August mahu MIRA in 1.71 Billion ruffiya balaiganefi

މިއަހަރުގެ އޮގަސްޓް މަހު މޯލްޑިވްސް އިންލޭންޑް ރެވެނިއު އޮޓޯރިޓީ، މީރާއަށް 1.71 ބިލިއަން ރުފިޔާ ބަލައިގަނެފިއެވެ. މި އަދަދަކީ 2019 ވަނަ އަހަރުގެ މި މުއްދަތުގައި ލިބުނު އާމްދަނީއަށްވުރެ 97.6 އިންސައްތަ އިތުރު އަދަދެއްކަމަށް މީރާއިން ބުނެއެވެ.

މީރާއިން ބުނީ މިދިޔަ އަހަރުގެ އޮގަސްޓް މަހާއި އަޅާބަލައިރު މިއަހަރުގެ އޮގަސްޓް މަހު މީރާއަށް ލިބުނު އާމްދަނީ އިތުރުވެފައިވަނީ މިއަހަރުގެ 2 ވަނަ ކުއާޓަރުގެ ގިނަ ސުންގަޑިތަކެއް ކޯވިޑް19 އާއި ގުޅިގެން އޮގަސްޓް މަހަށް ބަދަލުކޮށްފައިވުމުންކަމަށެވެ.

advertisement

އޮގަސްޓް މަހު މީރާއަށް ބަލައިގަތް އެންމެ އާމްދަނީގެ އެންމެ ބޮޑުބައެއް ހިއްސާކުރަނީ އާމްދަނީން ނަގާ ޓެކުހެވެ. އާމްދަނީ ނަގާ ޓެކުހުގެ ގޮތުގައި 783.76 މިލިއަން ރުފިޔާ ވަނީ ލިބިފައެވެ. ދެން އެންމެ ބޮޑު އާމްދަނީއެއް ލިބިފައިވަނީ ބީޕީޓިއިންނެވެ. އެއީ 474.57 މިލިއަން ރުފިޔާއެވެ. މީގެއިތުރުން ޖީއެސްޓީގެ ގޮތުގައި 293.91 މިލިއަން ރުފިޔާ، ލީސް ޕީރިއަޑް އެކްސްޓެންޝަން ފީގެ ގޮތުގައި 76.93 މިލިއަން ރުފިޔާ، ރެސިޑެންޝަލް ޕަރމިޓްގެ ގޮތުގައި 21.49 މިލިއަން ރުފިޔާ އަދި އެހެނިހެން ޓެކުހާއި ފީގެ ގޮތުގައި 54.96 މިލިއަން ރުފިޔާ ލިބިފައިވާކަމަށް މީރާއިން ބުނެއެވެ.

އޮގަސްޓް މަހު މީރާއަށް ބަލައިގަނެފައިވާ އާމްދަނީގެ ތެރޭގައި 21.67 މިލިއަން އެމެރިކާ ޑޮލަރު ހިމެނެއެވެ.