ތާރީހުގެތެރެއިން: ކަތީބުންނަށް ސަރުކާރުން މުސާރަދޭން ފެށުމުގެ ކުރިން އުޖޫރަ ދިން ގޮތް

އިހުޒަމާނުގައި ރާވެރިންނާއި މަސްވެރިން އެމީހުންގެ މަސައްކަތުން ބާނާ މަހާއި ރުކުރާ އިން ބައެއް ރަށުގެ ވެރިންނަށް ދޭންޖެހެއެވެ. އެއީ އޭރު ޓެކްސް ނެގުން އޮންނަގޮތެވެ.

މަސް ބެހުމަށް އޭރު އޮންނަ އާއްމު އުސޫލަކީ، އެންމެ ފުރަތަމަ ބޭނުނު މަހުގެ ހަތަރުބައިކުޅަ އެއްބައި އޮޑިއަށް ނަގަނީއެވެ. ދެން އޭގެ ފަހުން ބޭނުނު ކޮންމެ ހިޔަ އަކުން (96 އަކުން) ރަށު ކަތީބަށް 4 މަސް، ކުޑަ ކަތީބަށް 2 މަސް ދެއެވެ. ފަނޑިޔާރު ނުވަތަ ނާއިބަށް ހިޔައަކުން ދެ މަހާއި ފަޅިއެއް ދެއެވެ.

advertisement

އަތޮޅުވެރިކަން ކުރާ ރަށްރަށުގައި ކޮންމެ ދޯންޏަކުން އަތޮޅުގެއަށް އެއް މަސް ދެއެވެ. މިހުރިހާ ބަޔަކަށް މަސް އެޅުމަށް ފަހު މަސްވެރިން ގެއަށް ގެންދަނީ ބާކީ ހުންނަ މަހެވެ. މިގޮތަށް ބަހާއިރު އެދުވަހަކު ދޯނިން މަހަށް ދިޔަ މީހުންނަށް ހަމަހަމައަށް ބަހާލައި، ދޯނީގެ ދެފަރާތު ދޮށިއަޅާ ދެ ކެޔޮޅުންނަށާއި އެން އުކާ އެންކެޔޮޅަށް ދޮޅުބައި ދެއެވެ.

ބައެއް ރަށްރަށު ދޯނިފަހަރުތަކުން ދިޔަ ހިއްކާ މީހާއަށް ވެސް ދޮޅުބައި ދީއުޅުނެވެ. މިގޮތަށް މަސް ބަހަމުން އައިސް ދޯނި ފަހަރުގައި އިންޖީނު ބެހެއްޓުމުން، 1974 ވަނަ އަހަރުން ފެށިގެން މަސް ބެހުމަށް ބޮޑެތި ބަދަލު އައެވެ. އެއީ އިންޖީނުލީ ދޯނިފަހަރުގައި ބާނާ މަހުގެ ނުވަތަ މަހަށް ލިބޭ ފައިސާގެ ދެބައިކުޅަ އެއްބައި ދޯންޏަށް ނެގުމެވެ. މިހާރު ވެސް އޮންނަނީ މި އުސޫލެވެ.

ކުރިން ބަޔާންކުރި ގޮތަށް ކަތީބުންނާއި މުދިމުންނާއި ފަނޑިޔާރުންނަށް މަސް ބަހަމުން އައި އައުން އުވާލައި އެ މީހުންނަށް ސަރުކާރުން މުސާރަ ދޭން ފެށީ 1959 ވަނަ އަހަރުގައެވެ. އަތޮޅުވެރިންނަށާއި އަތޮޅު ގެއަށް ދަނޑި މަސް ދިނުން ވެސް ހުއްޓުނީ ހަމަ އެހަރުގައެވެ. އޭގެ ކުރިން ސަރުކާރުން އެފަރާތްތަކަށް މުސާރަ ދިނުމުގެ ބަދަލުގައި އޮންނަނީ މަސްވެރިން ބާނާ ބަހުން ބައެއް އެމީހުންނަށް އުޖޫރައިގެގޮތުން ދިނުމެވެ. ރާވެރިންގެ އަތުން ރުކުރަލާއި, ދަރުހޮވާ މީހުންގެ ދަރުން ބައެއް ވެސް އޭރުގެ ރަށްރަށުގެ ވެރިންގެ ގޭގެއަށް ދޭންޖެހެއެވެ. އެގޮތަށް ކަންތައް ނުކޮށްފި ނަމަ ރަށުގެ ވެރިން އެބަޔަކު އޮފީހަށް ގެނެސް ދުއްރައިން ތަޅައި އަދަބުދީ އުޅުނެވެ.