ރޯދަމަހަށް ހާއްސަކޮށްގެން ހުޅުމާލެ ފޭސް 2ގައި އެސްޓީއޯގެ ފިހާރައެއް ހުޅުވަނީ

އާންމުންގެ ގިނަ ޝަކުވާތަކަށް ހައްލެއް ހޯދައިދިނުމުގެ ގޮތުން އެސްޓީއޯއިންވަނީ ހުޅުމާލޭ ފޭސް-2 ވިނަރެސް ފްލެޓް ތިރީގައި ރޯދަމަހަށް ހާއްސަކޮއްގެން ފިހާރައެއް ހުޅުވުމުގެ މަސައްކަތް ފަށާފައެވެ.  

އެސްޓީއޯއިން ބުނަނީ މި އަހަރުގެ ރޯދަމަސް ކައިރިވަމުން އައުމާއެކު ލިބެމުން އަންނަ އެންމެ ބޮޑު އެއް ޝަކުވާއަކީ ފިޔާ، އަލުވި، އަދި ބިސް ފަދަތަކެތީގެ އަގުތައް އަރައިގެން ގޮސްފާނޭކަމުގެ ޝަކުވާއެވެ. އަދި ހުޅުމާލޭގައި މިވަގުތު އެސްޓީއޯގެ ފިހާރަ މަރާމާތުކުރުމަށް ބަންދު ކޮއްފައި ހުރުމާއެކު، އެސްޓީއޯއިން ޒަރޫރީ ބޭނުމަށް އެތެރެކުރާ ކާބޯތަކެތި ލިބޭނޭ އެސްޓީއޯގެ ފިހާރައެއް ނެތްކަމުގެ ޝަކުވާއެވެ. އެއީ ހުޅުމާލޭ ފަދަ ބޮޑު އާބާދީއެއްގައި އެސްޓީއޯގެ ފިހާރައެއް ނެތުމުން ތަކެތީގެ އަގު ބޮޑުވެގެން ގޮސްދާނޭކަމުގެ ޝަކުވާއެވެ. 

advertisement

ހުޅުމާލޭ ފޭސް-2 ގައި އެސްޓީއޯގެ ފިހާރައެއް ހުޅުވުމުގެ ބޭނުމަކީ އެސްޓީއޯގެ މުދާ ރަނގަޅު ރޭޓެއްގައި ރައްޔިތުންނަށް ފަސޭހަކަމާއެކު ފޯރުކޮއްދިން ކަމުގައި އެސްޓީއޯއިން ބުނެއެވެ. 

ފިހާރަ ހުޅުވުމުގެ މަސައްކަތް މިހާރު ކުރަމުންދާއިރު މާރޗް މަހުގެ ތެރޭގައި ފިހާރަހުޅުވޭނެކަމަށް އަންދާޒާ ކުރެވޭކަމަށް އެސްޓީއޯއިން މައުލޫމާތު ދެއެވެ. އަދި މި ފިހާރައިން އެސްޓީއޯއިން އާންމުކޮށް އެތެރެކުރާ ބާވަތްތަށް ރީޓެއިލް އަދި ހޯލްސޭލްކޮށް ލިބެންހުންނާނެއެވެ.

މީގެ އިތުރުން ރޯދަމަހަށް ހާއްސަކޮއްގެން އެތެރެކުރެވޭ ފިޔާ، އަލުވި، އަދި ބިސްވެސް ލިބޭނެއެވެ. އަގުތައް ހިފެހެއްޓުމުގެގޮތުން ހުސްވިޔަ ނުދީ އާންމުންނައި ހަމައަށް ފޯރުކޮއްދިނުމަށްވަނީ އެސްޓީއޯއިން ތައްޔާރުވެފައިވާކަމަށް ބުނެއެވެ.