ރިޕޯޓް: ސިވިލް ސާވިސް މަންމަ އާއި ޕްރައިވެޓް ސެކްޓާ މަންމަ އެއް ނުތިބޭނެ. މައިން ވާނީ މައިންނަށް

ވަޒީފާއާއި ބެހޭ ގާނޫނު 2008 ވަނަ އަހަރު އަލަށް ފާސްވެގެން އައި އިރު އަންހެން މުވައްޒަފުން ވިހެއުމުން ލިބުން ހައްގުވާކަމަށް ވަނީ 60 ދުވަހުގެ ޗުއްޓީއެކެވެ. އޭގެ ފަހުން ގާނޫނަށް އިސްލާހު ގެނެސް ވިހައިގެން ލިބޭ ޗުއްޓީ ވަނީ 6 މަހަށް ބަދަލުކޮށްފައެވެ. މިއީ އަންހެން މަސައްކަތްތެރިންނަށް، އަދި ޅަކުދިންނަށާއި ޖުމުލަކޮށް އާއިލާތަކަށް ލިބުނު ބޮޑު ކުރިއެރުމެކެވެ. ސަރުކާރުން ތައްޔާރުކޮށްފައިވާ ޖެންޑާ އީކުއާލިޓީ އެކްޝަން ޕްލޭންގައި ވަރަށް ފުޅާ ދާއިރާއެއްގައި، އަންހެނުން މަސައްކަތު މާހައުލަށް ނިކުތުމަށް ހުރި ހުރަސްތައް ނައްތާލުމަށް އެކި ކަންކަން ސްޓްރެޓެޖައިޒް ކޮށްފައިވެއެވެ. މިގޮތުން 1 އަހަރުނުފުރޭ ތުއްތު ކުދިންގެ މައިންނަށް ފްލެކްސިބިލިޓީ ދިނުމަށް ހިމަނާފައިވުމާއި، ޑޭކެއާ ސެންޓަރު ގާއިމުކުރުމުގެ ވާހަކަ މި އެކްޝަން ޕްލޭންގައި ފާހަނގަކޮށްފައިވެއެވެ. ނަމަވެސް މި އިނާޔަތްތައް ރާވާފައި ހުރީ ހަމައެކަނި ސަރުކާރުގެ އޮފީސްތަކުގައި މަސައްކަތްކުރާ މަންމައިންނަށެވެ.

ދުނިޔޭގެ ކުރިއަރަމުން އަންނަ އަދި ކުރިއަރާފައިވާ ގިނަ ގައުމުތަކުގައި ވެސް މައިންނަށް އަދި ބައްޕައިންނަށް ޖުމުލަ އެކު 2 އަހަރާއި ހަމައަށް ޗުއްޓީ ލިބޭނެ އުސޫލުތަކެއް އޮވެއެވެ. މިސާލަކަށް، މަންމަ އަށް މުސާރައާއި އެކު 6 މަހުގެ ޗުއްޓީ ދިނުމަށްފަހު، މުސާރަ ނުލިބޭ ގޮތަށް 6 މަހުގެ ޗުއްޓީ އަދި އޭގެ ފަހުން ބައްޕަ އަށް މުސާރަ އާއި ނުލައި ނުވަތަ މުސާރަ ލިބޭގޮތަށް ވަކި މިންވަރަކަށް ޗުއްޓީ ލިބޭނެ އުސޫލު ހަމަޖެހިފައި އޮންނަ ގައުމުތައް ގިނައެވެ. ބައެއް ގައުމުތަކުގައި މި ޗުއްޓީ ކުއްޖާ ވިހާ ދުވަހުން ފެށިގެން ކުއްޖާ އަށް 6 އަހަރު ފުރުމާއި ދެމެދު ނެގުމުގެ ފުރުސަތު މަންމަ އާއި ބައްޕަ އަށް ވެސް ލިބެއެވެ.

