ކެއާ ސޮސައިޓީގެ ހިދުމަތްތައް ފުޅާކުރަނީ

ކެއަރ ސޮސައިޓީގެ ހިދުމަތްތައް މާލޭގެ އިތުރުން ރާއްޖޭގެ އުތުރާ ދެކުނުގައި ފެށުމުގެ މަސައްކަތް ކުރާ ކަމަށާއި، މިގޮތުން މިއަހަރުތެރޭގައި ހދ ކުޅުދުއްފުށީގައި ކެއާ ސޮސައިޓީގެ ޚިދުމަތްތައް ފެށޭތޯ މަސައްކަތް ކުރާކަމަށް އެ ޖަމިއްޔާއިން ހާމަކޮށްފި އެވެ.

ކެއާ ސޮސައިޓީގެ 24 ވަނަ އަހަރީ ޢާއްމު ޖަލްސާ 9 މާރިޗް 2023 ގައި ވަނީ ބޭއްވިފައެވެ. މި ޖަލްސާގައި މި ޖަމިއްޔާގެ ފާއިތުވި އަހަރުގެ އަހަރީ ރިޕޯޓް، އޮޑިޓް ރިޕޯޓް އަދި ޖަމިއްޔާގެ ހިންގާ ކޮމިޓީގެ ހުސްވެފައިވާ މަޤާމްތަކަށް މެމްބަރުން ހޮވުން އޮތެވެ.

advertisement

އަދި މީގެ އިތުރުން މި ޖަމިއްޔާގެ ހިންގާ ޤަވައިދު އިސްލާހުކޮށް ފާސް ކުރެވުނެވެ. މީގެ އިތުރުން ފާއިތުވި އަހަރު އެކި ގޮތްގޮތުން މި ޖަމިއްޔާއަށް އެހީތެރިވެދެއްވި ފަރާތްތަކުގެ އަގު ވަޒަން ކޮށް އެފަރާތްތަކަށް ހަނދާނީ ސެޓްފިކެޓް ދިނުން ވެސް އޮތެވެ.

AGM of care society where care services were highlighted along with voting of some amendments and appointees to the executive board. #AGM2023 #care #celebration pic.twitter.com/FdacbF7ZlN— Care Society (@CareSocietyMV) March 12, 2023

މި ޖަލްސާގައި ކެއާ ސޮސައިޓީގެ ބޯޑުގެ ރައީސް، އިސްމާއިލް އަދުހަމް، މުހިއްމު ގިނަ ކަންތައްތަކެއް ފާހަގަކުރެއްވިއެވެ. މިގޮތުން ތިރީގައި އެވަނީ ފާހަގަކުރެއްވި މުހިއްމު ކަންތައްތަކެވެ.

• ކެއަރ ސޮސައިޓީގެ ޚިދުމަތްތައް މައިގަނޑު 3 ދާއިރާއަކަށް ބަހާލެވިފައިވުން. ފުރަތަމަ ކަމަކީ ކުދިންގެ ޅަފަތުގައި އާރލީ އައިޑެންޓިފިކޭޝަން އަދި އާރލީ އިންޓަވެންޝަން ފޯރުކޮށްދިނުން . މިއީ ކެއާ ސޮސައިޓީއިން އެންމެ މުހިއްމު ކަމެއްދޭ ޕްރޮގްރާމް އަދި ދުނިޔޭގެ އެހެން ޤައުމުތަކުގައިވެސް އެންމެ އިސްކަމެއް ދެނީ މި ޕްރޮގްރާމަށް.

• ދެވަނަ ކަމަކީ ސްކޫލް ނިންމާ ކުދިންނަށް ޢާމްދަނީ ހޯދޭނެ ގޮތެއް ނުވަތަ ވަޒީފާއަށް ނެރުމަށް ހިންގޭ ޕްރޮގްރާމް. ތިންވަނަ ކަމަކީ ތެރަޕީ އަދި ރިހެބިލިޓޭޝަން ޕްރޮގްރާމް.

• މިއަހަރަކީ ކެއާ ސޮސައިޓީއަށް 25 އަހަރު ފުރޭ އަހަރަށް ވާތީ އެކަން ކުލަގަދަކޮށް ފާހަގަ ކުރުމަށް ޚާއްޞަ ހަރަކާތްތަކެއް ކުރިއަށް ގެންދަން ރާވާފައިވާކަން. މިގޮތުން ކުރެވޭ ފުރަތަމަ ކަމަކީ ކެއާ ސޮސައިޓީގެ އައު މިސްރާބު އެކުލަވާލާ ސްޓްރެޓެޖިކް ޕްލޭން އިސްލާހު ކުރުން – މިކަމަށްޓަކައި ސްޓޭކްހޯލްޑަ ފޯރަމެއް މިއަހަރުތެރޭ ބޭއްވޭނެ. އަދި 25 އަހަރުގެ ދިގު ދަތުރު ޢާއްމުންނާ ހިއްސާކުރުމުގެ ގޮތުން ޕްރޮގްރާމްތަކެއް ހިންގޭނެ އަދި މީގެ އިތުރުން މިއަހަރު ފަހު ކޮޅު ވަރަށް ޚާއްޞަ ޖަލްސާއެއް ބާއްވާގޮތަށް ވަނީ ހަމަޖެހިފަ.

