ރިޕޯޓް: އިންތިހާބީ ވައުދުވުން ހައްދުންނައްޓައި ބޮޑު ޖޯކަކަށް

މިއޮތީ ކަންތަކާލައިގަނެ އަނެއްކާވެސް ވައުދުގެ މޫސުން އައިސްފައެވެ. އިންތިހާބީ ދުވަސްވަރުކަމަށް ވުމުން ތާއީދު ހޯދުމަށް ކެންޑިޑޭޓުންނާއި ޕާޓީތަކުން ތަނެއް ދޮރެއް ނުބަލާ ބޮޑެތި ވައުދުތައް ދަނީ ވަމުންނެވެ. ކެމްޕެއިން އިވެންޓްގެ ތެރެއިން ސިއްސައިގެންދާފަދަ ވައުދުތައް ދަނީ އިއުލާނުކުރަމުންނެވެ. މީގެ ތެރެއިން ގިނަ ކަންކަމަކީ އާންމު ރައްޔިތު މީހާ އެންމެ ބޭނުންވާނެ ކަންކަމެވެ. 

އެހެން ނަމަވެސް މި ގޮތަށް ވައުދުތައް ވަމުން ދަނީ އެ ވައުދުތައް ފުއްދޭނެ ގޮތްތަކެއް ބުނެ ނުދީއެވެ. އެކަމާ މެދު އާންމު މީހާ މާބޮޑަށް ފިކުރު ނުކުރާނެ ކަމަށް ބަލައި ބޮޑެތި ވައުދުތައްވާ އިރު އެ ވައުދު ފުއްދާނެ ގޮތެއް ނޭގެއެވެ

advertisement

މީގެކުރިންވެސް ހަމަބުއްދިއަށް ގަބޫލުނުކުރެވޭ ފަދަ ވައުދުތައްވެފައި އެބަހުއްޓެވެ. ފްލޯޓިން ވިލާ އެޅުމާއި ގަރުދިޔަ ފެކްޓްރީތައް އެޅުމާއި ކޭަބަލް 

ކާރު ފަދަ ތަފާތު ކަންކަން މީގެ ކުރިން އިވިގެން ގޮސްފައި ވެއެވެ. މިފަދަ ބައެއް ވައުދުތައް ރައްޔިތުން މާ ސީރިއަސްކޮށް ނުނަގައެވެ. އެހެން ނަމަވެސް ހަގީގަތުގައި ކެންޑިޑޭޓަކު ކެމްޕެއިންގެ ތެރޭގައި ދައްކަވާ ވާހަކަތަކަށް ޖަވާބުދާރީވާން ޖެހޭނެއެވެ

ރަށްރަށަށް ގިނަ ދަތުރުތަކެއްކޮށް ގިނަ ވައުދުތަކެއް

ސަރުކާރުން ނުވަތަ މަގާމު ދިފާއުކުރެއްވުމަށް ކެމްޕެއިން ކުރައްވަމުން ގެންދަވާ ރައީސުލްޖުމްހުރިއްޔާ އިބްރާހީމް މުހައްމަދު ސޯލިހް ވެސް ރަށްރަށަށް ގިނަ ދަތުރުތަކެއް އެބަ ކުރައްވައެވެ. އެ މަނިކުފާނު ވަޑައިގަންނަވާ ކޮންމެ ރަށެއްގައި ވެސް އެ ރަށަކަށް ބޭނުންވާ ކަންކަން ގެންދަވަނީ އިއުލާންކުރައްވަމުންނެވެ. 