advertisement

ބޭނުމަކީ މަންމައާއި ބައްޕަ އަށް ތުއްތު ކުއްޖާ ކައިރީގައި ވީހާވެސް ގިނަ ވަގުތު ހޭދަކުރުމުގެ މަގު ފަހިކުރުމެވެ. މިއީ ކުދިންގެ ހެދި ބޮޑުވުމަށް ބޭނުންތެރި ކަމެކެވެ. އެކި ގައުމުތަކުގައި މިކަން މިގޮތަށް ކުރަނީ ކުރިމަގަށް ކުރާ އިންވެސްޓްމަންޓެއްގެ ގޮތުގައެވެ. ސަބަބަކީ މައިންބަފައިން ގާތުގައި ނެތި ކުދިންގެ ފުރަތަމަ އަހަރުތައް ހޭދަކުރާ ކުދިންގެ ހެދިބޮޑުވުމާއި ނަފްސާނީ ދުޅަހެޔޮކަމަށް ބަދަލު އަންނާތީއެވެ. ދުޅަހެޔޮ ކުދިން ޒުވާނުންނަށްވެ މަސައްކަތު މާހައުލަށް ނިކުތުމަކީ އުފެއްދުންތެރިކަމަށް ކުރިއެރުން ލިބޭނެ ކަމެއް ކަމަށް އެގައުމުތަކުން ގަބޫލުކުރެއެވެ.

ދިގު މެޓާނިޓީ ލީވްގެ ފައިދާ

•    ވިހެއުމަށް ފަހު މައިމީހާގެ ހަށިގަނޑަށް އަންނަ ބަދަލުތައް އާއްމު ހާލަތަށް ރުޖޫއަވެ ހަމަޖެހުމަށާއި އަރާމުކުރުމަށް ބޭނުންވާ ވަގުތު ލިބުން

•    މެޓާނިޓީ ލީވް ދޭން ފެށުމަށްފަހު (1977ގެ ފަހުން) ނޯވޭގައި ދަރިން ވިހޭ އަންހެނުން މެދު އުމުރަށް އެޅި އިރު ސިއްހަތު އޭގެ ކުރިން ވިހޭ މައިންގެ ސިއްހަތަށްވުރެ މާ ރަނގަޅު ކަމަށް ދިރާސާ އިން ދައްކާ.

•    މެޓާނިޓީ ލީވް ކުރުވާ ވަރަކަށް މައިންގެ ކިބައިން ފެންނަ ޑިޕްރެޝަންގެ އަލާމާތްތައް ބޮޑުވާ ކަން ދިރާސާވެރިން ފާހަނގަކުރޭ.

•    ޕޭރެންޓަލް ކޮލިޓީ އަށް ރަނގަޅު އަސަރުކޮށް މުޅި އާއިލާގެ ނަފްސާނީ ދުޅަހެޔޮކަން ރަނގަޅުވާ ކަމަށް ދިރާސާތަކުން ފެނޭ.

•    މައިމީހާގެ ޕެލްވިކް ފްލޯގެ ދުޅަހެޔޮކަމަށާއި، ދެމައިން އަދި އާއިލާގެ ނަފްސާނީ ދުޅަހެޔޮކަމާއޮ، ގާތުން ކިރު ދިނުމާއި ގުޅުން ހުރި ކަންކަމަށް ހައްލު ހޯދުމަށާއި، ޖިންސީ ސިއްހަތު ރަނގަޅު ކުރުމަކީ ސިއްހީ ކަމެއްގެ ގޮތުގައި ދެކި ވިހާ އަންހެނުންނަށް 8 މަހާއި 12 މަހާއި ދެމެދުގެ ޗުއްޓީއެއް ލިބުން މުހިންމު ކަމަށް އެމެރިކަން ކޮލެޖް އޮފް އޮބްސްޓެޓްރިސިއަން އެންޑް ގައިނެކޮލޮޖިސްޓް އިން ގަބޫލުކުރޭ.

