އިންޑިއާގެ ކާގޯ ފެރީ: އިންޑިއާ އާއި ރާއްޖޭގެ އިގްތިސާދުގެ އާ ބާބެއްގެ ފެށުން!

ރާއްޖެ އާއި އިންޑިއާއާ ދެމެދު ފެރީގެ ހިދުމަތް ފެށުމަށް މަޝްވަތައް ކުރެވެމުން އަންނަތާ އެތައް ދުވަސްތަކެއް ވެއްޖެއެވެ. އެންމެ ފުރަތަމަ ފަސިންޖަރ ފެރީއެއްގެ ގޮތުގައި މަޝްވަރާކުރެވުނަސް ފަހުން ދެ ފަރާތުން ދެކެވެނު މަޝްވަރާތަކަށް ފަހު ނިންމީ މި ވަގުތަށް ހަމައެކަނި ކާގޯ ނުވަތަ މުދާ އުފުލާ ފެރީއެއް ފެށުމަށެވެ. އެކަމަށް މިއަދު ވަނީ އަމަލީ ސިފައެއް އައިސްފައެވެ. އިންޑިއާ އާއި ރާއްޖެއާ ދެމެދު ބާއްވާ ކާގޯ ފެރީގެ ފުރަތަމަ ދަތުރަށް މިހާރު ވަނީ ފަށާފައެވެ.

ޓްރާންސްޕޯޓް މިނިސްޓްރީން މައުލޫމާތު ދޭ ގޮތުގައި “އެމްސީޕީ ލިންޒް 47” ނަމަކަށް ކިޔާ ފެރީ މުދާ ބަރުކޮށްގެން އިންޑިއާގެ ސޫތުކުޅިން އާދީއްތަ ދުވަހު ވަނީ ފުރާފައެވެ. އެ ފެރީ އެންމެ ފުރަތަމަ ބަނދަރުކުރާނީ އިންޑިއާގެ ކޮޗިންގެ ބަނދަރުގައެވެ. އެއަށް ފަހު ރާއްޖެ އަށް މިސްރާބު ޖަހައި ހދ. ކުޅުދުއްފުއްޓަށް އަންނާނެއެވެ. އަދި ކުޅުދުއްފުށީ ބަންދަރަށް މުދާ ބޭލުމަށް ފަހު ދެން އަންނާނީ މާލެއެވެ. ރާއްޖެ އައުމަށް ހަމަޖެހިފައި ވަނީ 26 ވަނަ ދުވަހުއެވެ. ފުރަތަމަ ފަށައިގަންނަ އިރު އިންޑިއާ އާއި ރާއްޖެއާ ދެމެދު މި ފެރީ މަހަކު ދެ ފަހަރު ދަތުރުކުރާނެއެވެ.

advertisement

އިންޑިއާ އާއި ރާއްޖެއާ ދެމެދު ފެށި މި ފެރީ ދަތުރާ ބެހޭ ގޮތުން ތަފާތު އެކި ވާހަކަތައް ދަނީ ދައްކަމުންނެވެ. އަދި އެއީ ރާއްޖެ އަށް ބޮޑެތި ގެއްލުންތަކެއް ލިބޭނެ ކަމެއްގެ ގޮތުގައި ދެއްކުމަށް ބަޔަކު ދަނީ މަސައްކަތް ކުރަމުންނެވެ. އެ ގޮތުން އިންޑިއާ އިން ރާއްޖެ އަންނަ މީހުންގެ ސަބަބުން ރާއްޖޭގެ އިސްލާމީ ސަގާފަތަށް ބުރޫއަރާނެ ކަމަށާއި “ރޭޕިސްޓުން” ރާއްޖެ އަންނާނެ ކަމަށާއި މި ތަނުގައި އެ މީހުން ވަޒަންވެރިވާނެ ކަމަށް ބުނެ ދަނީ ވާހަކަތައް ފަތުރަމުންނެވެ. ނަމަވެސް މިއީ އެއްވެސް ހަގީގަތެއް ނެތް، ތާކުންތާކު ނުޖެހޭ ވާހަކަތަކެވެ.

