ރާއްޖޭގެ ރައްޔިތުންގެ ތަރައްޤީއަށް ކުރަންޖެހޭ ކޮންމެ ކަމެއް އަޅުގަނޑުމެން ކުރާނަން: ޝާހިދު

މި ސަރުކާރުން ކުރަމުން އަންނަނީ ރާއްޖޭގެ ރައްޔިތުންނަށް ފައިދާހުރި މަސައްކަތްތަކެއް ކަމަށާއި ރާއްޖޭގެ ރައްޔިތުންގެ ތަރައްޤީއަށް ކުރަންޖެހޭ ކޮންމެ ކަމެއް ސަރުކާރުން ކުރާނެ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.

އިންޑިއާގެ ހިލޭ އެހީގައި މ. ކޮޅުފުށީގައި މަގު ބައްތި ހަރުކުރުމަށް ހިންގި މަޝްރޫއުގެ ނިމުން ފާހަގަކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ޝާހިދު ވިދާޅުވީ އިންޑިއާ އާއި ރާއްޖެއާ ދެމެދު އޮތީ ވަރަށް ހާއްސަ ގުޅުމެއް ކަމަށާއި އެއީ ދެ ޤައުމުގެ ރައްޔިތުންގެ މެދުގަ އޮތް ގުޅުމެއް ކަމަށެވެ. އެއީ ދެ ޤައުމުގެ ރައްޔިތުންގެ ހިތާ ހިތާ ގުޅިފަ އޮތް ގުޅުމެއް ކަމަށާއި އެކަން ޤަބޫލު ނުކުރެވިގެން އުޅޭ ބަޔަކީ މި ސަރުކާރުން ހިންގަވާ ތަރައްޤީގެ މަޝަރޫޢުތައް ފެނި އެކަމަށް ހިތްދަތިވާ ފަރާތްތައް ކަމަށް ވެސް ޝާހިދު ވިދާޅުވިއެވެ.

advertisement

“އެކަން މިއަދުގެ ޒަމާނީ އިބާރާތުން ދަންނަވާކަމަށްވަންޏާ، ހަޖަމް ނުކުރެވޭ ފަރާތްތައް. އަޅުގަނޑުމެން އެފަރާތްތަކުން ދައްކާ ވާހަކައަކަށް ބަލާކަށް ނުތިބޭނަން….ރާއްޖޭގެ ރައްޔިތުންނަށް ބޭނުންވާ ހުރިހާކަމެއް އިރާދަކުރެއްވިއްޔާ، މިއަދުގެ ސަރުކާރުން،  ރައީސް އިބްރާހިމް މުޙައްމަދު ޞާލިހުގެ ސަރުކާރުން ކޮށްދޭނަން،” މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ މި ސަރުކާރުން ހިންގަމުން އަންނަ ތަރައްގީގެ މަޝްރޫއުތައް ރާއްޖޭގެ އެންމެ އުތުރުން އެންމެ ދެކުނަށް ބަލާލުމުން ފެންނާނެ ކަމަށާއި ކޮންމެ ރަށެއް އަދި ކޮންމެ އަތޮޅެއްގައި ހިނގަމުން އަންނަ ޕްރޮޖެކްޓްތައް ނިމެމުން އަންނަތަން ފެންނަ ކަމަށެވެ.

“ކުދި ޕްރޮޖެކްޓްތައް، އެއީ މަގު ބައްތިޖެހުންކަމުގައި ވިއަސް، ބަނދަރު ހެދުން، ސްކޫލް އެޅުން، ފެނާއި ނަރުދަމާގެ މަސައްކަތް، މިހިރަ ކަންތައްތައް އެހެރަދަނީ ހިނގަމުން. މެދު ނުކެނޑި ހިނގަމުން. މުޅި ދުނިޔެ ކޮވިޑްގެ ނުރައްކާތެރި ވަބާގައި އޮތްއިރުވެސް އެއްވެސް މަޝްރޫއަކަށް މަޑުޖެހިލުމެއް ނެތި ކުރިއަށް އެހެރަދަނީ ވަރަށް ހަލުއި ސްޕީޑެއްގަ،” މިނިސްޓަރު ވިދާޅުވިއެވެ.