އަދި ރައީސް ދައްކަވާ ވާހަކަފުޅުތައް ބައްޓަންކުރައްވަނީ އެ ރަށެއްގައި ހުންނަ އަސާސީ ބޭނުންތަކުގެ މައްޗަށް ކަމެވެ. އޭގެ ތެރޭގައި ފެނާއި ނަރުދަމާގެ ނިޒާމާއި މަގުތަކުގައި ތާރު އެޅުމާއި ބޯހިޔާވަހިކަމުގެ މައްސަލަ ހައްލުކުރާނެ ގޮތްތައް ހިމެނެއެވެ. ނަމަވެސް މިފަހަރުގެ އެންމެ ބޮޑު ހަދިޔާއެއް ވައުދުގެ ގޮތުގައި ލިބެނީ މާލޭގެ ހޮވާލެވޭ ރައްޔިތުންނަށެވެ. މިގޮތުން ބިލިއަން ރުފިޔާގެ އަގުހުރި ބިން އެފަރާތްތަކަށް ހިލޭ ދިނުމަށް ވަނީ ނިންމާފައެވެ

އިންތިހާބުގައި ވާދަކުރައްވާ އެހެން ކެންޑިޑޭޓުން ވެސް ގެންދަނީ ވައުދުތައް ވަމުންނެވެ. އެ ގޮތުން ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހީމް ވެސް މިހާތަނަށް ގިނަ ވައުދުތަކެއް ވެވަޑައިގެންފައި ވެއެވެ. އެ ގޮތުން އެންމެ ބޮޑަށް ފާހަގަކޮށްލެވޭ އެއްކަމަކީ މިހާތަނަށް ސަރުކާރުން އަޅާފައިވާ ހުރިހާ ފްލެޓެއްގެ ކުލި މައާފުކޮށްދެއްވުމާއި ހިލޭ އިތުރު 20،000 ފްލެޓް އަޅުމުގެ މަޝްރޫއުގެ ވައުދެވެ

ހަމަ ބުއްދިއަށް ގަބޫލުކުރަން ދަތި ގިނަ ވައުދުތަކެއް

“އަޅުގަނޑުގެ ވެރިކަމެއްގައި ރާއްޖޭގެ ހުރިހާ ދިމާއެއްގައި ވެސް ސަރުކާރުން ބޯހިޔާވަހިކަމަށް ދީފައިވާ ފްލެޓްކަމަށް ވިޔަސް، ގެކަމަށް ވިޔަސް، ދައުލަތަށް ލާރި ދައްކާކަމަށް ވަންޏާ އެ ހުރިހާ ފައިސާއެއް މާފުކޮށްދޭނަމޭ،” އާންމުކުރެއްވި ވިޑީއޯ މެސެޖެއްގައި ގާސިމް ވިދާޅުވެފައި ވެއެވެ.

މިއީ ރައްޔިތުން ވަރަށް އަޑުއަހަން ބޭނުންވާނެ ވާހަކަތަކެވެ. އެހެން ނަމަވެސް މިކަން ކުރާނީ ކިހިނެއް ހެއްޔެވެ؟ 

ހިޔާ މަޝްރޫ އާއި އަދި ކުރީގެ ރައީސް މައުމޫން އަބްދުގައްޔޫމްގެ ވެރިކަމުން ފެށިގެން ހިންގާފައިވާ ބޯހިޔާވަހިކަމުގެ މަޝްރޫއުތަކުގެ އަގު އެތައް ބިލިއަން ރުފިޔާއަކަށް އަރައެވެ. މިހާރު ވެސް އެތެރެ އާއި ބޭރުގެ ދަރަނި އިންތިހާ އަށް އޮތް ގައުމެއްގައި އެ ވަރުގެ ބޮޑު ބުރައެއް އުފުލާނެ ހަކަތަ ރާއްޖޭގެ އިގްތިސާދުގައެއް ނެތެވެ. ހިސާބުތަކެއް ނުހެދިޔަސް އެއީ ހަމަ ބުއްދިއަށް ގަބޫލުކުރަން ދަތި ކަމެކެވެ. 

އެކަން ކުރާނެ ގޮތެއް ނުވަތަ އެ ކަމަށް ބޭނުންވާ ފައިސާ ހޯދާނެ ގޮތެއް ގާސިމް ވެސް އަދި ޖޭޕީން ވެސް ހާމަކޮށްފައެއް ނުވެއެވެ. އަނެއްކޮޅުން ބޯހިޔާވަހިކަން ހިލޭ ލިބޭނެ ގޮތް ހެދުމަކީ އިގްތިސާދީ ގޮތުން ވެސް ހަމަޖެހޭ ކަމަކަށް ނުވާނެއެވެ. ދުނިޔޭގެ އެންމެ ކުރިއަރާފައިވާ އަދި އެންމެ މުއްސަނދި ގައުމުތަކުގައި ވެސް އެއީ ކޮށްއުޅޭ ކަމެއް ނޫނެވެ.

