އަމާޒަކީ އޮންލައިންކޮށް ރާއްޖެ އިޝްތިހާރުކުރުމަށް ހިންގާ ހަރަކާތްތައް ވަރުކަދަކުރުން – ތޮއްޔިބު

އަމާޒަކީ އޮންލައިންކޮށް ރާއްޖެ އިޝްތިހާރުކުރުމަށް ހިންގާ ހަރަކާތްތައް ވަރުކަދަކުރުންކަމަށް އެމްއެމްޕީއާރުސީގެ މެނޭޖިންގ ޑިރެކްޓަރ ތޮއްޔިބު މުޙައްމަދު ވިދާޅުވެއްޖެއެވެ.

އެމްވީ ޕްލަސްއަށް ދެއްވި ޙާއްސަ އިންޓަވިއުއެއްގައި ތޮއްޔިބު ވިދާޅުވީ، ކޯވިޑް19 އާއިއެކު ރާއްޖެ އިޝްތިހަރުކުރުމަށް ހިންގާ ކެންޕެއިންތައް ކުރަމުންއައިގޮތްތައްވެސް ބަދަލުކުރަންޖެހިފައިވާކަމަށެވެ. އެމްއެމްޕީއާރުސީގެ މަސައްކަތްތަކާއި ހަވާލުވިފަހުން އޮންލައިން ހަރަކާތްތައް ވަރުގަދަކުރުމަކީ އަމާޒެއްކަމަށާއި، ކޯވިޑް19 ގެ ސަބަބުން މިކަން ހާސިލްކުރުމަށް މަގުފަހިވެގެންދިޔަކަމަށެވެ. އެގޮތުން މިހާރު ރާއްޖެއން ބޭރުގެ ބޮޑެތި ކުންފުނިތަކާއި ގުޅިގެން ރާއްޖެ އިޝްތިހަރުކުރުމުގެ ބޮޑެތި މަސައްކަތްތައް އެމްއެމްޕީއާރުސީން ކުރަމުންއަންނަކަމަށެވެ. ރާއްޖެ އިޝްތިހާރުކުރުމަށް ކުރަމުން އަންނަ މަސައްކަތްތަކުގެ 90 އިންސައްތަ މަސައްކަތްތަތަކީ މިހާރު އޮންލައިންކޮށް ކުރަމުންއަންނަ މަސައްކަތްތަކެއްކަން ތޮއްޔިބު ވަނީ ވިދާޅުވެފައެވެ.

advertisement

އެމްއެމްޕީއާރުސީގެ ޕްލެޓްފޯމްތަކާއި އެހެން ފަރާތްތަކުގެ ޕްލެޓްފޯމްތައް ބޭނުންކޮށްގެންވެސް ރާއްޖެ އިޝްތިހާރުކުރުމުގެ މަސައްކަތް މިހާރު ކުރިއަށްދާކަމަށް އޭނާ ވިދާޅުވިއެވެ. އެގޮތުން އެކިއެކި ޓުއަރ އޮޕަރޭޓަރުންނާއި، އެއަރލައިންތަކާއި ގުޅިގެން އެމީހުންގެ ޕްލެޓްފޯމްތަކުގައިވެސް މިހާރު ރައްޖެ އިޝްތިހާރުކުރުމުގެ މަސައްކަތް ކުރަމުންދާކަމަށް ތޮއްޔިބު ވިދާޅުވިއެވެ. އެމީހުންގެ ސޯސަލް މީޑިއާ ހޭންޑަލްސްތައް ބޭނުންކޮށްގެން ވަރަށް ބޮޑެތި ކެންޕެއިންތައް ހިންގަމުންއަންނަކަމަށާއި، މިމަހުގެ ތެރޭގައި ސްކައި ސްކޭނަރ ފަދަ މީހުންނާއި އެއްކޮށް ކެންޕެއިންތަކެއް ފެށިގެންދާނެކަމަށް ތޮއްޔިބު ވިދާޅުވިއެވެ.

