Kuda kuhjehge aadheys Raees ah; ulhandhuthah huhtuvaa, Raajje adiah hingaidhaane.

ރިޔާސީ ކެމްޕެއިންގައި މިހާރު ރައީސް އިބްރާހީމް މުހައްމަދު ސޯލިހް ރަށްރަށަށް ކުރެއްވި ކެމްޕެއިން ދަތުރުފުޅުތަކުގައާއި އެ ނޫން ވެސް ސިޔާސީ ހަރަކާތްތަކުގައި ވަރަށް އާންމު މަންޒަރެކެވެ. އެމަނިކުފާނު ފާހަގަކުރެއްވެނީ ކުޑަކުދިންނާ ވަރަށް ގާތްކަން ބަހައްޓަވާ ބޭފުޅެއްގެ ގޮތުގައި މަޑުމައިތިރި މިޒާޖެއްގެ ބޭފުޅަކަށް ވުމުން ކަމަށް ވެސް ވެދާނެއެވެ. މަންޒަރުތަކުން އޯގާތެރި ވެރިއެއްގެ ސިފަތައް ފާހަގަކުރެވެއެވެ. ވެރިކަމަށް ވަޑައިގެންނެވި ފަހުން ވެސް މިފަދަ މަންޒަރުތައް ފެނެއެވެ. އެމަނިކުފާނު ފާހަގަކުރެވެނީ ކުޑަކުދިން ވަރަށް ގަޔާވާ ބޭފުޅެއްގެ ގޮތުގައެވެ. އެހެންކަމުން ކުޑަކުދިންގެ ތަފާތު ހުށަހެޅުންތައް އެމަނިކުފާނަށް އަބަދު ވެސް ލިބެއެވެ. 

ދާދި ފަހުން ހަތް އަހަރުގެ ކުއްޖަކު ރައީސް އަށް ފޮނުވި ސިޓީއެއް ޕްލަސް.އެމްވީ އަށް ވަނީ ލިބިފައެވެ. ޖޭޒްމީން ޝިފާއުގެ ނަމުގައި ރައީސް އަށް އިނގިރޭސި ބަހުން ފޮނުވާފައިވާ ސިޓީގައި އެ ކުއްޖާގެ ވިސްނުން ހުރި މިންވަރުން މުހިންމު މައްސަލަތަކަކަށް އަލިއަޅުވާލާފައި ވެއެވެ. އެއީ ހަތް އަހަރުގެ ކުއްޖެއްގެ ބަސްތައް ކަމުގައިވީ ނަމަވެސް އެއީ ދުނިޔޭގެ ވެސް އަދި ގައުމީ ލެވެލްގައި ވެސް ބަހުސް ކުރެވޭ މައްސަލަތަކެވެ. 

advertisement

ޖޭޒްމީންގެ ފުރަތަމަ އާދޭހަކީ ތޮއްޖެހިފައިމިވާ މާލޭގައި ދުއްވާ އުޅަނދުފަހަރު ހުއްޓުވުމެވެ. އެ ކުޑަކުއްޖާގެ ވިސްނުން ގުޅިފައި ވަނީ އެންޓާޓިކާގެ ބޮޑެތި އައިސްތައް ގިރޭ މައްސަލައަށެވެ. ސަބަބެއް ކަމަށް ބުނެފައި ވަނީ އުޅަނދު ފަހަރުން ނުކުންނަ ގޭސްތަކެވެ. ޖައްވު ހޫނުވެ އެންޓާޓިކާގެ އައިސްތައް ގިރި ކަނޑުގެ ލޮނުގަނޑު އުފުލޭ ނަމަ ރާއްޖެ އަޑިއަށް ހިނގައިދާނެ ކަމަށް މީގެ ކުރިން ތަޖުރިބާކާރުން ވެސް އަންދާޒާކޮށްފައި ވެއެވެ. ލޯބިލޯބި ޖޭޒްމީން ވެސް ބުނަނީ ރާއްޖެ އަޑިއަށް ހިނގައިދާނެ ކަމަށެވެ. 

ރައީސް އަށް ހުށަހެޅި ދެ ވަނަ ކަމެއްގެ ގޮތުގައި އޮތީ އަންހެން ކުދިންނަށް ރައީސްކަން ކުރެވޭ ގޮތަށް ގާނޫނު ބައްޓަންކުރުމެވެ. އޭގެ ސަބަބެއް އަދި ތަފްސީލެއް ޖޭޒްމީން ދީފައެއް ނުވެއެވެ.

