ބީއެމްއެލްގެ ޑެބިޓް އަދި ކްރެޑިޓް ކާޑުތަކުން ރާއްޖޭން ބޭރުގެ މުއާމަލާތްތައް ކުރެވޭނެ އަދަދުތައް މަދުކޮށްފި

ބޭންކް އޮފް މޯލްޑިވްސް (ބީއެމްއެލް) ގެ ޑެބިޓް އަދި ކްރެޑިޓް ކާޑުތަކުން ރާއްޖޭން ބޭރުގެ މުއާމަލާތްތައް ކުރެވޭނެ އަދަދުތައް މަދުކޮށްފި އެވެ. ބީއެމްއެލްއިން ބުނީ މިއީ ރާއްޖެއަށް ލިބޭ ޑޮލަރު ވަރަށް ބޮޑުތަކުން ދަށްވެފައި ވުމާ އެކު ނިންމި ނިންމުމެއްކަމަށެވެ.

މި ނިންމުމާއެކު ރާއްޖޭން ބޭރުގައި ދިރިއުޅޭ ދިވެހިންނަށް ދެން މަހެއްގެ މައްޗަށް ކާޑަކުން ބޭނުންކުރެވޭނީ 750 ޑޮލަރާ ހަމައަށެވެ. ރާއްޖޭގައި ނަމަ ކާޑަކުން އޮންލައިންކޮށް ބޭރުގެ މުއާމަލާތްކުރެވޭނީ މަހެއްގެ މައްޗަށް 250 ޑޮލަރާ ހަމައަށެވެ.

advertisement

މީގެ ކުރިން ބީއެމްއެލްގެ ކާޑުތަކުން ދުވާލަކު 400 ޑޮލަރާ ހަމައަށް ރާއްޖެއިން ބޭރުގައި ފައިސާ ނެގެއެވެ. އަދި ޕީއޯއެސް މެޝިންތަކުން އަދި އެ ނޫން ގޮތްގޮތުން 600 ޑޮލަރާހަމައަށް ބޭރުގައި ވިޔަފާރި ކުރެވެ އެވެ. ބީއެމްއެލްއިން ބުނީ 95 ޕަސެންޓް ކަސްޓަމަރުންވެސް އެ ލިމިޓާއި ހަމައަށް ބޭނުން ނުކުރާ ކަމަށެވެ.

ބީއެމްއެލްއިން ބުނީ އާ ލިމިޓްތައް ކަނޑައެޅީ ރުފިޔާ އެކައުންޓް މެދުވެރިކޮށް ކާޑުން ކުރާ ބޭރުގެ މުއާމަލާތްތަކަށް އެކަނި ކަމަށެވެ. އަދި ބީއެމްއެލް އިން ދޫކޮށްފައިވާ ޑެބިޓް ކާޑެއް ބޭނުންކޮށްގެން ޑޮލަރު އެކައުންޓުން ކަސްޓަމަރުންކުރާ މުއާމަލާތްތައް މިހާރެކޭ އެއްގޮތަށް ކުރެވޭނެ ކަމަށް އެ ބޭންކުން ބުނެއެވެ. ބޭރުގައި މުއާމަލާތް ކުރެވޭ އަދަދު މިވަގުތު ލިމިޓް ކުރީ ރާއްޖެއަށް މިހާރު ދިމާވެފައިވާ ޑޮލަރުގެ ދަތިކަން ހައްލުކުރުމުގެ ގޮތުންކަމަށް ބީއެމްއެލްއިން ބުނެއެވެ. ބީއެމްއެލްއިން މީގެ ކުރިންވެސް ވަނީ ވިޔަފާރިތަކަށް ޑޮލަރު ދޫކުރުމުގައި އެންމެ މުހިންމު ކަންކަމަށް އިސްކަންދީގެން ޑޮލަރު ދޫކުރާނެކަމަށް ބުނެފައެވެ.