ގޯލްޑް 100 ގާލާގެ ޕްލެޓިނަމް ޕާޓްނަރަކަށް ބީއެމްއެލް

ކޯޕަރޭޓް މޯލްޑިވްސް “ގޯލްޑް 100 ގާލާ” 2022 ގެ ޕްލެޓިނަމް ޕާޓްނަރަކަށް ބޭންކް އޮފް މޯލްޑިވްސް ހަމަޖައްސައިފިއެވެ. ގޯލްޑް 100 ގާލާއަކީ ރާއްޖޭގައި އެންމެ ކުރިއަރާފައިވާ 100 ކުންފުނި ހޮވުމަށް ބާއްވާ އިވެންޓެކެވެ.

މިއަހަރުގެ ގޯލްޑް 100 ގާލާ އޮންނާނީ މެއި 16 ވަނަ ދުވަހުގައި ކްރޮސްރޯޑް މޯލްޑިވްސްގައެވެ.
މިއަހަރުގެ ގޯލްޑް 100 ގާލާގެ ޕްލެޓިނަމް ޕާޓްނަރަކަށް ބީއެމްއެލް ހަމަޖައްސާފައިވާއިރު މިއީ ބީއެމްއެލްއިން ގޯލްޑް 100 ގާލާގެ ޕްލެޓިނަމް ޕާޓްނަރަކަށްވި 7 ވަނަ އަހަރެވެ.

advertisement

ރާއްޖޭގެ އެންމެ ގަދަ 100 ކުންފުނީގެ ކާމިޔާބު ފާހަނގަކުރާ މި ހަފްލާގައި ބައިވެރިވެވޭނީ ހަމަ އެކަނި ކޯޕަރޭޓް މޯލްޑިވްސްއިން ދައުވަތު ފޮނުވާ ފަރާތްތަކަށެވެ.

މިއީ ހިތްގައިމު މާހައުލަކުން އެންމެން އެކީ ބައްދަލުވެލާ ގުޅުން ބަދަހިކުރުމަށް ވިޔަފާރިވެރިންނަށް ލިބޭ ފުރުސަތެކެވެ. ކުންފުނިތަކުގެ ޗެއާމަނުންނާއި، މެނޭޖިންޑިރެކްޓަރުންނާއި، ސީއީއޯ އަދި ކުންފުނިތަކުގެ މުހިންމު ނިންމުންތައް ނިންމާ މަގާމުތަކުގައި ތިއްބަވާ ބޭފުޅުން މިހަފްލާގައި ބައިވެރިވާނެއެވެ.

މިހަފްލާގައި “ގޯލްޑް 100” މެގަޒިން އިފްތިތާހުކުރުމާއި އަދި އެންމެ ގަދަ 100 ކުންފުންޏަށް އެވޯޑް ދިނުން އޮންނާނެއެވެ. “ގޯލްޑް 100” އަކީ ކޯޕަރޭޓް މޯލްޑިވްސް އިން ކޮންމެ އަހަރަކުވެސް ނެރޭ ރާއްޖޭގެ އެންމެ ކާމިޔާބު 100 ވިޔަފާރި ކުންފުނީގެ ލިސްޓެކެވެ.

މި ލިސްޓުގައި ވިޔަފާރިތައް ރޭންކު ކޮށްފައި ނުވާ ނަމަވެސް، ދެފުށްފެންނަ މިނިވަން މަރުހަލާތަކެއްގެ ތެރެއިން ހޮވާލެވޭ މި 100 ކުންފުންޏަކީ ރާއްޖޭގައިވާ ލީޑިންގ 100 ކުންފުންޏެވެ.

ރާއްޖޭގެ އެކި ސިނާއަތްތައް ކުރިއެރުވުމަށް ގިނަ މަސައްކަތްތައްކޮށް، ވިޔަފާރި މައިދާނުގައި ކާމިޔާބާއި ކުރިއެރުން ހޯދާފައިވާ އަދި މުޖުތަމައުއަށް ގިނަގުނަ ހިދުމަތްތަކެއް ކޮށްފައިވާ ފަރާތަކަށް “ލައިފްޓައިމް އެޗީވްމަންޓް އެވޯޑް” ދިނުންވެސް މި ހަފްލާގައި އޮންނާނެއެވެ.