Male’ sarahahdhuge Guest house thah hulhuvan, positive vaa adhadhu dhahkuranjehey: Dr.Mausoom

މާލެ ސަރަހައްދުގެ ގެސްޓްހައުސްތައް ނޮވެމްބަރު މަހުގެ ތެރޭގައި ހުޅުވުމަށް އުންމީދުކުރައްވާ ކަމަށާއި ނަމަވެސް އެކަން ވާން އޮތީ ކޮވިޑް-19 އަށް ޕޮސިޓިވްވާ މިންވަރު ދަށްކުރެވިގެން ކަމަށް ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ. 

މާލެ ސަރަަހައްދު ފިޔަވައި އެހެން ރަށްތަކުގައި ހުރި ގެސްޓްހައުސްތައް އަންނަ މަހުގެ 15 ވަނަ ދުވަހު ހުޅުވުމަށް ނިންމައި ތައްޔާރީތައް ވަމުން އަންނަ އިރު މާލެ ސަރަހައްދުގެ ގެސްޓްހައުސްތަކަށް ހުއްދަ ދޭނެ ދުވަހެއް އަދި އިއުލާނުކޮށްފައެއް ނުވެއެވެ. މި ވަގުތު ހުއްދަ ދެނީ ޓްރާންސިޓް ހޮޓާތަކުގެ ގޮތުގައި ރެޖިސްޓްރީކުރާ ތަންތަނަށް އެކަންޏެވެ. 

advertisement

މިނިސްޓަރު މައުސޫމް ކުރެއްވި ޓްވީޓެއްގައި ވިދާޅުވެފައި ވަނީ ގްރޭޓާ މާލެ ސަރަހައްދުގެ ހޮޓާ، ގެސްޓްހައުސް އަދި ޓުއަރިސްޓް ފެސިލިޓީތައް ނޮވެމްބަރު މަހުގެ ކުރީކޮޅު ހުޅުވުމަށް އުންމީދުކުރައްވާ ކަމަށާއި ނަމަވެސް އެކަންކުރެވޭނީ ޕޮސިޓިވްވާ ނިސްބަތް ވިދިވިދިގެ ދެ ހަފުތާ ވަންދެން ފަހަކަށް އިތުރުވިޔަ ނުދީ ހިފެހެއްޓުމުން ކަމަށެވެ. 

ރާއްޖޭގައި ކޮވިޑް-19 ފެތުރެން ފެށުމާ އެކު މާޗް މަހުގެ ތެރޭގައި ރާއްޖޭގެ ބޯޑަރު ބަންދުކުރުމަށް ފަހު އަލުން ހުޅުވާލީ ޖުލައި މަހުގެ 15 ވަނަ ދުވަހުއެވެ. އިގްތިސާދު ޓުއަރިޒަމަށް ބަރޯސާވެފައި އޮތް ރާއްޖެ އަށް ޓުއަރިސްޓުން ނާންނާތީ އިގްތިސާދީ ބޮޑެތި މައްސަލަތަކެއް ވަނީ ކުރިމަތިވެފައެވެ. ޖުލައި 15 ގައި ބޯޑަރު ހުޅުވާލުމާ އެކު ޓުއަރިސްޓުން އަންނަ މިންވަރު މިހާރު އަންނަނީ އިތުރުވަމުންނެވެ. އަދި ޕޮސިޓިވްވާ ނިސްބަތް ދަށްކުރެވޭ ނަމަ މިއަދަދު އިތުރުވާނެ އެވެ. ރާއްޖެ މިހާރު ވަނީ ދަތުރުކުރަން ރައްކާތެރި ގައުމުތަކުގެ ލިސްޓްގައި ހިމަނައި “ސޭފް ޓްރެވަލް ސްޓޭމްޕް” ދީފައެވެ.