މިހާރުގެ ޒުވާން ޖީލް ބަހުރުވައިގެ ދަރަޖަތަކެއް ބަލައެއް ނުގަނޭ

ވަޒީރެއް އަވަހާރަވާނީ އެވެ. އާދައިގެ ރައްޔިތު މީހާ މަރުވާނީ އެވެ. ރައީސް އިތުރުފުޅު ހައްދަވާނީ އެވެ. އާދައިގެ ރައްޔިތު މީހާ ހަދާނީ ދޮގެވެ. މިއީ އަހަރުމެން ކުޑައިރުއްސުރެ ސުކޫލުތަކުގައިވެސް ކިޔަވައިދޭ ކަންކަމެވެ.

މި ނޫހުގެ ފަރާތުން މިދިޔަ އަހަރު ނެގި ވޯޓުން ހާމަވާގޮތުގައި ވަކި އާއިލާއަކަށް ނިސްބަތްވީތީ ނުވަތަ ވަކި ވަޒީފާއެއް އަދާކުރާތީ މާތްބަސް ހާއްސަވެފައި ދެރަ ނިކަމެތިންނަށް އެންމެ އާދައިގެ ބަސް އޮންނަ އޮތުމަކީ މިހާރު ގިނަ މީހުން ގަބޫލުކުރާ ކަމެއް ނޫނެވެ.

advertisement

އެއްދުވަސްވަރެއްގައި ވަކި ބަޔަކީ މާ މާތް މަތިވެރި ބޭފުޅު ބައެއް ކަމުގައި ދެކި އެހެން އެންމެން އާދޭހޭ، ދަރަޖަ މަތިވެރި މާތް މަނިއްޕުޅާއޭ، ދުރުވެވަޑައިގަންނަވާށޭ ވިދާޅުވެ ކުރުނީސްކޮށް ވެދުންއެރުވި ޒަމާނަކީ މާޒީކަމުގައި ވިޔަސް ދިވެހިބަސް އަދިވެސް އޮތީ ބޭފުޅިޒަމްގެ މަސްތުން އަމަލުވެ ނިދާފައެވެ.

ތަފާތުކުރުމާއި ދަރަޖަކުރުމާއި އަދި އިމްތިޔާޒުގެ ލަދުވެތި ނިޒާމް ދެމެހެއްޓުމަށް އެންމެ ފުރަތަމަ ސްކޫލް ނިޒާމުން ދަސްކޮށްދެނީވެސް ދިވެހި ބަސް ކަމާއި، އެ ބަހުގައި ދަރަޖަތަކެއް ވާ ކަމެވެ. ނޫސްވެރިކަމަކީވެސް ދިވެހި ބަހުގެ ބޭފުޅިޒަމްގެ ހަމަތައް ދެމެހެއްޓުމަށް ކުރަންޖެހޭ ކަމެއްކަން ހީވާ ހިސާބަށް ނޫސްވެރިކަން ކިޔަވައި ދިނުމުގައި އަމަލުކުރާކަމީ ދެރަވެ ކަންބޮޑުވާ ކަމެކެވެ.

މިފަދަ ތަފާތުކުރުންތަކުން ސަލާމަތްކުރުަމަށް ދިވެހިބަސް މުރާޖައާ ނުކުރަންވީ ސަބަބެއް ނެތެވެ. ކަޅު މީހުން އަޅުންގެ ގޮތުގައި ގެންގުޅުނު ޒަމާނުގައި ބޭނުންކުރެވުނު ބައެއް އިނގެރޭސި ބަސްތަކަކީ ވެސް މިހާރު ރަސްމީ އެއްވެސް ސިފައެއްގައި ބޭނުންކުރެވޭ ބަސްތަކެއް ނޫނެވެ. ތިކި ޖެހި ތާނައާއި، ދަރަޖަތަކާއި، ރަސްމީ ލިޔެކިޔުންތަކާއި ހަފްލާތަކުގައި މަތިވެރި ބަސްތަކުން ކުރުނީސް ކުރުމަކީ މިހާރުން މިހާރަށް ހުއްޓާލަންޖެހޭކަމެވެ.

ދެން އޮތީ މާލޭ ބަހުރުވައާއި ރާއްޖެތެރޭ ބަހުރުވައިގެ ވާހަކަ

އެންމެ ފުރަތަމަ ކުރަންޖެހޭ ސުވާލަކީ އަސްލު ދިވެހި ބަހަކީ ކޮބައިތޯއެވެ؟ މާލެ ސަރަހައްދުގެ ރައްޔިތުން ވާހަކަ ދައްކާ ބަސްތައް ހިމަނައިގެން ސަރުކާރުން ރަސްމީކޮށްގެން މިއުޅޭ ދިވެހި ބަހަކީ ހަމައެކަނި ދިވެހިންގެ ބަސް ހެއްޔެވެ؟ ސީނު އަތޮޅާއި ފުވައްމުލަކުން ގޮސް ގާފު އަލިފާއި ދާލު ފަހަނައަޅައި ހުވަދޫ ކަނޑު ހުރަސްކޮށް ހައްދުންމަތީގެ ދިވެހީން ވާހަކަ ދައްކައި މިއުޅޭ ބަހަކީ ދިވެހި ބަސް ނޫން ނަމަ ދެން އެއީ ކޮންބަހެއް ހެއްޔެވެ؟

އުތުރާއި އެހެނިހެން އަތޮޅުތަކުގައި ބޭނުންކުރާ ދިވެހިބަސް ރަސްމީ ލިޔެކިޔުންތަކާއި ސްކޫލްތަކުގެ މުގައްރަރުގައި ބޭނުން ނުކުރަނީ ކީއްވެބާއެވެ؟ ދެކުނުގެ ސްކޫލުތަކުގެ ދަރިވަރުން ގޭގައި ރަށު ބަހުން ވާހަކަ ދެއްކި ނަމަވެސް ސްކޫލުތެރޭގައި ރަށުބަހުން ވާހަކަ ދެއްކުން މަނަލީ ކީއްވެ ހެއްޔެވެ؟ ރަށު ޓީޗަރާއި ރަށު ދަރިވަރު “ދިވެހި ބަހުން” ވާހަކަ ދައްކަނީ ކީއްވެ ބާއެވެ؟

ދިވެހި ބަހުގެ އެކަޑެމީއާއި އެކިއެކި އިދާރާތައް މެދުވެރިކޮށް މަދު ބަޔަކު ވާހަކަދައްކާ ދިވެހި ބަހުގެ ބައެއް ލަފުޒާއި ބަނޑިތަކަކީ ހަމައެކަނި ދިވެހިންގެ ބަސްކަމުގައި ހަދަން އުޅުނެއްކަމަކު، ހަގީގަތަކީ ދިވެހި ބަހަކީ ހާއަލިފުން ސީނާ މެދު އަތުރާލެވޭ ހުރިހާ ބަސްތައްކަމެވެ. ހުރިހާ ކަންކޮޅެއްގެ މީހުން ބަސްމޮށި އުޅޭ ބަސްތަކަކީ ހަމަ ދިވެހި ބަހެވެ.

އިމްތިޔާޒުގެ ތަފާތުކުރުން ބޮޑު ބޭފުޅިޒަމާއި ދޯޅު ދިވެހި ބަހަކީ މިހާރުގެ ޖީލުތަކުން ބަލައިގަންނަ ބަހުރުވައެއް ނޫނެވެ.