ރާއްޖޭގެ ފުރަތަމަ ކައުންސެލިންގ މާސްޓަރސްގެ ކިޔެވުން ފަށައިފި

ވިލާ ކޮލެޖުގެ “މާސްޓަރ އޮފް ސައިންސް އިން ކައުންސެލިންގ” ޕްރޮގްރާމުގެ ފުރަތަމަ ބެޗުގެ ކިޔެވުން، އެ ކޮލެޖުގެ ކިއު.އައި ކެމްޕަސްގައި ފަށައިފި އެވެ.

މިއީ ރާއްޖޭގައި ކައުންސެލިންގ އާ ގުޅޭ މާސްޓަރސް ޑިގްރީ ޕްރޮގްރާމެއް ފެއްޓި ފުރަތަމަ ފަހަރެވެ.

advertisement

ދެ އަހަރު ދުވަހުގެ މުއްދަތަށް ހިންގާ މި ޕްރޮގްރާމުގެ މައިގަނޑު މަޤްސަދަކީ މުޖުތަމަޢުގައި ކައުންސެލިންގގެ ޚިދުމަތް ބޭނުންވެފައިވާ ފަރާތްތަކަށް އެ ޚިދުމަތް ފޯރުކޮށްދޭނެ ޤާބިލު މީހުން ބިނާކުރުމެވެ.

އެގޮތުން މި ޕްރޮގްރާމް ކާމިޔާބުކަމާއެކު ފުރިހަމަކުރާ ދަރިވަރުންނަށް ޕްރިވިޝަނަލް ކައުންސިލަރ ލައިސެންސް އާއި އެކު،މުޖްތަމައު ގައި ހުރި އެކިއެކި ކަންކަމަށް ކައުންސެލިންގ އަދި ވަކި އުސޫލެއްގެ ދަށުން ފޯރުކޮށްދޭނެ، ޕްރޮފެޝަނަލް ކައުންސެލަރުން ކަމުގައި ވެގެންދާނެ ކަމަށް ވިލާ ކޮލެޖުން މައުލޫމާތު ދެއްވި އެވެ.

އަދި އެލައިޑް ހެލްތް ކައުންސިލް ގެ ޤަވައިދުގެ ދަށުން 500 ގަޑި ހަމަކުރުމުން ލައިސަންސް ކައުންސިލަރުންނަށް ވެގެންދާނެއެވެ.

ރާއްޖޭގެ މާހައުލާ ގުޅޭގޮތަށް ފަރުމާކޮށްފައިވާ މި ޕްރޮގްރާމް ގައި ކިޔަވައިދޭ ބައެއް މާއްދާތަކުގެ ތެރޭގައި، ‘ތިއަރީސް އޮފް ކައުންސެލިންގ އެންޑް ސައިކޮތެރަޕީ’، ‘ހިއުމަން ޑިވެލޮޕްމަންޓް އެންޑް ލައިފް ސްޕޭން’، ‘ކައުންސެލިންގ ޓެކްނިކްސް ‘، ‘އެތިކްސް އިން ކައުންސެލިންގ’، ، ‘ސައިކޮޕެތަލޮޖީ އެންޑް ޑިފަރެންޝަލް ޑައިގްނޯސިސް’، ‘ޗައިލްޑް އެންޑް އެޑޮލެސެންޓް ސައިކޮޕެތަލޮޖީ’ އަދި  ‘ޖެރިއެޓިކް ކައުންސެލިންގ’ ހިމެނެ އެވެ.

އަދި މީގެއިތުރުން މިޕްރޮގުރާމްގެ ބައެއް މާއްދާތައް ސިމިއުލޭޝަން ބޭސްޑް ލާނިންނާއެކު ކުރިއަށް ގެންދެވޭނެއެވެ. 

މި ޕްރޮގްރާމް ލޯންޗްކޮށްދެއްވީ މިދިޔަ ޑިސެންބަރު މަހުގެ ތެރޭގައި ވިލާ ކޮލެޖުގައި ބޭއްވި ރަސްމިއްޔާތުގައި،  މިނިސްޓަރ އޮފް ޖެންޑަރ، ފެމިލީ، އެންޑް ސޯޝަލް ސަރވިސަސް ޢާއިޝަތު މުޙައްމަދު ދީދީ އެވެ.

މި ޕްރޮގްރާމް ލޯންޗްކުރެއްވުމަށްފަހު އެކަމަނާ ދެއްކެވި ވާހަކަފުޅުގައި، މުޖްތަމަޢުގައި ނަފްސާނީ ސިއްހަތުގެ މައްސަލަތައް އިތުރުވެ، ކައުންސެލިންގގެ ދާއިރާއިން ތަމްރީން ލިބިފައިވާ މީހުން ބިނާކުރުމަށް ބޭނުންވެފައިވާ ދަނޑިވަޅެއްގައި ވިލާ ކޮލެޖުން މި ޕްރޮގްރާމް ތަޢާރަފް ކުރެއްވިކަމަށްޓަކައި ވިލާ ކޮލެޖަށް އެކަމަނާ މަރުހަބާ ދެންނެވި އެވެ.

މި ޕްރޮގްރާމްގައި ކިޔަވައި ދެއްވުމަށް ހަމަޖެހިފައިވަނީ، ރާއްޖޭގެ އިތުރުން ސްރީ ލަންކާ އަދި މެލޭޝިޔާގެ ކަމުގެ ފަންނީ އަދި ތަޖުރިބާ ލިބިލައްވާފައިވާ ޕްރޮފެސަރުން، ޕީ.އެޗް.ޑީ އަދި މާސްޓަރސް ޑިގްރީ ފެންވަރުގެ ލެކްޗަރަރއިންނެވެ. މި ޕްރޮގްރާމާ ބެހޭ އިތުރު މައުލޫމާތު ވިލާ ކޮލެޖުގެ ވެބްސައިޓުން ލިބޭނެކަމަށް އެ ކޮލެޖުން ވިދާޅުވި އެވެ.