“އިންޑިއާ އައުޓް” ނަޝީދު ސިފަކުރައްވަނީ ހަރުކަށި ހަރަކާތެއްގެ ގޮތުގައި!

އިންޑިއާ ދެކޮޅަށް ރާއްޖޭގެ އިދިކޮޅު ފަރާތްތައް އިސްވެ އޮވެ ފެށި “އިންޑިއާ އައުޓް” ހަރަކާތަކީ ހަރުކަށި ފިކުރުގެ މީހުން އެކަމުގެ ފަހަތުގައި ތިބެގެން ހިންގާ ހަރަކާތެއް ކަމަށް ކުރީގެ ރައީސް އަދި މަޖިލީހުގެ މިހާރުގެ ރައީސް މުހައްމަދު ނަޝީދު ވިދާޅުވެއްޖެއެވެ.

އެމްޑީޕީގެ ގައުމީ މަޖިލީހުގެ ވަޓްސްއަޕް ގްރޫޕަށް ފޮނުއްވި މެސެޖެއްގައި ރައީސް ނަޝީދު ވިދާޅުވެފައި ވަނީ ހަރުކަށި ފިކުރުގެ މީހުން އިންޑިއާއާ ދެކޮޅަށް ހިންގާ އެ ހަރަކާތަށް ޕީޕީއެމުން ޖާގަ ދޭ ކަމަށެވެ. އަދި އެމްޑީޕީގެ ވެރިކަމުގައި އެމަނިކުފާނުގެ ނައިބަކަށް ހުންނެވުމަށް ފަހު ފަހުން ވެރިކަމާ ހަވާލުވެވަޑައިގެންނެވި ޑރ. މުހައްމަދު ވަހީދު ހަސަން މަނިކު ވެސް އޭގެ ނާޖާއިޒު ފައިދާ ނަންގަވަމުން ގެންދަވާ ކަމަށް ރައީސް ނަޝީދު ތުހުމަތުކުރެއްވިއެވެ. އެކަން އެމަނިކިފަނު ސިފަކުރައްވާފައި ވަނީ ވަރަށް ދަށު ދަރަޖައިގެ ކަމެއްގެ ގޮތުގައެވެ.

advertisement

ސަރުކާރާ ދެކޮޅަށް އިއްޔެ ހަވީރު ސައިކަލު ބުރެއް ކުރިއަށް ދަނިކޮށް ވަޓްސްއަޕް ގްރޫޕަށް ފޮނުއްވި މެސެޖްގައި ރައީސް ނަޝީދު ވިދާޅުވީ ހަރުކަށި ފިކުރުގެ މީހުން ބޭނުންކޮށްގެން ހިންގާ އެ ހަރަކާތަކީ ރާއްޖޭގެ މިނިވަންކަން އެންމެ އަވަހަށް ގެއްލޭނެ ކަންތައް ކަމަށެވެ. އަދި އެއީ އައިއެސް އިން ރާއްޖެ ހިފުމުގެ ޕްލޭނެއް ކަމަށް ވެސް އެމަނިކުފާނު ތުހުމަތު ކުރެއްވިއެވެ.

ކޮވިޑް-19 ފެތުރެމުންދާ މި ދަނޑިވަޅުގައި އެޗްޕީއޭގެ ގައިޑްލައިންތަކާ ހިލާފަށް އިއްޔެ ބޭއްވި ސައިކަލް ބުރާ ގުޅިގެން ފުލުހުން ވަނީ 41 މީހަކު ހައްޔަރުކޮށްފައެވެ. އެ ހަރަކާތަކީ އިދިކޮޅުން ރޭވި ހަރަކާތެއް ނޫން ކަމަށް އެ ޕާޓީން ބުނި ނަމަވެސް އެ ހަރަކާތް ފެށުނު އިރު ކުރީ ސަފުން އިދިކޮޅު އިސް ބޭފުޅުން ފެނިގެން ގޮސްފައި ވެއެވެ.

ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެންބަރު އަހްމަދު ޝިޔާމް މީޑިއާތަކަށް ވިދާޅުވެފައި ވަނީ އެ ހަރަކާތުގެ މައުލޫމާތު ލިބުނީ ދެ ދުވަހެއް ކުރިން ފުލުހުންގެ ފަރާތުން ކަމަށެވެ. އަދި އެ ހަރަކާތުގައި ބައިވެރިވާން ނިންމައި އެކަން ފުލުހުންނަށް ވެސް އެންގި ކަމަށް ޝިޔާމް ވިދާޅުވިއެވެ. ނަމަވެސް އެއީ ފަރުދީ ހައިސިއްޔަތުން ކަމަށް ވެސް ޝިޔާމް ވިދާޅުވެފައި ވެއެވެ.

އިދިކޮޅު ފަރާތްތަކުން މީގެ ކުރިން ބޭއްވި ސައިކަލް ބުރަކާ ގުޅިގެން ޕީއެންސީ އާއި ޕީޕީއެމް ކޮންމެ ޕާޓީއެއް 75،000ރ. އިން ވަނީ ޖޫރިމަނާކޮށްފައެވެ. އަދި އެޗްޕީއޭގެ ގައިޑްލައިންތަކާ ހިލާފުވުމުން ޕޮލިހަށް ހާޒިރުކޮށް އިދިކޮޅު ބައެއް ފަރާތްތައް ޖޫރިމަނާކޮށްފައި ވެސް ވެއެވެ. އިއްޔެގެ އެއްވުން ބާއްވާފައި ވަނީ ސިއްހީ ކުއްލި ނުރައްކަލުގެ ހާލަތު އިއުލާނުކޮށްފައިވާ މި ދަނޑިވަޅުގައި އެޗްޕީއޭގެ ގައިޑްލައިންތަކާ ހިލާފަށް ގިނަ ބަޔަކު އެއްވެ ހަރަކާތް ހިންގާ ނަމަ ފިޔަވަޅު އަޅާނެ ކަމަށް ފުލުހުން އިންޒާރު ދީފައި ވަނިކޮށެވެ. ފުލުހުން ވަނީ ސައިކަލް ބުރު ހުއްޓުވައި ގިނަ ބަޔަކު ހައްޔަރުކޮށް ބައެއް ވެހިކަލްތައް ޓޯކޮށްފައެވެ.