މަސް ގަންނަ އަގު ދޫކޮށްލައި މިފްކޯ އިން ވާދަވެރި މާކެޓަށް!

މަސްވެރިންނަށް ހަމަ އަގު ފޯރުކޮށްދިނުމަށް ކަމަށް ބުނެ މަހުގެ އަގު ކޮންޓްރޯލްކޮށް ސަރުކާރުގެ މަސް ކުންފުނި، މިފްކޯ އިން މަސް ގަންނަމުން އަންނަތާ ހަތް އަހަރަށް ފަހު މަހުގެ އަގު ދޫކޮށްލަން އެ ކުންފުނިން މިހާރު ވަނީ ނިންމާފައެވެ.

މިފްކޯ އިން އިއްޔެ ބުނީ ހަތް އަހަރަށް ފަހު އަންނަ ބުރާސްފަތި ދުވަހުން ފެށިގެން އެސްޓީއޯ އިން މަސް ގަންނާނީ މާކެޓް ރޭޓުން ކަމަށެވެ. އެ ކުންފުނިން ވެސް ދެން މަސްގަންނާނީ ދުނިޔޭގެ ބާޒާރުގައި މަހުގެ އަގު ހުންނަ މިންވަރަށް ބަލައިގެންނެވެ.

advertisement

މިފްކޯ އިން މިހާރު މަސް ގަންނަނީ ކިލޯއެއް 20ރ. ގެ ރޭޓުން ކޮންޓްރޯލް އަގުގައެވެ. މީގެ ސަބަބުން މިފްކޯ އަށް ދަނީ ބޮޑެތި ގެއްލުންތަކެއް ވަމުންނެވެ. ދުނިޔޭގެ ބާޒާރުގައި މަހުގެ އަގު ދަށްވި ނަމަވެސް މިފްކޯ އިން މިހާތަނާ ޖެހެންދެން ވެސް ގެއްލުމުގައި ދިޔައީ މަސް ގަންނަމުންނެވެ. ނަމަވެސް އޭގެ ސަބަބުން ކުންފުނީގެ ދަރަނި ބޮޑުވެ މަސްވެރިންނަށް ވަގުތުން ފައިސާ ދިނުމަށް ދަތިތަކެއް ވަނީ ކުރިމަތިވެފައެވެ. އަދި މަސްވެރިންނަށް މިފްކޯ އިން ދަރާފައިވާތާ އެތައް ދުވަހެއް ވެއްޖެއެވެ. އެ ގޮތުން މަސް ވެގެންދާއިރު ވެސް މިފްކޯ އަށް ބިލްތަކަށް ފައިސާ ނުދެއްކޭތީ މަސްވެރިންނަށް ވަނީ ބޮޑެތި ތަކްލީފްތަކެއް ކުރިމަތިވެފައެވެ.

މިފްކޯ އިން ބުނީ އަލަށް ގެންނަ ބަދަލުގެ ސަބަބުން މި ކަމަށް ވަރަށް ބޮޑު ހައްލެއް ލިބިގެންދާނެ ކަމަށާއި މަސްވެރިންނަށް ނުދެވި ހުރި ފައިސާ ވެސް ދާދި އަވަހަށް ދެއްކޭނެ ކަމަށެވެ.

މިފްކޯ އިން ބުނީ މިހާތަނާ ޖެހެންދެން ފައިސާ ދެމުން އައީ ނަގުދު ފައިސާ މަސްވެރިންގެ އަތަށް ދޭ އުސޫލުން ކަމަށް ވުމަކީ ވެސް ކޭޝް ފްލޯ މެނޭޖްކުރަން ކުރިމަތިވެފައިވާ ދައްޗެއް ކަމަށާއި މިހާރު ގެނައި ބަދަލުގެ ދަށުން މަހަށް އަގު ދިނުމުގައި ބޭންކް އޮފް މޯލްޑިވްސްގެ “މަސްވެރިޔާ ކާޑް” ބޭނުންކުރާ ކަމަށެވެ. އެ ގޮތަށް ބަދަލުކުރުމުން ފައިސާ ޖަމާވާނީ ސީދާ މަސްވެރިޔާގެ އެކައުންޓަށެވެ.

