ކޮވިޑް 19؛ އުންމީދީ ހަފްތާއެއް!

މާލެ ފުލް ލޮކްޑައުންއަކަށް ފަހު ހުޅުވާލުމާ ގުޅިގެން ކޮވިޑް-19 ޖެހޭ މީހުންގެ އަދަދުތައް މަތީގައި އުޅޭތާ ދުވަސްތަކަކަށް ފަހު ނިމިދިޔަ ހަފުތާއަކީ އުންމީދީ ހަފްތާއެކެވެ. އެވްރެޖްކޮށް ދުވާލަކު 200 އާ ގާތްކުރާ އަދަދަކަށް މީހުން ޕޮޒިޓިވް ވަމުން އައިސް ނިމިދިޔަ ހަފުތާގައި މި އަދަދު ވަނީ 100 އަށް ވުރެ ދަށަށް ގޮސްފައެވެ.

ލޮކް ޑައުން އަަށް ފަހު ކޭސްތައް އިތުރުވާން ފެށުމާ ގުޅިގެން ހެލްތު ޕްރޮޓެކްޝަން އެޖެންސީން ވަނީ ބައެއް ފިޔަވަޅުތައް ވަރުގަދަކޮށްފައެވެ. އެ ގޮތުން ރޭގަނޑު 8:00 އިން ފަތިހު 5:00 އަށް ވެހިކަލް ދުއްވުން މަނާކުރުމާއި ރޭގަނޑު 10:00 އިން ކާފިއު ހިންގުން ހިމެނެއެވެ. އަދި ފަސް މީހުންނަށް ވުރެ ގިނައިން އެއްތަނަކަށް އެއްވެ އުޅުން ވެސް ވަނީ މަނާކޮށްފައެވެ. މި ފިޔަވަޅުތަކުގެ އަސަރު ފެންނަން ދުވަސްކޮޅެއް ނަގާފައިވާ އިރު ނިމިދިޔަ ހަފުތާގައި ކޭސްތައް ވަނީ ދަށަށް ދާން ފަށާފައެވެ.

advertisement

ތަފާސް ހިސާބުތަކަށް ބަލާއިރު މި ފިޔަވަޅުތައް އެޅުމުގެ ކުރީ ހަފުތާގައި ޕޮޒިޓިވްވި މީހުންގެ އަދަދު އުޅެނީ 1،000 އަށް ވުރެ މަތީގައެވެ. ނަމަވެސް އޭގެ ފަހުން 800 އަށް ދަށަށް ދިޔައެވެ. އަދި ނިމިދިޔަ ހަފުތާގައި މި އަދަަދު 900 ގައި އުޅޭ އިރު ފާއިތުވި ފަސް ދުވަހު ވެސް ޕޮޒިޓިވް ވެފައި ވަނީ ދުވާލަކު 100 އަށް ވުރެ މަދުންނެވެ.

ކޮމިއުނިޓީ ސްޕްރެޑް ދެނެގަތުމުގައި އާންމުކޮށް ބަލާ އެއް މިންގަނޑު ކަމަށްވާ އަންލިންކްޑް ނުވަތަ ގުޅުން ނެތް ކޭސްތަކުގެ އަދަދު ވެސް ފާއިތުވި ހަފުތާތަކުގައި ވަނީ ދަށަށް ގޮސްފައެވެ. ޖުލައި މަހުގެ ތެރެގައި އެވްރެޖްކޮށް 50 ގައި ހުރި މި އަދަދު މިދިޔަ ހަފުތާގައި ހުރީ 30 ގައެވެ.

އެޗްޕީއޭ އިން އާންމުކޮށްފައިވާ މައުލޫމާތުތަކަށް ބަލާއިރު އުންމީދުތަކެއް ލިބިގެން ދިޔަ ނަމަވެސް މިއަދަދު މައްޗަށް ހިނގައިދާނެކަމުގެ ބިރު އަދި ވެސް ބޮޑެވެ. ހާއްސަކޮށް މާލޭގައި ބާއްވާ ސިޔާސީ އެއްވުންތަކުގެ ސަބަބުން ޕޮސިޓިވްވާ އަދަދު މައްޗަށް ދިޔުމުގެ ފުރުސަތު އޮތް އިރު މިއަދު ވެސް ވަނީ އެފަދަ އެއްވުމެއް ބާއްވާފައެވެ. މީގެ ކުރިން އެފަދަ އެއްވުމެއް ބޭއްވި ފަހުން ވެސް މާލޭގައި ކޮވިޑްގެ ބިރުވެރިކަން އިތުރުވެ ގިނަ ބަޔަކަށް ކޮވިޑް ޖެހެން މެދުވެރިވިއެވެ. އެހެން ކަމުން އެ އެއްވުންތައް މެދު ވެސް ކަނޑައިލިއެވެ. ނަމަވެސް އަނެއްކާ ވެސް ސައިކަލް ބުރުތަކާއި މުޒާހަރާތައް ފެށުމާ އެކު ކޮވިޑް ފެތުރުން ބޮޑުވެގެން ދިޔައެވެ. އަދި މިއަދު ބޭއްވި އެއްވުމަށް ފަހު މި އަދަދުތައް އިތުރުވެދާނެ ކަމަށް ބެލެވެއެވެ. މި އެއްވުމުގައި ހައި ރިސްކް ކެޓަގަރީގެ މީހުންނާއި އުމުރުން ދުވަސްވީ މީހުން ވެސް ބައިވެރިވެފައިވަތީ ބަލި ބޮޑުވެ އެޑްމިޓްކުރަންޖެހޭ މީހުންގެ އަދަދު ވެސް އިތުރުވުމުގެ ބިރު އެބަ އޮތެވެ.

ކޭސްތައް ގިނަވާ ނަމަ ރާއްޖެ ބޭރުގެ ދުނިޔެއަށް ހުޅުވާލުމަށް ކުރާ މަސައްކަތަށް އިތުރު ހުރަސްތަކެއް ކުރިމަތިވާނެ އެވެ. ބައެއް ގައުމުތަކުން މިހާރު ރާއްޖެ އަށް ދަތުރުތައް ފަށާފައިވީ ނަމަވެސް ގިނަ ގައުމުތަކުން ހުއްދަ ނުދީ ވަނީ ދުވާލެއްގެ މައްޗަށް ކޮވިޑް ޖެހޭ ނިސްބަތް ދަށަށް ނުދާތީއެވެ. ގައުމުތަކުން ހުއްދަ ދިނުމުގައި ބޮޑަށް ބަލަނީ ޓެސްޓްކުރާ އަދަދުން ޕޮސިޓިވްވާ ނިސްބަތް ދަށަށް ދިޔުމެވެ. ރާއްޖޭގެ މުޅި އިގްތިސާދު ޓުއަރިޒަމަށް ބަރޯސާވެފައިވާ އިރު ޓުއަރިސްޓުން އަންނަ މިންވަރު އިތުރުކުރުމަށްޓަކައި ގިނަ ގައުމުތަކުން މީހުން އައުމުގެ ހުއްދަ ލިބުން މުހިންމެވެ. ފްލައިޓްތައް އިތުރުވާން އޮތީ ޕޮޒިޓިވްވާ ނިސްބަތް އަދިވެސް ދަށް ކުރެވިގެންނެވެ.