އިންޑިއާ އާއި ރާއްޖެއާ ދެމެދު ފެރީއެއް ފަށާތީ ބަޔަކު ކަންބޮޑުވެގެން އުޅޭ އިރު ފަހަކަށް އައިސް ރާއްޖޭގެ ޓުއަރިޒަމްގެ އެންމެ ފުޅާވަމުން އައި އެއް މާކެޓަކީ އިންޑިއާ އެވެ. މިދިޔަ އަަހަރުގެ ސެޕްޓެމްބަރު މަހުން ފެށިގެން ކޮވިޑް -19 އާ ކުރިމަތިވެ ރާއްޖޭގެ ބޯޑަރު ބަންދުކުރުމާ ހަމައަށް ކޮންމެ މަހަކު ރާއްޖެ އަށް ދެ ވަނަ އަށް އެންމެ ގިނަ ޓުއަރިސްޓުން އައިސްފައި ވަނީ އިންޑިއާ އިންނެވެ. މީގެ ތެރޭގައި ރިސޯޓްތަކުގެ އިތުރުން މީހުން ދިރިއުޅޭ ރަށްރަށުގައި ހުރި ގެސްޓް ހައުސްތަކަށް އައި އިންޑިއާގެ ޓުއަރިސްޓުން ހިމެނެއެވެ. އަދި ކުރިން ލަފާކޮށްފައި އޮތީ މި އަހަރުގެ ތެރޭގައި އިންޑިއާ އިން މާކެޓްގެ ބޮޑުބައެއް ހިއްސާކުރާނެ ކަމަށެވެ. ނަމަވެސް ކޮވިޑް-19އާ ގުޅިގެން ބޯޑަރުތައް ބަންދުވެ، ޓުއަރިޒަމަށް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ.

މީގެ އިތުން ރާއްޖޭގެ ވޯކް ފޯސްގައި ވެސް އިންޑިއާގެ މަސައްކަތްތެރިން ގިނައެވެ. ދިވެހިންގެ ވިސްނުމާއި ސިކުނޑިއާ ކުޅެލާ ގިނަ ދާއިރާތަކުގައި އިންޑިއާގެ މަސައްކަތްތެރިންގެ ނުފޫޒު އެބައޮތެވެ. އެ ގޮތުން ދިވެހި އެންމެ ހަގު ދަރިވަރުން ފެށިގެން ޔުނިވާސިޓީތަކާ ހަމައަށް ދަރިވަރުން ތަރުބިއްޔަތު ކުރުމުގައި އިންޑިއާގެ ޓީޗަރުން މަސްކަތްކުރަމުން އަންނަތާ އެތައް އަހަރެއް ވެއްޖެއެވެ. އޭގެ ތެރޭގައި ބުދަށާއި، އިދިކޮޅު ފަރާތްތަކުން ސިފަކުރާ “ގެރިއަށް އަޅުކަންކުރާ” އެތައް ހާސް ބަޔަކު މި ގައުމުގެ ޅަދަރިންގެ ތައުލީމީ ތަރުބިއްޔަތާ ހަވާލުވެ ތިބޭތާ ކިތަންމެ ޒަމާނެއް ވެއްޖެއެވެ. ދީނީ ނަޒަރިއްޔާތަކުން ބަލާ ނަމަ އެ ކުދިން އެހެން ދީންތަކަށް ބަދަލުވެ، މުޅި ގައުމު ބުދު ދީނަށް ބަދަލުވާހާ ދުވަހަސް ވެސްޖެއެވެ.

