ކުޑަގިރިއަށް މިހާރު ދަތުރުތައް ބުކްކޮށްލެވޭނެ

އަންނަ ހޮނިހިރު ދުވަހު ހުޅުވާ ކުޑަގިރި ޕިކްނިކް އައިލެންޑަށް ބުކިން ހެދުމުގެ ފުރުސަތު މިހާރުވަނީ ހުޅުވިފައެވެ.

އެޗްޑީސީއިން ބުނީ ކުޑަގިރި މޯބައިލް އެޕްލިކޭޝަނާއި ވެބްސައިޓް މެދުވެރިކޮށް ބުކިން ހެދޭނެ ކަމަށެވެ.

advertisement

އެޗްޑީސީގެ ހެޑް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވިދާޅުވީ ފުރަތަމަ ދުވަހު ކުޑަގިރިއަށް ދިއުމަށް 300 މީހުންނަށް ބުކިން ހެއްދޭނެކަމަށެވެ. އަދި އެހެން ދުވަސްތަކުގައި 500-600 މީހުންނަށް ބުކިން ހެދޭނެއެވެ.

އޭގެއިތުރުން ބަންދު ދުވަސްތަކުގައި ދިވެހިން ކުޑަގިރިއަށް އެރުމާއި ފެރީ ހިލޭއެވެ. ބަންދު ނޫން ދުވަސްތަކުގައު ކުޑަގިރިއަށް އެރުމަށް 50ރ. އަދި 50ރ. ދައްކަންޖެހޭނެކަމަށް އެޗްޑީސީއިން މައުލޫމާތު ދެއެވެ. އަދި ދެ އަހަރުން ދަށުގެ ކުދިންނާއި 65 އަހަރުން މަތީގެ މީހުންނަށް އެއްވެސް އަގެއް ނުނަގާކަމަށާއި ބަންދު ނޫން ދުވަސްތަކުގައި 2-11 އަހަރުގެ ކުދިންނަށް 25ރ. ގެ ފީއެއް ނަގާނެއެވެ.

ބިދޭސީންނާއި ޓޫރިސްޓުންނަށް ކޮންމެ ދުވަހަކު ވެސް ކުޑަގިރިއަށް ދެވޭނީ ފީ ދައްކައިގެނެވެ. އަދި ވޯކް ޕާމިޓް އޮންނަ ބިދޭސީންނަށް ކުޑަގިރިއަށް އެރުމަށް 75ރ. އަދި ފެރީއަށް 100ރ ކަނޑައޅާފައިވާއިރު ، ޓޫރިސްޓުން ކުޑަގިރިއަށް އެރުމަށް 100ރ. އަދި ފެރީއަށް 150ރ ދައްކަން ޖެހޭނެއެވެ. އެ ކުންފުނިން ބުނީ ކުޑަގިރީގައި 13 ހަޓު ހުންނައިރު، އެ ތަންތަން ވެސް އެޕާއި ވެބްސައިޓް މެދުވެރިކޮށް ބުކް ކުރެވޭނެ ކަމަށެވެ. ކުޑަ ހަޓެއް މުޅި ދުވަހަށް ބުކް ކުރެވޭނީ 500ރ. އަށެވެ. އަދި ބޮޑު ހަޓެއް 1،200ރ. އަށެވެ. ހަޓުން ކަރަންޓު ލިބޭނެ އެވެ. އަދި ކައްކަން ބޭނުންވާ ގޭހާއި އުނދުން ވެސް ލިބޭނެއެވެ.