ތާރީހުގެ ތެރެއިން: ފުވައްމުލަކު ރައްޔިތުންގެ ބާރު ފެނި ހަތިޔާރާއި އެކު އައި ސިފައިންނަށް ރަށަށް އަރަން ޖެހުން

މިއީ ރައީސް މައުމޫނުގެ ވެރިކަމުގައި ގާތްގަނޑަކަށް، 1995 ވަނަ އަހަރު ހިސާބުގައި ފުވައްމުލަކުގައި ހިނގާދިޔަ ރައްޔިތުންގެ މުޒާހަރާއެއްގެ ވާހަކައެވެ. މި ހާދިސާގެ މައުލޫމާތު މި ނޫހަށް ހިއްސާކޮށް ދިނީ އެރަށު އިބްރާހިމް މުސްތަފާ، (ޖޯ) އެވެ.

އޭނާ ހަނދާންވާގޮތުން އެއީ މީގެ ގާތްގަނޑަކަށް 28 އަހަރު ކުރިއެވެ. ރަށުގެ ކަރަންޓު އަގުބޮޑު ވުމުގެ ސަބަބުން އެކަމާއި ނުރުހުން ފާޅުކުރުމަށް އެންމެން ބޯޅަ ދަނޑަށް ނިކުތުމަށް ގޮވާލައި އޭނާ އާއި އަދި އެހެން މީހަކު ވެގެން ރަށުތެރެއަށް ކަރުދާސް އެޅީ ސިއްރުން ނަމަވެސް އޭނާ ވެސް ވީ ސިފައިން ރަށަށް އަރާ ޖަލަށް ގެންދިޔަ މީހުންގެ ތެރޭގައެވެ. އެ ކަރުދާސްތައް ރަށުގެ އެކި ހިސާބުތަކަށް އެޅުމުން އެދުވަހު ރަށުގެ ގިނަ ބަޔަކު އެއްވުމަށް ފަހު ނިންމީ އަތޮޅު އޮފީހަށް ދިޔުމަށެވެ. އަތޮޅުއޮފީހަށް ދިޔުމުން އަތޮޅުވެރިޔާ އެންގީ ކަރަންޓުގެ ކަމެއްވީމާ އިންޖީނުގެ އަށް ދިޔުމަށެވެ. އެހިސާބުން ރައްޔިތުން އިންޖީނުގެއަށް ގޮސް އެތަނުގެ ވެރިންނާ ވާހަކަދައްކައިގެން ކަރަންޓުގެ އަގަށް ބަދަލުގެނައުމަށް ޑިމާންޑް ކުރިއެވެ. ނަމަވެސް ކުރިއެރުމެއް ނުލިބުމުން، އެއްވި މީހުން އެތަނުގެ މުވައްޒަފުން އޮފީހުން ބޭރަށް ނެރެ އިންޖީނުތައް ނިއްވާލިއެވެ. އެތަނުގައި ހުރި ސަރުކާރު ދިދަ ވެސް އެމީހުން ތިރިކުރިކަމަށް ވެއެވެ. މިކަމާއި ގުޅިގެން މައުމޫނުގެ 20 ވަރަކަށް ސިފައިން ބަޑި ހިފައިގެން މަސް ބޯޓެއްގައި އެރަށަށް އައެވެ. އޭރު ފުވައްމުލަކުގައި ބަނދަރެއް ނެތުމުގެ ސަބަބުން އެރަށަށް އެމީހުންނަށް ފަސޭހައިން ނޭރުނެވެ. ރަށަށް އެރުމަށް އެހީއަށް އެދުމުން ރައްޔިތުންވަނީ އެމީހުންނަށް ރަށަށް އެރިޔަ ނުދިނުމަށް މަސައްކަތްކޮށްފައެވެ.

advertisement

ޑިންގީއެއްގައި ސިފައިން ރަށަށް އެރުމަށްފަހު ރައްޔިތުންގާތު އެހިކަމަށް ވަނީ ބޭނުމީ ކަރަންޓުތޯ ނުވަތަ ކަރަންޓުގެ އަގު ހެޔޮކުރުމަށްތޯ އެވެ. ޖަވާބުގައި ދެކަންވެސް ބޭނުން ކަމަށް ރައްޔިތުން ބުނި ނަމަވެސް ސިފައިން ވަނީ ހަތިޔާރާއި އެކު ވަދެ ކަރަންޓު އިންޖީނުތައް އަލުން ހުޅުވައި ކަރަންޓު ދޫކޮށްފައެވެ. ރަށުތެރޭގެ ހަމަނުޖެހުން މައިތިރިކުރުމަށް ފަހު ސިފައިން ފައިބައިގެން ދިޔައީ ދުވަސްކޮޅަކު ރަށުގައި ތިބުމަށްފަހުގައެވެ. ޖޯ މައުލޫމާތު ދެމުން ބުނެފައިވަނީ އެމައްސަލައިގައި އޭނާ ހަނދާންވާގޮތުން 16 ވަރަކަށް މީހުން، އޭގެތެރޭގައި ކަމާ ނުބެހޭ މީހުންވެސް ހިމެނޭ ހެން ޖަލަށްލީ ކަމަށެވެ. އޭނާވެސް ޖަލުގައި 8 މަސް ހޭދަކުރިއެވެ. ހަފްތާއެއްވަންދެން ޖަލު ގޮޅީގެ ބޭރުގައި ގޮނޑިއެއްގައި އޭނާ ބެހެއްޓިކަމަށް ވެސް ޖޯ ބުނެފައިވެއެވެ. އެގޮޑީގައި ހުންނަ މުއްދަތުގައި ނިދަން ވެސް ޖެހެނީ ގޮޑީގައިކަމަށާއި، އަބަދުވެސް ސިފައިންގެ މީހަކު ކުރިމަތީ ޑީއުޓީއަށް ހުންނަ ކަމަށް އޭނާ ބުންޏެވެ. ގޮޑިން ތެދުވެވެނީ ހަމައެކަނި ފާހާނާއަށް ދިޔުމަށެވެ. ޖަލުން ދޫކުރުމަށްފަހު ޝަރީއަތްކޮށް ޢައިރުގާނޫނީ އަމަލު ހިންގި ކަމަށް ނިންމައި 2 އަހަރާއި 6 މަހަށް އޭނާ ފ އަތޮޅުގެ ރަށަކަށް އަރުވާލިއެވެ. އެހެން މީހުންވެސް އެކި ރަށްރަށަށް އަރުވާލިއެވެ.

މިއީ ޑިމޮކްރަސީ އައުމުގެ ކުރިން ފުވައްމުލަކުގައި ހިނގާފައިވާ ހާދިސާއެކެވެ. ރައްޔިތުންނާއި ގުޅުންހުރި މައްސަލަތަކުގައި ރައްޔިތުން ނުކުމެ އަޑު އުފުލައި ހަޅުތާލުކުރުމަކީ މިހާރުގެ ގާނޫނު އަސާސީ އިން ލިބިދޭ އަސާސީ ހައްގެކެވެ. ނަމަވެސް މިހައްގުގެ ބޭނުންކުރުމުން އަދިވެސް ރައްޔިތުންނަށް އެކިވަރުގެ އަދަބުދޭފަހަރު އާދެއެވެ. ހަޅުތާލުކުރުން ހަނިކުރުމަށް ގާނޫނުތަކަށް ބަދަލުވެސް ގެނެސްފައިވެއެވެ.