ސިއްހީ ދާއިރާގައި ވެސް އެ މީހުން ނުފޫޒު ގަދައެވެ. ރާއްޖޭގެ އެންމެ ބޮޑު ހޮސްޕިޓަލަށް ނަންދެވިފައި ވަނީ އަރަބި މުސްލިމެއްގެ ނަމަކުން ނޫނެވެ. އިންޑިއާ އަށް ނިސްބަތްވާ ކާފިރެއްގެ ނަމުންނެވެ. ދިވެހިން ލޯމަރާލާފައި ދިރުވާލާ ބޭސް ގުޅައަކީ އެ ބުނާ ބުދު ދީނުގެ މީހުން ލިޔެފައި ދޭ ބޭސް ސިޓީ އަށް ނަގާ ބޭހެވެ. އެވަރުން ނިމުނީއަކީ ނޫނެވެ. ގޭގެ ސިޓިން ރޫމުގައި ވެސް އެބުނާ ބުދު ދީނުގެ ޑްރާމާތަކެވެ. ޅަދަރިންނާއި އަނބިމީހާ ވެސް ގެއްލިފައި ތިބެނީ ސޮނީ އާއި ސްޓާ ޕްލަސްގެ ސީރީޒްތަކަށެވެ. ސިނަމާތަކާއި ދިވެހިންގެ މިއުޒިކްގައި ވެސް އިންޑިއާގެ ނުފޫޒެވެ. ނަން މަޝްހޫރު އަދި މިހާރު މާ ދީންވެރިވެގެން އުޅޭ އެތައް ބަޔަކު ފަހަކާ ޖެހެންދެން ކައިބޮއި އުޅުނީ އެ މިއުޒިކްތަކުން ވައްކަން ކޮށްގެންނެވެ. މިހެން ގޮސް ކިޔާނެ ކަމެއް ނެތެވެ. އިންޑިއާގެ ނުފޫޒު ނެތް ދާއިރާއެއް ނެތެވެ.

އާކަމެއް ވާކަށް ވެސް ނޫޅެއެވެ. މުދާ ހިފައިގެން ކާގޯ ފެރީ އަންނަނީ ކަސްޓަމާއި ކަމާ ބެހޭ ފަރާތްތަކުން ބަލަހައްޓަ ބަނދަރަކަށެވެ. ހިތަށް އެރި ރަށެއްގެ ފަޅަށް ވަދެ މުދަލާއި މީހުން ބާލާފައި ދަނީއެއް ނޫނެވެ. އެ ފެރީން ބާލާ ކޮންމެ އެއްޗަކީ ބަލައި ޗެކްކުރެވޭ، އަދި ހުއްދަ ދީގެން ގެނެވޭ ތަކެއްޗެވެ. އެއިން މީހަކު ފައިބާ ނަމަ އެ މީހަކު ފައިބާނީ މިހާރު ވެސް ހެދިފައި ހުރި ގަވާއިދުތަކާ އެއްގޮތަށް ޕާސްޕޯޓާއި ވިސާ އާއި އެ ނޫން ވެސް ލިޔެކިޔުންތަކާއި ހުއްދަތައް ހުރެގެންނެވެ. ފެރީގައި “ރޭޕިސްޓުންތައް” އައިސް ރަށްރަށަށް އަރައި ދިވެހި އަންހެނުންގެ އިއްފަތްތެރިކަން ނަގާލާފައި ދަނީއަކީ ނޫނެވެ. ނުވަތަ އެ ބަޔަކު އައިސް ވަޒަންވެރިވެ ދިވެހި އަންހެނުންނާ ކައިވެނިކޮށް ނަސްލު އޮޅުވާލައި ދިވެހިންގެ ސަގާފަތާއި ދީން ގެއްލި ދަނީއަކީ ވެސް ނޫނެވެ. މީހަކު އަންނަ ނަމަ އަންނަނީ މިހާރު ވެސް ޓުއަރިސްޓުން އަންނަ ފަދައިންނެވެ. އެ ފެރީގައި އަންނަ ބަޔަކު ގެސްޓް ހައުސްތަކާއި އެ ނޫން ވެސް ތަންތަނުގައި ތިބޭ ނަމަ ތިބޭނީ މިހާރު ވެސް އެއާޕޯޓަކަށް ޖައްސާ ފްލައިޓަކުން އަންނަ ޓުއަރިސްޓުންނެކޭ އެއްގޮތަށެވެ. ތަފާތަކީ ކަނޑުމަގުން ދަތުރުކުރުމެވެ. ރާއްޖެ އަންނަ ބިޔަ ފަސިންޖަރ ލައިންތަކުން އަންނަ މީހުން ވެސް މާލެ އާއި ރަށްރަށަށް ފައިބަނީ އެ އޮންނަ އުސޫލަކުންނެވެ. އަންނަހާ ބޯޓަކުން ފައިބާ ބައެއްގެ ސަބަބުން ރާއްޖޭގެ ދީން ގެއްލި އަޅުވެތިވާ ނަމަ ރާއްޖޭގެ އެންމެ އުތުރުގައި އޮންނަ ހއ. އުލިގަމާއި ތުރާކުނު ފަދަ ރަށްތަކުގައި މިހުރު އުޅޭނީ ފަރަންޖީންނެވެ. ކޮންމެ އަހަރަކު ބޭރުގެ އެތައް ޔޮޓް ފަހަރެއް އެ ރަށްތަކުގައި ބަނދަރުކޮށް ހިދުމަތް ހޯދައެވެ. އޭގެ ތެރޭގައި ޔަހޫދީން ވެސް ހިމެނެއެވެ. މާލެ ކައިރި ތަންތަނަށް ނުވާތީ ބަޔަކަށް މާ ބޮޑު ކަމަކަށް ނުވާނީ ކަމަށް ވެދާނެއެވެ.