ރާއްޖޭގެ ހާލަތަށް ބަލާއިރުވެސް މިއީ ވަރަށް މުހިންމު ކަމެއް ކަމަށް ފެނެއެވެ. ކުދިން ވިހެއުމަށް ފަހު އެކުދިން އެންމެ ތުއްތު އިރު ކައިރީގައި ތިބެން ހުރިހާ މަންމައިން އަދި ބައްޕައިން ބޭނުންވާނެއެވެ. ހަމަ މިއާއި އެކު އާއިލާއަށްޓަކައި އާމްދަނީ ހޯދުމަކީވެސް ކޮންމެ މައެއް އަދި ބަފައެއްގެ ޒިންމާއެކެވެ. މިދެކަންތައް ބެލެންސް ކުރެވޭނީ ދެމަފިރިން ބަހާލައިގެން ޗުއްޓީ ހޯދައިގެން ކުދިން ގާތު މަޑުކުރުމެވެ. ނަމަވެސް މި ހައްގު މިހާރު ލިބެނީ ހަމަ އެކަނި ސަރުކާރުގެ މުވައްޒަފުންނަށެވެ. މި ޗުއްޓީ އަކީ މައިންނަށް އަދި ކުދިންނަށް ނުހަނު މުހިންމު ޗުއްޓީ އެއް ނަމަވެސް މި ޗުއްޓީ އަކީ ވަކި މަންމައިންނަށް އެކަނި ލިބޭ ޗުއްޓީ އެއްގެ ގޮތުގައި އޮތުމުގެ ނަތީޖާއަކަށް ވާނީ ކުދިން ހެދި ބޮޑުވަމުން އަންނަ އިރު ކުދިންގެ މެދުގައި ތަފާތު އުފެދޭނެ ކަމަކަށެވެ. ސިޔާސަތު ކަނޑައެޅުމުގައި މިފަދަ ތަފާތުކުރުންތަކަށް ޖާގަ ދިނުމަކީ ކަންބޮޑުވާ ވަރުގެ ނަތީޖާ ނިކުމެދާނެ ކަމެކެވެ. މިސާލަކަށް 6 މަހުގެ ޗުއްޓީ (ބަންދު ދުވަސްތައް ހިމަނައިގެން 7 މަސް) ތުއްތު ކުއްޖާ ގާތު ހުރުމުގެ ފުރުސަތު ލިބޭ މައިމީހާ އާއި ޕޯސްޓްޕާޓަމް ޑިޕްރެޝަން ތަހައްމަލުކުރަމުން ވަޒީފާއަށް ނިކުންނަން މަޖުބޫރުވާ މަންމަ އާއި ދެމެދު ނަފްސާނީ ދުޅަހެޔޮކަމާއި ޖިސްމާނީ ދުޅަހެޔޮކަމުގައި ވެސް ތަފާތު ހުންނާނެއެވެ. މިއީ ކުއްޖާ އަށް އަޅާލުމާއި ލޯބި ދިނުމުގައި ވެސް މަންމައިންގެ މެދުގައި ފަރަގު ހުރެދާނެ ކަމެކެވެ. މިއީ ޗުއްޓި ސިޔާސަތުގެ ސަބަބުން ކުރިމަތިވާނެ ސީރިއަސް އެއް މައްސަލައެވެ. މި ނޫނަސް އެކި އިޖުތިމާއީ އަދި ނަފްސާނީ ކަންކަން މުޅި އާއިލާއަށް ކުރިމަތިވުމާއި ޗުއްޓީ ޕޮލިސީ އާއި ގުޅުން ހުރުން ގާތެވެ.

މިފަދަ އަސާސީ ކަންކަމާއި ގުޅުން ހުރި ސިޔާސަތުތައް ހަމަ އެކަނި ސަރުކާރުގެ މުވައްޒަފުންނަށް ހާއްސަކޮށް ހެދުމަކީ މުޖުތަމައުގެ ތެރޭގައި މިހާރުވެސް އޮތް ފަރަގު ބޮޑުވެ ފުޅާވެ އޭގެ ނޭދެވޭ އަސަރު އަހަރުތަކެއް ފަހުން ފެންނާނެކަމެކެވެ. ކުއްޖާ ސްކޫލަށް ދާ ހިސާބުން ފެށިގެން މަސައްކަތު މާހައުލަށް ނިކުންނަ ހިސާބުން މިފަރަގުތަކުގެ އަސަރު ފެންނާނެއެވެ. ސިވިލް ސާވަންޓު މައި މީހާ އާއި ޕްރައިވެޓް ސެކްޓާ މައި މީހާ ވެސް ވިހެއުމަށް ފަހު ތަހައްމަލުކުރާނީ އެއްކަހަލަ މައްސަލަތަކާއެވެ. ޕޯސްޓްޕާޓަމް ޑިޕްރެޝަން ފަދަ ކަންކަމަކީ މައިމީހާ ވަޒީފާ އަދާކުރާތަނަށް ބަލައި ތަފާތުކުރާނެ ބައްޔެއް ނޫނެވެ. ސިޔާސަތުތަކުން ވެސް މިތަފާތުތައް ނައްތާލަން ނުޖެހޭތޯއެވެ؟