ގާސިމްގެ އަނެއް ވައުދަކީ ވެރިކަމުގެ ފަސް އަހަރުގެ ތެރޭގައި 100 މިލިއަނަރުން އުފެއްދުމެވެ. އެހެން ނަމަވެސް އެކަން ވެސް ކުރާނެ ގޮތެއް 

ޖޭޕީއަކުން ނުބުނެއެވެ. ކުދި އަދި މެދު ފަންތީގެ ވިޔަފާރިވެރިން އުފެއްދުމަށް ތިން ބިލިއަން ރުފިޔާ ހޭދަކުރައްވާނެ ކަމަށް ވިދާޅުވި އިރު އެ ފައިސާ އިގްތިސާދުގެ ތެރެއިން ނެރުއްވާނެ ގޮތެއް ގާސިމް ވިދާޅެއް ނުވެއެވެ

މި ވައުދުތަކަށް ބާރުދެއްވައި ގާސިމް ވިދާޅުވީ ފުރަތަމަ ތިން އަހަރުގެ ތެރޭގައި ދައުލަތުގެ ދަރަނި ޖީޑީޕީގެ 120 ޕަސެންޓުން 90 ޕަސެންޓަށް ދަށްކުރައްވާނެ ކަމަށާއި ދައުލަތުގެ ހަރަދު ޖީޑީޕީގެ 35 ޕަސެންޓްގައި ހިފަހައްޓަވާނެ ކަމަށެވެ. އަދި އާމަދްނީ ޖީޑީޕީގެ 30 ޕަސެންޓަށް މަތިކުރައްވާނެ ކަމަށް ވެސް ވިދާޅުވިއެވެ. 

އެކަން ކުރައްވާނެ ގޮތުގެ ފޯމިއުލާ އޮތީ ގާސިމާއި ޖޭޕީގެ ވައުދު ފޮށީގައި ފޮރުވާފައެވެ. އެއްކޮޅުން ހަރަދުތައް ކުޑަކުރާނެ ކަމަށް ވިދާޅުވެފައި އޭގެ ފަހުން އެތައް ބިލިއަން ރުފިޔާގެ ދަރަނި މައާފުކޮށްދީ ހިލޭ 20،000 ފްލެޓާއި ބޯހިޔާވަހިކަން ފޯރުކޮށްދިނުމާއި ހިލޭ އިންޓަނެޓް ދިނުމާއި މިހާރު ވެސް ދެމުން އަންނަ އެތައް އެލަވަންސެއް ބޮޑުކުރުމާއި މިހްނެ ގޮސް ދައުލަތުގެ ބަޖެޓަށް ނުކަތާވަރުގެ ހަރަދުތަކެއްގެ ވާހަކަ ވިދާޅުވުމަކީ ހަމަޖެހޭ ކަމެއް ނޫނެވެ

މިވައުދުތައް އެހާ ސީރިއަސްކޮށް ނަގާނީ ކިތައް މީހުން؟

ގާސިމްގެ އިތުރުން ރިޔާސީ އިންތިހާބަށް ކުރިމަތިލައްވާނެކަން އިއުލާނުކުރައްވާފައިވާ މޯލްޑިވްސް ނޭޝަނަލް ޕާޓީ (އެމްއެންޕީ)ގެ ރިޔާސީ ކެންޑިޑޭޓް މުހައްމަދު ނާޒިމް ވެސް ވަނީ މިހާތަނަށް ވައުދުތަކެއް ވެވަޑައިގެންފައެވެ. އޭގެ ތެރެއިން ފާހަގަކޮށްލެވޭ އެއް ވައުދަކީ ހުޅުމާލެ އާއި މާލެ މޮނޯ ރެއިލްގެ ނިޒާމަކުން ގުޅާލުމެވެ. 