ރާއްޖެ އާއި އިންޑިއާއާ ދެމެދު ކާގޯ ފެރީއެއް ފެށުމުން ރާއްޖެ ސަގާފަތް ނެތިގެއްލި، އިންޑިއާގެ އަޅުވެރިކަމަށް ދާންޖެހޭ ސަބަބެއް ނުވިސްނެއެވެ. ރާއްޖެ އަށް މިހާރު ވެސް އިންޑިއާގެ ބޯޓުފަހަރު މުދާ ހިފައިގެން އާދެއެވެ. ފެރީ ނުކިޔާތީ ބަޔަކަށް މާބޮޑު ކަމަކަށް ނުވެއެވެ. ރާއްޖޭގެ ސަގާފަތް ގެއްލި އިންޑިއާގެ އަޅުވެތި ކަމަށް ދާނީ ފެރީއެއްގައި ރާއްޖެ އަށް ބޭނުންވާ މުދާ އެތެރެކުރުމުންތޯ ނުވަތަ އެއާލައިންތަކުން ރާއްޖޭގެ އެތައް އާއިލާއަކަށް ބޭނުންވާ ޑޮލަރު ގެންނަ އިންޑިއާގެ ޓުއަރިސްޓުންގެ ސަބަބުންތޯ ސުވާލު ނުކުރަނީ ކީއްވެބާއެވެ؟

