Maldives Opinion Network: Emmenge Hiyaalu Dhenegathumah Haahsa Mediaeh!

ދިވެހިންނަކީ ޒަމާނީ ޓެކްނޮލޮޖީއާ ރައްޓެހި ބަޔަކަށް ވުމުން އާންމުންގެ އަޑު އިއްވުމުގައި ވެސް ޒަމާނީ ވަސީލަތްތަކުގެ ބޭނުން ވަރަށް ފަރިތަކަމާ އެކު ހިފައެވެ. މިކަމަށް ވަކި އުމުރު ފުރައެއް ނެތެވެ. ސޯޝަލް މީޑިއާ ޕްލެޓްފޯމްތަކަށް ނަޒަރު ހިންގާލުމުން އެކަން އެނގޭނެއެވެ. މިއީ މުހިންމު ވެސް ކަމެކެވެ. އާންމު ރައްޔިތު މީހާ ދެކޭ ގޮތް އޮޅުން ފިލުވުމަކީ ސިޔާސަތު ބައްޓަންކުރާ ފަރާތްތަކަށް މުހިންމު ކަމެވެ. ޕާޓީތަކުގެ މެނިފެސްޓޯ އާއި ދައުލަތުގެ ސިޔާސަތުތަކުގެ އަސްލު ވެސް ފެށެނީ އާންމު މީހާގެ ހިޔާލުގެ މައްޗަށެވެ. ނަމަވެސް މިހާތަނާ ޖެހެންދެން ވެސް އާންމު ރައްޔިތު މީހާގެ ހިޔާލު ހޯދުމުގައި ގެންގުޅެފައި ހުރީ ޒަމާނާ ބީރައްޓެހި މެތަޑުތަކެކެވެ. ނަތީޖާއަކަށް ވަނީ އެ އަޑުތައް ގަދަވަނީ ހަމައެކަނި ކެމްޕެއިން ދުވަސްވަރު ކަމަށް ވުމެވެ. ސިޔާސީ ފަރާތްތަކުން ރަށްރަށަށް ކުރާ ދަތުރުތަކާ އެކު އަޑު ކެނޑިގެން ދަނީއެވެ. ހާލަކުން ފަހަރަކު ބަޔަކު ނަގާ ހިޔާލު ހޯދުމުގެ ދިާރސާއަކާ ހަމައިން އެކަން ނިމެނީއެވެ. ސިޔާސަތުތައް ބައްޓަންކުރުމުގަ އާއި ކަންކަން މިނެކިރުމުގައި ދާއިމީ ގޮތެއްގައި އެކަން ކުރެވޭނެ ޕްލެޓް ފޯމެއް ނެތެވެ.

މޯލްޑިވްސް އޮޕީނިއަން ނެޓްވޯކަކީ އޭގެ ހައްލަށޤ މިސްރާބު ޖަހާފައިވާ މީޑިއާއެކެވެ. މޯލްޑިވްސް އޮޕީނިއަންގެ މައިގަނޑު މަގުސަދަކީ ރައްޔިތުން ކަންކަމާ މެދު ދެކޭ ގޮތް އާންމުކޮށް ފެންނާނެ މަގެއް ފަހިކުރުމެވެ. ކުދި ކުދި ކަންކަމުން ފެށިގެން ގޮސް ސިޔާސީ ބޮޑެތި ނިންމުންތަކާއި ބަދަލުތަކާ މެދު އާންމު މީހާ ދެކޭ ގޮތް ބުނެ ދިނުމެވެ. ސިޔާސީ ކަންކަމާއި ވިޔަފާރިތަކާއި، ބްރޭންޑްތަކާއި އާންމު މައްސަލަތަކާއި މިހެން ގޮސް އާންމު ރައްޔިތު މީހާގެ ދިރިއުޅުމާ ގުޅޭ ކޮންމެ ކަމެއްގައި ދެކޭ ގޮތް ބުނެދޭނެ ވަސީލަތަކަށް މޯލްޑިވްސް އޮޕީނިއަން ނެޓްވޯކް ވުމުގެ މަސައްކަތް މިހާރު ވަނީ ފަށާފައެވެ.

advertisement

ފަހަރުގައި ފަށައިގަންނަ އިރު މިއީ އެކަށީގެންވާ މަންޒަރެއް ދައްކުވައިދޭ ކަމަކަށް ނުވި ނަމަވެސް އާންމު ރައްޔިތު މީހާގެ ވިސްނުން ބުނެދިނުމުގެ ފެށުމަކަށް މޯލްޑިވްސް އޮޕީނިއަން ނެޓްވޯކް ވެގެންދާނެކަމުގެ ޔަގީންކަން އެ މީޑިއާ ވުޖޫދަށް ގެނައި އޯކާ މީޑިއާ ގްރޫޕުން ގަބޫލުކުރެއެވެ. މީޑިއާ އާއި މާކެޓިން ދާއިރާގައި ފުންނާބު އުސް އޯކާގެ މައިގަނޑު މަގުސަދަކީ މުސްތަގުބަލުގައި އާންމު ރައްޔިތު މީހާގެ ހިޔާލު ދެނެގަންނާނެ ވަސީލަތެއް އުފަންކުރުމެވެ. ސިޔާސަތުތައް ބައްޓަންކުރާ ފަރާތްތަކަށާއި ބްރޭންޑްތައް މާކެޓްކުރާ ފަރާތްތަކާއި ދިރާސީ ބޭނުންތަކަށް ހިޔާލު ހޯދުމަށް އެކަށޭނަ ޕްލެޓްފޯމެއް ގާއިމުވުމެވެ. ޔުނިވާސިޓީތަކާއި ސިޔާސީ ޕާޓީތަކުގެ މެނިފެސްޓޯތަކާއި މި ނޫން ވެސް އެތައް އެތައް ކަމެއްގައި އާންމު ރައްޔިތު މީހާގެ ވިސްނުން ދެނެގަންނާނެ ވަސީލަތަކަށް މޯލްޑިވްސް އޮޕީނިއަން ނެޓްވޯކް ވެގެންދިއުމެވެ.