ރާއްޖެއަށް ޒިޔާރަތްކުރި ފަތުރުވެރިންގެ އަދަދު %61 އިތުރުވެއްޖެ

ރާއްޖެއަށް ޒިޔާރަތްކުރި ފަތުރުވެރިންގެ އަދަދު 61 އިންސައްތަ އިތުރުވެއްޖެއެވެ. މޯލްޑިވްސް އިމިޤްރޭޝަނުން އާންމުކޮށްފައިވާ ތަފާސްހިސާބުތައް ދައްކާގޮތުން ބޯޑަރު ހުޅުވާލި ފުރަތަމަ މަހާއި އަޅާބަލާއިރު 2 ވަނަ މަހުގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ އިތުރުވެފައެވެ. ރާއްޖޭގެ ބޯޑަރު ހުޅުވާލިފަހުން މިހާތަނަށް ރާއްޖެއަށް 13516 ފަތުރުވެރިން ޒިޔާރަތްކޮށްފައިވާކަމަށް މޯލްޑިވްސް އިމިޤްރޭޝަނުން ވިދާޅުވެއެވެ.

މޯލްޑިވްސް އިމިގްރޭޝަންގެ ތަފާސް ހިސާބުތައް ދައްކާގޮތުން މިމަހުގެ 1 އިން 15 ވަނަ ދުވަހުގެ ނިޔަލަށް ރާއްޖެ ޒިޔާރަތްކޮށްފައިވަނީ 4458 ފަތުރުވެރިންނެވެ. މިމަހުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން އައިސްފައިވަނީ މިމަހުގެ 13 ވަނަ ދުވަހުއެވެ. އެއީ 486 ފަތުރުވެރިންނެވެ. އެންމެ މަދުން ފަތުރުވެރިން އައިސްފައިވަނީ މިމަހުގެ 2 ވަނަ ދުވަހުއެވެ. އެއީ ޖުމްލަ 122 ފަތުރުވެރިންނެވެ.

އިމިގްރޭޝަންގެ ތަފާސްހިސާބުތައް ދައްކާގޮތުން މިމަހުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން އައިސްފައިވަނީ 3 ޤައުމުގެ ތެރޭގައި ހިމެނެނީ ޔޫއޭއީ، ރަޝިއާ އަދި އެމެރިކާއެވެ. މިމަހުގެ 1 އިން 15 ވަނަ ދުވަހުގެ ނިޔަލަށް ޔޫއޭއީއިން ޖުމްލަ 656 ފަތުރުވެރިން ވަނީ އައިސްފައެވެ. ރަޝިއާއިން 539 ފަތުރުވެރިން އަދި އެމެރިކާއިން 502 ފަތުރުވެރިން ރާއްޖެ އައިސްފައިވާކަމަށް އިމިގްރޭޝަންގެ ތަފާސްހިސާބުތަކުން ދައްކައެވެ.

advertisement