“އަޅުގަނޑު މި މަޤާމަށް ހަވާލުވިފަހުން ވަރަށް ވިސްނާކަމެއް ޑިޖިޓަލްއާއި އޮންލައިން ޕްރެސެންސް ވަރުގަދަކުރުން. އެހެންނަމަވެސް ކުރަން ބޭނުންވާ ހުރިހައިކަމެއް އެއްފަހަރަކާ ނުވެސްވާނެ. އަޅުގަނޑަށް ތަންކޮޅެއް ފަހަށް ބަހައްޓާލާފައި ހުރި މަސައްކަތްތަކުގެ ތެރޭގައި ހުރި އެއް މަސައްކަތް މި ޕެންޑަމިކްގެ ތެރޭގައި ފަށައިގަތުމުގެ ފުރުސަތު އެ ލިބުނީ. މިހާރު ހަމަ 90 އިންސައްތައަކީ އަޅުގަނޑުމެންގެ ޑިޖިޓަލް ނޫނީ އޮންލައިން ޕްލެޓްފޯމްގައި މިދަނީ.” ތޮއްޔިބު ވިދާޅުވިއެވެ.

ތޮއްޔިބު ވިދާޅުވީ ރާއްޖެ އަންނަ ފަތުރުވެރިންނަށް ރާއްޖެއަކީ ރައްކާތެރި މާހައުލެއްކަން ކަށަވަރުކުރުމުގެ ގޮތުންވެސް ގިނަ ފިޔަވަޅުތަކެއް މިހަރު އެޅިފައިވާކަމަށެވެ. އެގޮތުން ރާއްޖެއަންނަ ފަތުރުވެރިން ރާއްޖެ އައުމުގެ 72 ގަޑިއިރު ކުރިން ޕީސީއާރު ނެގެޓިވް ޓެސްޓެއް ހެދުން އޭނާ ފާހަގަކުރެއްވިއެވެ. އަދި ރާއްޖެއިން ފުރުމުގެ ކުރިން ޕީސީއާރު ޓެސްޓް ހެދުމުގެ އިންތިޒާމްވެސް ރާއްޖޭގެ އެކި ކަންކޮޅުތަކުގައި ރޭވިފައިވުމަކީވެސް ފަތުރުވެރިންގެ ރައްކާތެރިކަމާއި، ރާއްޖެ އަންނަ ފަތުރުވެރިންގެ އަދަދު އިތުރުކުރުމަށް އެޅިފައިވާ ފިޔަވަޅެއްކަމަށް އޭނާ ވިދާޅުވިއެވެ.

“ފާހަގަކޮށްލެވޭ އެންމެ ބޮޑުކަމަކީ ފަތުރުވެރިންނަށްޓަކައި ފުރުމުގެ 72 ގަޑިއިރު ކުރިން އޮންނަ ޕީސީއާރު ނެގެޓިވް ޓެސްޓެއްގެ ކަންކަން. ދެން ހަމަ އެހެންމެ ހެލްތް ޑިކްލަރޭޝަން ފޯމު. އެއާއިއެކު ރާއްޖެއަށް އައުމާއިއެކު ވީހާވެސް އަވަހަށް އެމީހުންގެ ހުރިހައިކަމެއް އެއަރޕޯޓްގެ ތެރެއިން ނިންމައި އެބަޔަކު ދާންބޭނުންވާ ރިސޯޓެއްވިއަސް، ސަފާރީ ބޯޓެއް ވިއަސް ދިއުމަށް އެޅިފައިވާ ފިޔަވަޅުތައް. ފުރުމުގެ ކުރިން ބައެއް ޤައުމުތަކުން އެބަ ބޭނުންވޭ ނެގެޓިވް ޕީސީއާރު ޓެސްޓެއް. އެ ޓެސްޓް ހެދުމުގެ އިންތިޒާމްވެސް ރާއްޖޭގެ އެކި ކަންކޮޅުތަކުގައި ވަނީ ރޭވިފައި.” ތޮއްޔިބު ވިދާޅުވިއެވެ.

ތޮއްޔިބު ވިދާޅުވީ، ކޯވިޑަށް ވެކްސިންއެއް ލިބިއްޖެނަމަ އަންނަ އަހަރު ކުރީގެ އަހަރުތަކަށްވުރެ މާ ރަނގަޅަށް ރާއްޖޭގެ ފަތުރުވެރިކަން ރިކަވަރވެގެންދާނެކަމަށް އުންމީދުކުރެވޭކަމަށެވެ.