އެމަނިކުފާނުގެ އެއްބަނޑު އެއްބަފާ ކޮއްކޯފުޅު އާދަމް އާޒިމްގެ މޭސްތިރިކަމުގައި އެމްޓީސީސީން ފެށި އާރުޓީއެލްގެ ހިދުމަތްގެ ހިދުމަތް މިހާރު ކުރިއަށް ގެންދާ ގޮތް ކަމުނުދާކަން ފާހަގަކުރައްވައި ނާޒިމް ވިދާޅުވެފައި ވަނީ ” މާލެއިން ފެށިގެން ހުޅުމާލެއަށް ރޭލުގެ ނިޒާމަކުން ގުޅާލާނަން،” ކަމަށެވެ

އެމްއެންޕީގެ ސަރުކާރުން އެންމެ އިސްކަންދޭ ކަންކަމުގެ ތެރޭގައި ރެއިލްގެ ނިޒާމު ހިމެނޭ އިރު މީގެ ކުރިން ހުޅުމާލެ އާއި ހުޅުމާލެ2ގެ ތަސައްވުރު އިއުލާނުކުރި އިރު މޮނޯރެއިލް ނިޒާމެއްގެ ވާހަކަ އޮތެވެ. އެހެން ނަމަވެސް ކަނޑު ހުރަސްކޮށް މާލެއާ ހަމައަށް އެފަދަ ނިޒާމެއް ގާއިމުކުރުމަކީ މުޅިން އާ ވާހަކައެކެވެ.

 މާލެ އާއި ހުޅުމާލެއާ ދެމެދު މިހާރު އޮތް ބްރިޖް ވެސް ފަރުމާކޮށްފައި ވަނީ އެފަދަ ނިޒާމެއް ގާއިމުކުރެވޭ ފަދަ ގޮތަކަށް ނޫނެވެ. އެހެން ނަމަވެސް ފައިސާ ހުރި ނަމަ އެއީ ނުކުރެވޭނެ ކަމެއް ނޫނެވެ. ސުވާލަކީ އެ ވައުދު އެހާ ސީރިއަސްކޮށް ނަގާނީ ކިތައް މީހުން ހެއްޔެވެ؟

އިންތިހާބުގެ ރޭހުގައި ހަރުކަށި ވިސްނުންތައް

އިންތިހާބުގެ ރޭހުގައި އެންމެ ހަރުކަށި ވިސްނުމެއް ގެންގުޅުއްވާ އެއްބޭފުޅަކީ އެއްވެސް ޕާޓީއެއް ނެތް އުމަރު ނަސީރެވެ. އުމަރުގެ އެއް ވައުދަކީ ކުރިއަށް އޮތް 10 އަހަރުގެ ތެރޭގައި ބަނގުރަލާ ނުލައި ރާއްޖޭގެ ޓުއަރިޒަމް އޮޕަރޭޓްކުރާނެ ކަމަށެވެ. ގިނަ ބަޔަކަށް މިކަން ވެސް ވަނީ ޖޯކަކަށެވެ. ސަބަބަކީ އޫރު މަހާއި ރަލަކީ ރާއްޖޭގެ ޓުއަރިޒަމްގެ ބޮޑުބަޔަކަށް ވުމެވެ. 

އަދި އިސްލާމިކް ޓުއަރިޒަމެއްގެ ވައްޓަފާޅި ރާއްޖޭގައި ނެތުމާއި އަރަބި އެހެން ގައުމުތައް ފަދަ މާކެޓެއް ރާއްޖޭގައި ނެތުމަކީ އުމަރުގެ އެ ލަނޑުދަނޑި ހާސިލްކުރަން ފަސޭހަ ކަމަށް ނުވާނެ ކަމަށް މީހުން ބުނާ ސަބަބުތަކެވެ. މި ނޫނަސް އުމަރުގެ ގިނަ ވައުދުތަކުން ފެނިގެން ދަނީ ހަރުކަށި ކަމެވެ. އާންމުންގެ ތެރޭގައި އުމަރުގެ މަގުބޫލުކަން ދަށްވުމުގެ މައިގަނޑު ސަބަބަކީ ވެސް އެ ހަރުކަށި ކަމެވެ