ރާއްޖޭގެ ވެރިކަމަށް އަންހެނަކު އައުމަށް ގާނޫނުއަސާސީގައި ހުރަހެއް ނެތެވެ. ނަމަވެސް އެއީ ވަރަށް ބޮޑަށް ހިޔާލު ތަފާތު ވެފައި އޮތް މައްސަލައެކެވެ. ހާއްސަކޮށް ދީނީ އިލްމުވެރިންގެ މެދުގައެވެ. އަންހެނަކަށް ވެރިކަމަށް ނާދެވޭނެ ކަމަށް ކުޑަކުޑަ ޖޭޒްމީންގެ ސިކުނޑި އަށް ވިސްނިފައި އޮތީ ފަހަރުގައި ސިޔާސީ މައިދާނުގަ އާއި އެ ނޫން ވެސް ދާޢިރާތަކުގައި އަދިވެސް އަންހެނުންނަށް ހުރި ހުރަސްތައް ގިނަވުމާއި ދައުރު ހަނިވުމުން ކަމަށް ގަބޫލުކުރެވެއެވެ. އަންހެނުން ބާރުވެރިކުރުވުމަށް ގިނަ މަސައްކަތްތަކެއް މިހާރު ވެސް އަންނަނީ ކުރެވެމުންނެވެ. އެ ގޮތުން އަންނަ އަހަރު ބާއްވާ ލޯކަލް އިންތިހާބަކީ އާ ބާބެއް ލިޔެވޭނެ އިންތިހާބެކެވެ. އަންހެނުންނަށް ހާއްސަ  ގޮނޑިތަކެއް ކަނޑައެޅިފައިވާ އިރު ރައްޔިތުންގެ މަޖިލީހުގައި ވެސް އަންހެނުންނަށް ހާއްސަ ގޮނޑި ކަނޑައެޅުމަށް ބައެއް ފަރާތްތަކުން މިހާރު ވެސް ވަކާލާތު ކުރެއެވެ. ބެލެވޭ ގޮތުގައި ޖޭޒްމީންގެ ވިސްނުމުގެ މިސްރާބަކީ އަންހެނުންނަށް ވެރިކަމަށް އައުމަށް ނުވަތަ ސިޔާސީ ނުފޫޒު ގަދަ މަގާމުތަކަށް އައުމަށް ހުރި ގޮންޖެހުންތައް ކުޑަކޮށް ހުރަސްތައް ނައްތާލުމެވެ. 

ތިން ވަނަ ކަމަކަށް ރައީސްގެ އަރިހުން ޖޭޒްމީން އެދެނީ ހިއްކައިގެން ރަށްތައް ނުހެދުމަށެވެ. މިިއީ ވެސް ތިމާވެށީގެ ބޮޑެތި މައްސަލަތަކާ މެދު ޖޭޒްމީންގެ ވިސްނުން ހުރި ގޮތެވެ. ކަނޑުތަކާއި ފަޅުތައް ހިންގައިގެން ރަށްތައް ހެދުމުގެ ނުރަނގަޅު ނަތީޖާ މިހާރު ވެސް ދަނީ ފެންނަމުންނެވެ. ރަށްތައް ގިރުމާއި ފަރުތައް ހަލާކުވެ އެންވެރިކަން ދަށްވުމާއި މި ނޫންވެސް ތިމާވެއްޓާ ގުޅުން ހުރި ގިނަ މައްސަލަތަކެއް ކުރިމަތިވަމުންދާކަން އެއީ ފެންނަން އޮތް ހަގީގަތެކެވެ.

އިނގިރޭސި ބަހުން ޖޭޒްމީން ހުށަހެޅީ ގައުމީ ފެންވަރުގައި ބަހުސްކުރެވޭ ބޮޑެތި މައްސަލަތަކެވެ. ކުރުކޮށް ފޮނިކޮށް ވިޔަސް މި މައްސަލަތަކަކީ ސިޔާސީ މައިދާނުގައި ވެސް ވަރުގަދަ ބަހުސްކުރެވޭ ކަންކަމެކެވެ. ބައިނަލްއަގުވާމީ ފެންވަރުގައި ވާހަކަ ދައްކައި ހައްލު ހޯދަންޖެހިފައިވާ ކަންކަމެވެ. މި ކަންކަމަކީ ރައީސް ސޯލިހަށް އެކަނި ޖަވާބު ދެއްވޭ ވަރަށް ވުރެ ބޮޑެތި މައްސަލަތަކެކެވެ. މިއީ މަޝްވަރާ އަށް ހުޅުވާލެވޭނެ ސިޓީއެކެވެ.