މިފްކޯ އިން ބުނީ މި ބަދަލާ އެކު ކުންފުންޏަށް ގެއްލުން ނުވެ މަސް ގަނެވޭނެ ކަމަށާއި އަދި މަސްވެރިންނަށް ވެސް ބާނާ މަހަށް އަވަހަށް ފައިސާ ލިބިގެންދާނެ ކަމަށެވެ. އަދި ދުނިޔޭގެ ބާޒާރުގައި މަހުގެ އަގު މައްޗަށް ދާ ނަމަ އޭގެ ފައިދާ ވެސް މަސްވެރިންނަށް ކުރާނެ ކަމަށެވެ.

ވާދަވެރި ކުންފުނިތަކުން ބޮޑު ފައިދާއެއް ހޯދައި ކެޕެސިޓީ އިތުރުކުރަމުން ދިޔަ ނަމަވެސް ސަރުކާރުގެ ޒަމާންވީ މަސްކުންފުނި ފަހަކަށް އައިސް އަބަދު ވެސް އޮންނަނީ ނޭވާ ހިޅިއަށް އެޅފައެވެ. ސިޔާސީ އެކި ސަބަބުތަކާ ހުރެ އެ މަގުން ވިޔަފާރި ކުންފުންޏެއް ހިންގަން އުޅުމުން ނުކުންނާނެ ހުރިހާ ނަތީޖާއެއް ދިޔައީ ނުކުންނަމުންނެވެ. ކުންފުނީގެ ހަރުމުދާ މަރާމާތު ނުކުރެވި ބޯޓު ފަހަރާއި މެޝިންތައް ބާވެ ކެޕޭސިޓީ ދަށްވުން ފަދަ އެތައް މައްސަލަތަކެއް ދިޔައީ ކުރިމަތިވަމުންނެވެ. އަދި ސިޔާސީ އެކި އޮއިވަރުގައި ކުންފުނި ޖެހި މުވައްޒަފުންނާއި ތަކެތި އެކަމުގައި ބައިވެރިކޮށް ނުބައި ނިންމުންތައް ނިންމުމުގެ ސަބަބުން ވާދަވެރި މާކެޓެއްގައި މިފްކޯ އުޅުނީ ވަރަށް ފަހަތުގައެވެ. ހާއްސަކޮށް ދުނިޔޭގެ ބާޒާރުގައި މިފްކޯ އަށް ވާދަކުރެވޭ ވަރަށް ވުރެ ކުންފުނީގެ ހާލަތު ދަށެވެ.

މުސްތަގުބަލުގައި ވެސް މާކެޓްގައި ވާދަކުރުމަށް މިފްކޯ އަށް ބޮޑެތި ބަދަލުތަކެއް ގެންނަންޖެހޭނެއެވެ. އެ ގޮތުން ކެޕޭސިޓީ އިތުރުކުރުމާއި ވެލިއު އެޑެޑް ޕްރޮޑަކްޓްސް އިތުރުކުރަންޖެހޭނެއެވެ. އެކަމަށްޓަކައި މިފްކޯ އިން އަންނީ އިންވެސްޓްތަކެއް ކުރަމުންނެވެ. ނަމަވެސް އޭގެ ނަތީޖާ ފެންނަން އަދި ދުވަސްތަކެއް ނަގާނެއެވެ. ވާދަވެރި މާކެޓަކަށް ނުކުންނަށް އަޅާ ފުރަތަމަ ފިޔަވަޅެއްގެ ގޮތުން ފްލޯޓިން ރައިޒް މެކޭނިޒަމަކަށް ބަދަލުކުރުމަކީ ރަނގަޅު ފިޔަވަޅެކެވެ.