ރާއްޖޭގެ ޒުވާން ޝެފުން ބައިނަލްއަގްވާމީ ބޮޑު މުބާރާތަކަށް

ޔުނައިޓެޑް އެރެބް އެމިރޭޓްސްގެ އެމިރޭޓްސް ސެލޮން ކަލިނެއާރ މުބާރާތުގެ ތެރެއިން ބާއްވާ އެލެން ތޮންގް ގޯލްޑެން ކޮފީ ޕޮޓް ޗެލެންޖް 2023 ގައި ދިވެހި ޒުވާން ޝެފުންގެ ޓީމެއް ބައިވެރިވާ ގޮތައް ހަމަޖެހިއްޖެއެވެ. މި މުބާރާތް އޮންނަނީ މި ހިނގާ މޭ މަހުގެ 29 އިން 31 އަށް ޔުނައިޓެޑް އެރެބް އެމިރޭޓްސްގެ ޝަރްޖާހްގައެވެ.

އެލެން ތޮންގް ގޯލްޑެން ކޮފީ ޕޮޓް ޗެލެންޖްއަކީ އެކި ގައުމުތަކުން ބައިވެރިވާ ޒުވާން ޝެފުންގެ ޓީމަކުން ފުރިހަމަ 3 ކޯސްގެ މީލްއެއް ތައްޔާރުކުރާ ބޮޑު މުބާރާތެކެވެ. މި މުބާރާތުގައި ކޮުންމެ ޓީމަކުން ވެސް ކޯލްޑް ސެލެޑް އެންޑް އެޕެޓައިޒާ އާއި ޑެޒާޓް ބުފޭއެއްގެ އިތުރުން މެއިން ކޯސްއެއް ތައްޔާރުކުރަން ޖެހޭނެއެވެ. 

advertisement

މި މުބާރާތުގައި ބައިވެރިވުމުގެ ފުރުސަތު ލިބެނީ، މުބާރާތް އިންތިޒާމުކުރާ އެމިރޭޓްސް ސެލޮން ކަލިނެއާރގެ ފަރާތުން ދައުވަތު ދޭ 9 ގައުމަކަށް އެކަންޏެވެ. އެހެންކަމުން، މި އަހަރުގެ މުބާރާތުގައި ބައިވެރިވުމަށް ޝެފްސް ގިލްޑް އޮފް މޯލްޑިވްސްއަށް ދައުވަތު ލިބުނުކަމަކީ ވަރަށް ބޮޑު ޝަރަފެކެވެ.

މި މުބާރާތުގައި ބައިވެރިވާ ދިވެހި ރާއްޖޭގެ ޒުވާން ޝެފުންގެ ޓިީމުގެ މެއިން ސްޕޮންސަރަކީ ރާއްޖޭގެ ކަލިނަރީ އަދި ހޮސްޕިޓާލިޓީ ދާއިރާގެ އެންމެ ބޮޑު އެއް ސަޕްލަޔަރ ކަމުގައިވާ ބެސްޓް ބައި މޯލްޑިވްސް އެވެ.