• ކެއަރ ސޮސައިޓީގެ ޚިދުމަތްތައް މާލޭގެ އިތުރުން ރާއްޖޭގެ އުތުރާ ދެކުނުގައި ފެށުމުގެ މަސައްކަތް ކުރާ ކަމަށް ފާހަގަކުރެއްވިއެވެ. މިގޮތުން މިއަހަރުތެރޭގައި ހދ ކުޅުދުއްފުށީގައި ކެއާ ސޮސައިޓީގެ ޚިދުމަތްތައް ފެށޭތޯ މަސައްކަތް ކުރާކަމަށް ފާހަގަކުރެއްވި.

• ކެއާ ސޮސައިޓީގެ ޚިދުމަތްތައް ހުޚުމާލޭގައި މިއަހަރުގެ އޮގަސްޓް މަހުގައި ފެށުމަށް މިހާރު މަސައްކަތް ކުރެވެމުން ދާކަން. ހުޅުމާލެ ފޭސް 2 ގައި ދިރިއުޅޭ ފަރާތްތަކަށް ކެއާ ސޮސައިޓީގެ ޚިދުމަތްތައް ބޭނުންވާކަމަށް ވަނީ ފާހަގަކުރެވިފަ. މިގޮތުން އެޗް، ޑީ، ސީ އާއި މި ޖަމިއްޔާ ގުޅިގެން ހުޅުމާލެ ފޭސް 2 ގައި ކެއާ ސޮސައިޓީގެ ޚިދުމަތްދޭނެ ތަނެއް މިހާރު މިދަނީ ތައްޔާރު ކުރަމުން. އުންމީދު ކުރެވެނީ މިއަހަރު އޮގަސްޓް ކުރީކޮޅުގައި ޚިދުމަތް ދޭން ފެށޭނެކަމަށް. މިތަނުން ކުދިންގެ އިންޓަވެންޝަން، ތެރަޕީ އަދި ވޮކޭޝަނަލް އެޑިޔުކޭޝަން ޚިދުމަތް ދެވޭނެ.

• އެއް ފުރާޅެއްގެ ދަށުން ތަފާތު ޚިދުމަތްތައް ލިބޭނެ ގޮތަކަށް މަރުކަޒެއް ހެދުމުގެ ކޮންސެޕްޓް (ޑްރީމް ޕްރޮޖެކްޓް) ކުރިއަށް ދާކަން ފާހަގަކުރެއްވިއެވެ. އަދުހަމްގެ ވާހަކައިގާ ފާހަގަކުރެއްވި ގޮތުގައި ކުދިންނަށް ބޭނުންވާ ތެރަޕީ، އިންޓަވެންޝަން އަދި ވޮކޭޝަނަލް ޕްރޮގްރާމްތައް ރޭވިފައި މިހުންނަނީ ވަކިވަކި ދާއިރާތުގައި އެވެ.

“މިގޮތަށް ރޭވިފައި ހުރުމުން ބެލެނިވެރިންގެ މުޅި ދުވަސް ހޭދަކުރަންޖެހެނީ މިތަންތަނަށް ކުދިން ގެންގޮސް ގެނައުމުގައި.އިރާދަ ކުރެއްވިއްޔާ ކެއާ ސޮސައިޓީ އިން މަސައްކަތް ކުރަމުން މިގެންދަނީ ހެނދުނު ކުއްޖާ ގެނެސް އަޅުގަނޑުމެންނާ ހަވާލުކުރުމަށް ފަހު މެންދުރު ފަހު ކުއްޖާ ގެއަށް ފޮނުވޭގޮތަށް ޚިދުމަތް ރެވޭތޯ. މިހެން ރޭވިއްޖެނަމަ ކުއްޖާއަށް ބޭނުންވާ ތެރަޕީ، ތަޢުލީމު، ވޮކެޝަނަލް ޕްރޮގްރާމް އަދި ޑޭ ކެއާ ގެ ޚިދުމަތް އެއް ފުރާޅެއްގެ ދަށުން ލިބިގެންދާނެ. މިއީ ބެލެނިވެރިންނަށް ވަރަށް ބޮޑު ފަސޭހައަކަށް ވާނެ ކަމެއް،” އަދުހަމް ވިދާޅުވިއެވެ.