ސްޓެލްކޯގެ ހަތަރު މުވައްޒަފަކަށް  މި އަހަރުގެ ޙައްޖާއި ޢުމްރާ ދަތުރު ދީފި

ސްޓެލްކޯއަށް ގިނަ ދުވަހު ޚިދުމަތް ކޮށްފައިވާ ހަތަރު މުވައްޒަފަކަށް ޙައްޖާއި ޢުމްރާ ދަތުރު ދީފިއެވެ.

އެ ކުންފުނީގެ މުވައްޒަފުންގެ ތެރެއިން މި އަހަރު ޙައްޖާއި ޢުމްރާ ދަތުރު ލިބޭ ފަރާތްތައް ގުރުއަތުން ހޮވީ ކުޑަގިރީގައި ބޭއްވި ރަސްމިއްޔާތެއްގައެވެ.

advertisement

ސްޓެލްކޯއިން ބުނީ މި އަހަރު ޙައްޖު ދަތުރަށް ހުށަހެޅި ފަރާތްތަކުގެ ތެރެއިން ޝަރުތު ފުރިހަމަވަނީ ފިރިހެން 96 މުވައްޒަފުންނާއި އަންހެން 22 މުވައްޒަފުން ކަމަށެވެ.

ޢުމްރާއަށް ދާން ހުށަހެޅި މުވައްޒަފުންގެ ތެރެއިން ޝަރުތު ފުރިހަމަ ވެފައިވަނީ ފިރިހެން 262 މުވައްޒަފުންނާއި އަންހެން 56 މުވައްޒަފުން ކަމަށް ސްޓެލްކޯއިން ބުންޏެވެ.

އެ މުވައްޒަފުންގެ މެދުގައި ނެގި ގުރުއަތުން ޙައްޖަށް ދިޔުމަށް ފިރިހެން މުވައްޒަފުންގެ ތެރެއިން ހޮވިފައި ވަނީ ޓްރާންސްމިޝަން، އެންޑް ޑިސްޓްރިބިއުޝަން ޑިޕާޓްމަންޓްގައި މަސައްކަތްކުރާ ޢަބްދުﷲ ޝަރީފެވެ. އަންހެން މުވައްޒަފަކަށް ގުރުއަތުން ހޮވިފައި ވަނީ ފައިނޭންސް ޑިޕާޓްމެންޓުގެ ޚަދީޖާ ތައުފީޤާއެވެ.

ޢުމްރާ ދަތުރަށް ގުރުއަތުން ހޮވުނު ފިރިހެން މުވައްޒަފަކީ އެ ކުންފުނީގެ ސާވިސް ސެންޓަރުގައި މަސައްކަތްކުރާ ޝާހުލް ހަމީދެވެ. އަންހެން މުވައްޒަފަކަށް ހޮވިފައިވަނީ، ޕްރޮކިއުމަންޓް ޑިޕާޓްމަންޓުގެ ފާތިމަތު ރިޒްނާއެވެ.