ރިޔާސީ އިންތިހާބަށް ކުރިމަތިލުމުގެ ފުރުސަތު މިހާރު ވަނީ ހުޅުވާލާފައެވެ. ރާއްޖޭގެ އެންމެ ބޮޑު ދެ ޕާޓީގެ ތެރެއިން ސަރުކާރުގެ ކެމްޕެއިން ވަނީ މެކުހަށް ޖަހާފައެވެ. ސަރުކާރުގެ ވައުދު ލިސްޓްގައި ހިމެނެނީ ރަށްރަށުގެ ފަޅުތައް ހެދުމާއި މަގުތަކާއި އާ އެއާޕޯޓްތަކާއި ބަނދަރުތަކާއި ބޯހިޔާވަހިކަމާއި ޓުއަރިޒަމްގެ ބެޑް އިތުރުކުރުމާއި ހޮސްޕިޓަލްތަކާއި ސްކޫލްތަކާޢި މިސްކިތަކުގެ ވާހަކަތަކެވެ. 

ބަޔަކު ހައިރާންވެ އަންތަރީސްވާ ވަރުގެ މަޝްރޫއެއްގެ ވާހަކަ މިހާތަނަށް ރައީސް ސޯލިހް ދައްކަވާފައެއް ނުވެއެވެ. އާންމު ގޮތެއްގައި ދައްކަވަމުން ގެންދަވަނީ މިހާރު ވެސް ރަށްރަށުގައި ސަރުކާރުން ހިންގާ މަޝްރޫއުތަކުގެ ވާހަކަތެކެވެ.

އިދިކޮޅު އެންމެ ބޮޑު ޕާޓީ ޕީޕީއެމް އިން ކެމްޕެއިން ފެށި ނަމަވެސް އެ ޕާޓީގެ ކެންޑިޑޭޓަށް އިންތިހާބުގައި ވާދަކުރެވޭނެ މާހައުލެއް އަދި ފަހިވެފައެއް ނުވެއެވެ. އެހެން ކަމުން ރައްޔިތުންނަށް ކޮށްދޭނެ ކަންކަން ކިޔައިދިނުމުގެ ބަދަލުގައި އެ ޕާޓީ އަށް އުޅެންޖެހިފައި ވަނީ މި ވަގުތު ޖަލުގައި ހުންނެވި އެ ޕާޓީގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީން މިނިވަންކުރުމުގެ މަސައްކަތުގައެވެ. ރައްޔިތުން މަތިން ހަނދާންވެގެން ވައުދެއްވާނެ ފުރުސަތެއް އަދި އެ ޕާޓީއަކަށް ނުލިބެއެވެ. މިހާތަނަށް ބަލާއިރު އެޕާޓީގެ މައިގަނޑު ވައުދަކީ އިންޑިއާ ސިފައިން ރާއްޖެއިން ބޭލުމެވެ

އިންތިހާބުގެ ފޯރި ގަދަވާ ވަރަކަށް ބޮޑެތި ކަންތައްތަކެއް ޕާޓީތަކުން އިއުލާނުކުރާނެއެވެ. ގިނަ ވައުދުތަކެއް ވާނެއެވެ. މީގެ ތެރެއިން ބައެއް ވައުދުތަކަކީ ރައްޔިތުންނަށް ނުހަނު ބޭނުންތެރި އަދި ދައުލަތުގެ ބަޖެޓުން ކުރެވިދާނެ ކަންކަމެވެ. އެހެން ނަމަވެސް ކާށިދޫގެ ކޭބަލް ކާރާއި ގަރުދިޔަ ފެކްޓަރީ ފަދަ ވެސް ކުރިއަށް އޮތްތަނުގައި އިވި, ވައުދުވުން ހައްދުންނައްޓައި ބޮޑު ޖޯކަކަށް ވާނެކަމަށް ބެލެވެއެވެ