ސަން ސިޔާމް ދައުރު ނޫހުގެ ސީނިއާ އެޑިޓަރަކަށް އިންޒާރުދިން މައްސަލަ ފެންމަތިވެއްޖެ

ދައުރު ނޫހުގައި ޝާއިރު އާޓިކަލްއަކާ ގުޅިގެން އެނޫހުގެ ސީނިއާ އެޑިޓަރަކަށް މެސެޖްކޮށް އިންޒާރުދީފައިވާ މައްސަލަ އެމްޖޭއިން ކަންބޮޑުވުމާ އެކު ކުށްވެރިކޮށް ވީ އެންމެ އަވަސް މިނެއްގައި އެ މައްސަލައިގެ ތަހުގީގެއް ހިންގުމަށް ގޮވާލާފިއެވެ. އެޑިޓަރަށް އިންޒާރުދީފައިވަނީ އެ ނޫހުގައި 6 އެޕްރީލް 2023 ވަނަ ދުވަހު ޝާއިއުކުރި “ސިޔާމާއި ހިލްޓަންގެ މައްސަލަ: ރާއްޖެއިން އިންވެސްޓަރުންނަށް ރަތުގެ  އިންޒާރެއް”، މި އާޓިކަލްއާ ގުޅިގެންނެވެ

ދައުރު ނޫހުން އެމްޖޭއަށް މައުލޫމާތު ދީފައިވާގޮތުގައި ހިލްޓަން އަދި ސަންއާ ގުޅޭ ގޮތުން ސިންގަޕޫރްގެ އާބިޓްރޭޝަނުން ނިންމާފައިވާ ނިންމެއް ތަންފީޒުނުވެ ގިނަ އަހަރުތަކެއްވެފައިވާ  މައްސަލާގެ މައްޗަށް އެ ނޫހުގައި ބުރާސްފަތި ދުވަހު ޝާއިއު ކުރި ރިޕޯޓާ ގުޅިގެން ސަން ކުންފުނީގެ ވެރިޔާ އަދި ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަހުމަދު ސިޔާމް ވަނީ ނޫހުގެ ސީނިއާ އެޑިޓަރަކަށް ފޯނުން ގުޅުއްވައި ކޯފާ އިސްކުރައްވައި ވާހަކަ ދައްކަވާފައެވެ. އަދި ފަހުގެ އިންޒާރު ދެއްވަނީ ކަމަށް ވިދާޅުވެ އާޓިކަލް ވަގުތުން ނަގަން އަހުމަދު ސިޔާމް އެންގެވިކަމަށް ނޫހުން މައުލޫމާތު ދިނެވެ.

advertisement

އެ އިންޒާރަށް ފަހު އާޓިކަލް ލުޔުނު އަހުމަދު ނާއިފަށާއި ސީނިއާ އެޑިޓަރަށް ވެސް ނަންބަރުތަކަކުން އެތައް މެސެޖެއްކޮށް މަރުގެ އިންޒާރު ދީފައިވެއެވެ. އެގޮތުން ނާއިފް އާއި އެޑިޓަރުގެ ފޯނަށް ފޮނުފައިވާ މެސެޖްތަކުގައި އެ ދެމީހުންނާ މަގުމަތިން ދިމާކޮށްލާނުކާމާއި ފުރާނަދުއްވާލާންވެސް ފަސްނުޖެހޭނެ ކަމަށް ބުނެ އިންޒާރު ދީފައިވެއެވެ. މި އިންޒާރުތަކާ ގުޅިގެން  ދައުރު ނޫހުން އަދި ނާއިފްގެ ފާރާތުން މިހާރުވަނީ ދިވެހި ފުލުހުންގެ ހިދުމަތަށް މައްސަލަ ހުށަހަޅާފައެވެ. 

އެމްޖޭއިން ގަބޫލުކުރާގޮތުގައި ނޫސްވެރިންނަށް މަރުގެ އިންޒާރު ދިނުމަކީ އާދައިގެ ގޮތުގައި ނެގޭނޭ މައްސަލައެއް ނޫނެވެ. މި އިންޒާރަކީ އިންތިހާ ދަރަޖައަށް ނުރައްކާ އޮތް، ކަންބޮެޑުވާ ދަރަޖައިގެ ސީރިއަސް އިންޒާރެއްކަން އެ ޖަމިއްޔާއިން ގަބޫލުކުރެއެވެ. އަދި މި މައްސަލގައި ސިޔާސީ ގޮތުން ނުފޫޒުގަދަ ބޭފުޅެއް ހިމަނާފައިވާކަމީ ވެސް އެ ޖަމުއްޔާއިން ކަންބޮޑުވާކަމެކެވެ. އެމްޖޭއިން ގޮވާލަނީ މިމައްސަލަ ވީ އެންމެ އަވަސް މިނެއްގައި ތަހުގީގުކޮށް އިންޒާރު ދިން މީހުން އިންސާފުގެ ކުރި މައްޗަށް ގެނެސް، ނޫސްވެރިންނަށް ދޭން ޖެހޭ ރައްކާތެރިކަން ފުލުހުންގެ ފަރާތުން ފޯރުކޮށްދިނުމަށެވެ.

އެމްޖޭގެ ކަންބޮޑުވުމަކީ ނޫސްވެރިންނަށް ދޭ މިފަދަ އިންޒާރުތަކުގެ އެއްވެސް މައްސަލައެއްގެ ކާމިޔާބު ތަހުގީގެއް ފުލުހުންނަށް  މިހާތަނަށް ހިންގި، އެކަން ކުރި ފަރާތްތައް ހޯދައި ފިޔަވަޅު އެޅިގެން ނުވުމެވެ. އެމްޖޭއިން ދވެހި ފުލުހުންގެ ހިދުމަތަށް ގޮވާލަނީ ނޫސްވެރިންނަށް ދޭ އިންޒާރުތަކުގެ މައްސަލަތައް އެކަށީގެންވާ އަވަސް މިނެއްގައި ސީރިއަސް ގޮތެއްގައި ތަހުގީގުކޮށް، ފިޔަވަޅު އަޅައި ނޫސްވެރިންނަށް އެކަށީގެންވާ ރައްކާތެރި  މާހައުލެއް ކަށަވަރު ކޮށްދިނުމެވެ. އެ ޔޫނިއަން ގަބޫލުކުރަނީ ނޫސްވެރިންގެ މަސައްކަތްތަކަށް އެކި ގޮތްގޮތުން ހުރަސް އަޅާ ފަރާތްތައް ހޯދާ އަދަބު ނުދެވޭ ވުދެވުމަކީ، އެފަދަ ޖަރިމާތައް ރާވައި ހިންގާ ފަރާތްތަކަށް ލިބޭ ނުސީދާ ހިތްވަރެއް ކަމާއި އެފަދަ ކަންކަން ތަކުރާރުކުރަން ދެވޭ ހިތްވަރަކަށް ނޫނީ ނުވާނެ ކަމަށެވެ.