ކާގޯ ފެރީގެ ސަބަބުން ދިވެހިންނަށް ވެސް އަދި އިންޑިއާގެ ވިޔަފާރިވެރިންނަށް ވެސް އޮތީ ފައިދާއެވެ. މީގެ ސަބަބުން އިންޑިއާ އިން މުދާ ގެނައުމަށް މިހާރަށް ވުރެ ފަސޭހަ ގޮތްތަކެއް ފަހިވެގެންދާނެއެވެ. މީގެ ކުރިން އެހެން ގައުމުތަކުގެ ބަނދަރުތަކުގައި ނުވަތަ ލަންކާ އާއި ދުބާއީ އަދި މި ސަރަހައްދުގެ އެހެން ގައުމުތަކުގެ ޓްރާންސިޓްވެގެން އަންނަ މުދާ މިހާރު ޑައިރެކްޓްކޮށް ކުރު މުއްދަތެއްގައި ރާއްޖެ އަށް ގެނައުމުގެ ފުރުސަތު މި ވަނީ ފަހިވެފައެވެ. ހާއްސަކޮށް އުތުރުގެ އެންމެ ބޮޑު އަދި ވިޔަފާރި މަރުކަޒުކަމުގައިވާ ކުޅުދުއްފުއްޓަށް ސީދާ މުދާ ގެނެވޭ ގޮތް ވުމަކީ ވެސް އުތުރުގެ ތަރައްގީ އަށް ފައިދާތަކެއް ކުރާނެ ކަމެކެވެ. އެ ރަށަކީ މިހާރު ވެސް އުތުރުގެ ތިން އަތޮޅަށް މުދާ ސަޕްލައިކޮށްދޭ އަދި އެކި ބޭނުންތަކުގައި އެތައް ބަޔަކު ގޮސް އުޅޭ ރަށެކެވެ. ކޮވިޑް-19 އާ ގުޅިގެން މާލެ އަށް އައުމުގެ ބަދަލުގައި ޅ. އަތޮޅުގެ ރަށްތަކުން ފެށިގެން އުތުރުގެ އެތައް ރަށެއްގެ މީހުންގެ މިހާރުގެ މަންޒިލަކީ ވެސް ކުޅުދުއްފުއްޓެވެ. އެހެންކަމުން މިފަދަ ފެރީއަކުން މުދާ ގެނެސް ވިޔަފާރި ފުޅާކުރުމަށް ދިވެހި ވިޔަފާރިވެރިންނަށް ވެސް މިއީ ރަނުގެ ފުރުސަތެކެވެ. އަނެއްކޮޅުން ސަރުކާރުން ވަރަށް ފަހުން ވަނީ އުތުރާއި ދެކުނުގެ ބަނދަރަށް ޑައިރެކްޓްކޮށް ބޭރުން ގެންނަ ގިނަ ބާވަތްތަކެއްގެ މުދަލުގެ ޑިއުޓީ 50 ޕަސެންޓަށް ކުޑަކޮށްފައެވެ. މިއީ ވެސް މި ފެރީގެ ފައިދާ ދިވެހި ވިޔަފާރިވެރިންނަށް ލިބިގެންދާނެ ސަބަބެކެވެ.

އިންޑިއާ އާއި ރާއްޖެއާ ދެމެދު އޮތް ގުޅުމުގެ ތެރެއިން ދެ ގައުމަށް ހުރި ފައިދާތައް ގިނައެވެ. މި ފެރީގެ ސަބަބުން ވެސް އެކަން ހާމަވެގެންދާނެއެވެ. މިކަމާ ދެކޮޅަށް އަޑު އުފުލާ މީހުން ވެސް އެކަން ގަބޫލުރާނެއެވެ. ނަމަވެސް ސިޔާސީ ބޭނުމަކަށްޓަކައި ނުވަތަ ގެއްލިފައިވާ ބާރުތަކެއް އަނބުރާ ހޯދުމުގެ ނިޔަތުގައި ރައްޔިތުންގެ މެދުގައި ފަސާދަ އުފެއްދުމަށް ދެ ގައުމުގެ ގުޅުމަށް ބުރޫ އަރާ ގޮތަށް ހޮޅި ވާހަކަތަކެއް ފަތުރަނީއެވެ.

އިންޑިއާ އާއި ރާއްޖެއާ ދެމެދު އޮތީ ހިތާ ހިތުގެ ގުޅުމެކެވެ. ޒަމާނީ ރަހުމަތްތެރިކަމެކެވެ. އެއީ ވަކި ދީނަކަށް ނުވަތަ ވަކި ސަގާފަތެއްގެ މައްޗަށް ބިނާވެފައި އޮތް ގުޅުމެއް ނޫނެވެ. އެއީ އިންސާނިއްޔަތުކަމުގެ ގުޅުމެކެވެ. އެއީ ބަޔަކު ވެރިކަމުގައި ތިބީތީ ވީގޮތެއް އަދި ވާ ގޮތެއް ވެސް ނޫނެވެ. ނުވަތަ ފެރީއެއް ފެށުމުން ނުވަތަ ލޯނެއް ދިނުމަކުން އަދި ބިޔަ ބޮޑު މަޝްރޫއުތަކެއް ހިންގާތީ ވެސް ވީކަމެއް ނޫނެވެ.