ފޮރިން މިނިސްޓަރ ޝަހީދު ހުންނެވީ ކަރަންޓީނުގައި، އިވެންޓްގައި ބައިވެރިވީ އެޗްޕީއޭގެ ޙާއްސަ ހުއްދައަކާއެކު

ފޮރިން މިނިސްޓަރ އަބްދުﷲ ޝާހިދު ގެންދަވަނީ ކަރަންޓީންގެ މުއްދަތު ފުރިހަމަ ކުރަމުން ކަމަށާ އިވެންޓްގައި ބައިވެރިވެވަޑައިގަތީ އެޗްޕީއޭގެ ހާއްސަ ހުއްދައެއްގެ ދަށުން ކަމަށް ފޮރިން މިނިސްޓްރީން ބުނެފި އެވެ.

ކޮވިޑް-19 އިން ރައްކާތެރިވުމުގެ ގޮތުން އަޅާފައިވާ ފިޔަވަޅުތަކުގެ ތެރޭގައި ރާއްޖެއިން ބޭރަށް ދިއުމަށް ފަހު އެނބުރި އައިސް 14 ދުވަހު ކަރަންޓީނުގެ މުއްދަތެއް ފުރިހަމަކުރަންޖެހެއެވެ. މިމަހުގެ 19 ވަނަ ދުވަހު މިނިސްޓަރު ޝާހިދު ވަނީ އަމިއްލަފުޅު ކަމެއްގައި ރާއްޖެއިން ބޭރަށް ވަޑައިގެންފައެވެ. އިންޑިއާއިން ރާއްޖެއަށްދިން 250 މިލިއަން ޑޮލަރުގެ ލޯނާއި ސަރުކާރުގެ ފަރާތުން ހަވާލުވުމަށް ބޭއްވި ރަސްމިއްޔާތުގައި މިނިސްޓަރ ޝާހިދު ވަނީ ބައިވެރިވެވަޑައިގަންނަވާފައެވެ. ކަރަންޓީންގެ މުއްދަތު ފުރިހަމަ ނުކުރައްވާ މިނިސްޓަރު ޝާހިދު އިވެންޓްތަކުގައި ބައިވެރިވެވަޑައިގަންނަވާތީ ބައެއް ފަރާތްތަކުން ވަނީ ފާޑުކިޔާފައެވެ. މިކަމާއި ގުޅިގެން ފޮރިން މިނިސްޓްރީން ވިދާޅުވީ، މިނިސްޓަރު ޝާހިދު ގެންދަވަނީ ކަރަންޓީން މުއްދަތު ފުރިހަމަ ކުރައްވަމުން ކަމަށެވެ. އަދި މުހިންމު ބައެއް އިވެންޓްތަކުގައި މިނިސްޓަރު ބައިވެރިވެވަޑައިގަންނަވަނީ އެޗްޕީއޭގެ ހާއްސަ ހުއްދައެއްގެ ދަށުން ކަމަށް އެ މިނިސްޓްރީން ވިދާޅުވިއެވެ. މިހަފްތާގެ ތެރޭގައިވެސް މުހިންމު އިވެންޓްތަކުގައި މިނިސްޓަރ ބައިވެރިވެވަޑައިގަންނަވާނެކަމަށް ފޮރިން މިނިސްޓްރީން ވަނީ ވިދާޅުވެފައެވެ.

advertisement