ޝާހިދު ވިދާޅުވީ ބޮޑެތި ޕްރޮޖެކްޓްތައް ވެސް އަންނަނީ ތައްޔާރުވަމުން ކަމަށާއި އެ ގޮތުން އައްޑޫ އަތޮޅުގެ މަގުތައް ތަރައްގީކުރުމުގެ މަޝްރޫއު ލަހެއްނުވެ އަމަލީ މަސައްކަތްތައް ފެށިގެންދާނެ ކަމަށެވެ. މީގެ އިތުރުން ގްރޭޓާ މާލެ ކަނެކްޓިވިޓީ ޕްރޮޖެކްޓްގެ ގޮތުގައި އޮތް، މާލެ އާއި ވިލިނގިއްޔާ ތިލަފުށި ގުޅާލުމަށް ރާއްޖޭގައި ހިނގާ އެންމެ ބޮޑު މަޝްރޫއު ވެސް ލަހެއް ނުވެ ފެށިގެން ދާނެ ކަމަށެވެ،. އެ މަސައްކަތަށް ވާންޖެހޭ ތައްޔާރީތަކުގެ އަމަލީ މަސައްކަތް މިހާރު ވަނީ ފަށާފައެވެ. މިއީ ވެސް އިންޑިއާގެ އެހީގައި ހިންގާ ބިޔަ މަޝްރޫއެކެވެ. މި މަޝްރޫއުގެ ދަށުން ގުޅިފަޅުގައި ވިޔަފާރި ބަދަލު ތަރައްގީކޮށް ބަނދަރާއި ވިލިމާލެ އަދި މާލެ ގުޅުލުމަށް ބްރިޖެއް އެޅުމަށް ވަނީ ހަމަޖައްސާފައެވެ. މިއީ ވިޔަފާރީގެ މަސައްކަތަކާއި ބޯހިޔާވަހިކަމަށް ވެސް ބިން ހާއްސަކުރެވޭނެ ބޮޑު މަޝްރޫއެކެވެ.

މިނިސްޓަރު ވިދާޅުވީ ރާއްޖޭގައި ކެންސަރުގެ ބައްޔަށް ބޭސްކުރާ ފަރާތްތަކުން އެއުފުލަމުން ގެންދާ ހިތްދަތިކަމަށް ހައްލެއް ގެނައުމުގެ ގޮތުން، ހުޅުމާލޭގައި ކެންސަރަށް ޙާއްސަ ކޮށްގެން އަޅާ ހޮސްޕިޓަލެއްގެ މަސައްކަތް ވެސް މިއަހަރުގެ ތެރޭގައި ފެށޭ ހިސާބަށް މިހާރު ގޮސްފައިވާ ކަމަށެވެ.

“ހަނިމާދޫ އެއާރޕޯޓް ހެދެނީ. އަދި މި ނޫންވެސް ތަރައްޤީގެ އެތައް އެތައް ކަމެއް މެދުނުކެނޑި ކުރިއަށް ގެންދެވުމުގެ ރޭވުންތައް ރޭވިގެން މިަދަނީ. މި ފުރުސަތުގައި، މިފަދަ ބޮޑެތި މަޝްރޫއުތަކާ، މިއަދު މިނިމުނު ފަދަ ކުދިކުދި މަޝްރޫޢުތަކަށް ވެސް އިންޑިއާގެ ސަރުކާރުން އެދެއްވާ އެހީތެރިކަމަށްޓަކައި އިންޑިއާގެ ބޮޑު ވަޒީރަށާއި، އިންޑިއާ ސަރުކާރުގެ ވެރީންނަށް، ޙާއްސަގޮތެއްގައި ޙާރިޖީ ވަޒީރު، ޑރ. ޖައެޝަންކަރު، އަޅުގަނޑު އިޙްލާސްތެރި ޝުކުރެއް ދަންނަވަން. އަދި އިންޑިއާއިން ރާއްޖޭގައި މިހުންނަވާ ސަފީރާ އެމަނިކުފާނުގެ އަރިހުގައި މަސައްކަތް ކުރައްވާ ހީވާގި ޓީމަށް ވެސް އަޅުގަނޑު ޝުކުރު ދަންނަވަން،” ޝާހިދު ވިދާޅުވިއެވެ. މި ސަރުކާރު އައި ފަހުން އިންޑިއާގެ އެހީގައި ގިނަ މަޝްރޫއުތަކެއް ހިންގަމުން އަންނަ އިރު ފެށުމަށް ތައްޔާރުވަމުން އަންނަ އިރު އިދިކޮޅު ފަރާތްތަކުން ގެންދަނީ އިންޑިއާއާ ދެކޮޅަށް އަޑު އުފުލަމުންނެވެ. އަދި އިންޑިއާގެ ދެ ހެލިކޮޕްޓަރު އޮޕަރޭޓްކުރަން ރާއްޖޭގައި އިންޑިއާގެ ސިފައިން ތިބޭތީ އެކަމާ ދެކޮޅަށް “އިންޑިއާ އައުޓް”ގެ ނަމުގައި ކެމްޕެއިނެއް ދަނީ ހިންގަމުންނެވެ.