ތާރީހުގެތެރެއިން: ރާއްޖެތެރޭ ރަށްރަށުގައި ގެސްޓްހައުސް ހިންގުން މަނާކުރުން

ކުރީގެ ރައީސް މައުމޫނު އަބްދުލްގައްޔޫމް ވެރިކަމާ ހަވާލުވިއިރުވެސް ރާއްޖެތެރޭގެ ބައެއް ރަށްރަށުގައި ގެސްޓްހައުސް ހުރިކަމަށް ތާރީހީ ފޮތްތަކުގައި ލިޔެފައިވެއެވެ. އެތަންތަން ބަންދުކުރުމަށް އަމުރުކުރެއްވީ 1984 ވަނަ އަހަރު މައުމޫނުގެ ސަރުކާރުންނެވެ.

ސަބަބެއްކަމުގައި ބުނެފައިވަނީ ރާއްޖެތެރޭގައި އިޖުތިމާއީ މައްސަލަތައް ބޮޑުވުމުގެ ބިރެވެ. އޭރުވެސް، އެޒަމާނާ އަޅާބަލާއިރު މާލޭގައި ގިނަ އަދަދަކަށް ގެސްޓްހައުސްތައް ހުރެއެވެ.

advertisement

ރާއްޖޭގެ ހުރިހާ ރަށެއްގައި ގެސްޓް ހައުސް ހިންގުމުގެ ހުއްދަ ދޫކުރުމަށް ސަރުކާރަށް ގޮވާލައި ރައްޔިތުންގެ މަޖިލީހުން ގަރާރެއް ފާސްކުރިއެވެ. އެއީ 2008 ވަނަ އަހަރުގެ އޮގަސްޓް 19ވަނަ ދުވަހުއެވެ.

އެގަރާރު ހުށައެޅީ ރައްޔިތުންގެ މަޖިލީހުގެ މާލޭ މެމްބަރު މުހައްމަދު ޝިހާބު އެވެ. އެގަރާރުގައި ވަނީ؛

“ދުނިޔޭގެ މާރުކޭޓުގަ އާއި ރާއްޖޭގައި ވެސް ތެލާއި ކާބޯ ތަކެތީގެ އަގު އުފުލި ރައްޔިތުން އެކަމުގެ ދަތިތަކާ ކުރިމަތިލާން ޖެހިފައިވާ ހިނދު، ގިނަ ދިވެހީން ދިރިއުޅެނީ ރަށްތަކުގައި ކަމަށްވެފައި އެ ރަށްތަކުގައި އިގްތިސާދީ މާ ގިނަ ކަންތަކެއް ހަމަޖެހިފައި ނެތުމުންނާއި ޓޫރިޒަމްގެ ފައިދާއިން ގިނަ ދިވެހީން މަހްރޫމްވެފައިވާ ކަމަށް ރައްޔިތުންގެ މަޖިލީހަށް ގަބޫލުކުރެވޭ ހިނދު …….. …………….ސަރުކާރުން މިހާތަނަށް ގެންގުޅުއްވަމުން ގެންނެވި އަތޮޅުތަކުގެ ރަށްތަކުގައި ގެސްޓް ހައުސް ހިންގުން މަނާކުރާ ސިޔާސަތު ނިމުމަކަށް ގެންނަވައި ރާއްޖޭގައި މީހުން އުޅޭ ހުރިހާ ރަށެއްގައި ވެސް ކަނޑައެޅޭ އެއް އުސޫލެއްގެ މަތިން ގެސްޓް ހައުސް ހިންގުމުގެ ހުއްދަ ދޫކުރައްވާ ގޮތަށް ހަމަޖެއްސެވުމަށް ސަރުކާރުގައި ދެންނެވުމަށް ރައްޔިތުންގެ މަޖިލީހުން ގަރާރުވަމެވެ” މިފަދައިންނެވެ.

މާލެ ހުޅުމާލެ ނޫން އެހެން ރަށްރަށުގައި ގެސްޓްހައުސްތައް ހިންގުމުގެ ހުއްދަ ލިބުނީ 1 ޖަނަވަރީ 2008 ގައި އަމަލުކުރަން ފެށި “ދިވެހިރާއްޖޭގައި ގެސްޓްހައުސް ހިންގުމާ ބެހޭ ގަވާއިދު” ގެ ދަށުންނެވެ.