަކުން ރާއްޖޭގެ ބާޒާރަށް ގެނެސްފައިވެއެވެ.

ރާއްޖޭގައި ހުރި ބިން ބޮޑެތި ފަޅު ރަށްރަށުގައި ހަމަ އެކަނި ރުއް އިންދައިގެން މިފަދަ ބާވަތްތައް އުފެއްދުމަށް ހާއްސަ ފެކްޓަރީ އެއް ގާއިމުވެއްޖެ ނަމަ މި މަސައްކަތުން އާމްދަނީ ހޯދުމުގެ ފުރުސަތު ގިނަ އާއިލާތަކަކަށް ލިބިގެންދާނެއެވެ. އިމްޕޯޓު އެއްކޮށް ހުއްޓާލެވޭ މިންވަރަށް ނުއުފެއްދުނަސް، މި މާކެޓަށް ގިނަ އަދަދަކަށް ކާށީގެ އުފެއްދުންތައް ނެރެވޭނެއެވެ.

މިހާރުވެސް ރާއްޖޭގައި ރޯނު ވެށުމާއި ކާށި ތެޔޮ ހެދުމަކީ ގިނަ ބަޔަކު ކުރާ އެހެން ނަމަވެސް ފުޅާ ދާއިރާއެއްގައި އެކަން ކުރުމުގެ ތަނަވަސްކަން ނެތުމުގެ ސަބަބުން އުފެއްދުންތައް ވަކި މިންވަރެއްގައި ހިފެހެއްޓިފައި ހުރި މަސައްކަތްތަކެކެވެ.

Asiyath Najeeba, 56 years old, recipient of the prestigious Rehendhi Award & National Award is a seamstress turned locally-sourced coconut oil maker.

Full story & more photos: https://t.co/l09ifLWFHw#supportlocalbusinesses #golocal pic.twitter.com/M7f7I0poO7— MV+ (@mvplusmedia) September 20, 2021

މިވަގުތު ރާއްޖޭގައި އޮތް އެންމެ ބޮޑު ރުއް ދަނޑު އޮތީ ލ. ގަމުގައެވެ. މި ރުއް ދަނޑުގައި ހުރި ގިނަ ރުއްތައް ހުރީ މުސްކުޅިވެފައެވެ. މިވަގުތު މާރުކޭޓުގައި ކާއްޓެއްގެ އަގު ހުރީ 8ރުފިޔާ އާއި 10ރ އާއި ދޭތެރޭގައެވެ. ކުރުނބާ ހުރީ 22ރ އާއި 25ރ އާއި ދޭތެރޭގެ އަގުތަކެއްގައެވެ. ރާއްޖޭގައި އުފައްދާ ގުވާން ވިއްކައިގެން ބޮޑު ފައިދާއެއް ބިދޭސީން ހޯދާ ކަމުގެ ޝަކުވާ ކުރާ މީހުން ގިނަ ނަމަވެސް ދިވެހިން އިސްވެގެން މިމަސައްކަތަށް ނުކުންނަ މިންވަރު މަދުކަން ފާހަނގަކުރެވެއެވެ.

ހަމަ މިއާއި އެކު ސަރުކާރުން ދަނޑުވެރިކަމަށް ހާއްސަކޮށްގެން އުފެއްދުންތައް ޕްރޮސެސްކުރެވޭނެ މަގު ފަހި ކޮށްދިނުމަށް މިވަގުތު މަސައްކަތެއް ނުކުރެއެވެ. ނަމަވެސް ދަނޑުވެރިކަން ކުރުމަށް ބިން ބޭނުންވާ ފަރާތްތަކަށް ބިން ދޫކުރެއެވެ. އަދި މިހާރު ދަނޑުވެރިކަން ކުރާ ފަރާތްތަކަށް ލޯނު ލިބޭނެ އުސޫލުތަކެއް ވެސް އެސްއެމްއީ ބޭންކް މެދުވެރިކޮށް ހަމަޖެހިފައިވެއެވެ.