ރާއްޖޭގައި ސިނާއީ މަސައްކަތްތަކަށް ހުރި ދަތިތަކަށް ހައްލެއް ހޯދައިދިނުމަށް ތިލަފުށި ފޭސް 2 އިން ބޭރުގެ ވިޔަފާރިތަކަށް ދޫކުރެވޭނީ ފޮރިން ޑިރެކްޓް އިންވެސްޓްމަންޓް ޕޮލިސީ (އެފްޑީއައި) ގެ ދަށުން ހުއްދަ ދީފައި އޮތް، އަދި ރާއްޖޭގައި ރަޖިސްޓްރީކޮށްފައިވާ ކުންފުންޏެއް ނަމަ ކަމަށް އެޗްޑީސީން ބުނެފިއެވެ. 

މީގެ ތެރޭގައި ޕްރޮޖެކްޓް ބޭސިސްގައި ކޮންސްޓްރަކްޝަން މަޝްރޫއުތައް ހިންގުމަށް ހުއްދަ ދެވިފައިވާ ކުންފުނިތަކަށް ބީލަމަށް ބައިވެރިނުވެވޭނެކަމަށްވެސް އެޗްޑީސީ އިން ބުނެފައިވެއެވެ. 

advertisement

ފިޔަވަހިތަކަކަށް ބަހާލައިގެން ތިލަފުށިން ބީލަމުގެ އުސޫލުން ސިނާއީ ބޭނުމަށް ބިން ގަތުމުގެ ފުރުސަތު ހުޅުވާލާނެ ކަން އެ ކުންފުނިން އިއުލާންކުރީ މިމަހުގެ ހަތް ވަނަ ދުވަހު އެވެ. އެޗްޑީސީން ނެރުނު ބަޔާނެއްގައި ބުނީ ތިލަފުށިން 150 ހެކްޓަރުގެ ބިން ހިއްކުމަށް ނިންމައި، އެ ބިމުގެ ތެރެއިން 4.3 ހެކްޓަރު ބީލަމުގެ އުސޫލުން ދޫކުރާނެ ކަމަށެވެ.

އެ ބިންތައް ދޫކުރުމުގައި ދިވެހި ކުންފުނިތަކަށް ބިން ގަތުމުގެ ފުރުސަތު ހުޅުވާލާފައިވާ ކަމަށާއި ބޭރުގެ ކުންފުނިތަކަށް ބީލަމުގައި ބައިވެރިވެވޭނީ އެފްޑީއައިގެ ހުއްދަ އޮވެގެންނާއި އެ ވިޔަފާރިތަކަކީ ރާއްޖޭގައި ރަޖިސްޓްރީކޮށްފައިވާ ވިޔަފާރިތަކަކަށް ވެގެން ކަމަށް ބުންޏެވެ. އޭގެ ތެރޭގައި ޕްރޮޖެކްޓް ބޭސިސްގައި ކޮންސްޓްރަކްޝަން މަޝްރޫއުތައް ހިންގުމަށް ހުއްދަދެވިފައިވާ ކުންފުނިތަކަށް އެ ބީލަމުގައި ބައިވެރި ނުވެވޭނެ ކަމަށް ވެސް ބަޔާނުގައިވެ އެވެ.

އެ ބީލަން ހުށަހެޅޭނެ އެންމެ ދަށް އަގަކީ އަކަފޫޓަކަށް 1،700ރ. އެވެ.