ބޯޑަރު ހުޅުވާލިފަހުން އެންމެ ގިނަ މީހުން ރާއްޖެއައީ މިމަހުގެ 20 ވަނަ ދުވަހު

ރާއްޖޭގެ ބޯޑަރު އަލުން ހުޅުވާލިފަހުން އެންމެ ގިނަ މީހުން އައިސްފައިވަނީ މިމަހުގެ 20 ވަނަ ދުވަހުކަމަށް އެމްއޭސީއެލްއިން ވިދާޅުވެއްޖެއެވެ.

މޯލްޑިވްސް އެއަރޕޯޓްސް ކޮންޕެނީ ލިމިޓެޑް، އެމްއޭސީއެލްގެ ތަފާސްހިސާބުތައް ދައްކާގޮތުން މިމަހުގެ 20 ވީ އާދިއްތަ ދުވަހު ވެލާނާ އިންޓަނޭޝަނަލް އެއަރޕޯޓަށް 867 މީހުން އައިސްފައިވާކަމަށެވެ. މީގެތެރެއިން 859 މީހުން އައިސްފައިވަނީ އިންޓަނޭޝަނަލް ފްލައިޓްތަކުގައެވެ. އަދި 8 މީހަކު އައިސްފައިވަނީ ޗާޓަރ ފްލައިޓްތަކުގައެވެ.

advertisement

ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވާލީ ޖުލައި މަހުގެ 15 ވަނަ ދުވަހުއެވެ. ޖުލައި 15 އިން ސެޕްޓެމްބަރ 15 އަށް ރާއްޖެއަށް 13516 ފަތުރުވެރިން ވަނީ ޒިޔާރަތްކޮށްފައެވެ. މަހުން މަހަށް ބަލާނަމަ ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އަންނަނީ ބޯޑަރު ހުޅުވާލިފަހުން އިތުރުވަމުންނެވެ. ސެޕްޓެމްބަރ މަހުގެ 1 އިން 15 ވަނަ ދުވަހުގެ ނިޔަލަށްވެސް ރާއްޖެއަށް 4458 ފަތުރުވެރިން ވަނީ ޒިޔާރަތްކޮށްފައެވެ.

ބައިނަލްއަޤްވާމީ ކައުންސިލްއެއްކަމަށްވާ އެއަރޕޯޓް ކައުންސިލް އިންޓަރނޭޝަނަލްއިން ދޭ ދަތުރުކުރުން ރައްކާތެރި އެއަރޕޯޓެއްކަމަށް ކަމަށް ކަނޑައަޅާ “އެއަރޕޯޓް ހެލްތް އެކްރެޑިޓޭޝަން” ވެސް ވެލަނާ އިންޓަރނޭޝަނަލް އެއަރޕޯޓަށް މިހާރު ވަނީ ލިބިފައެވެ. މިއީ ކޯވިޑް-19އާ ގުޅިގެން ރައްކާތެރިކަމުގެ މިންގަނޑު ހުރީ ރަނގަޅަށްކަން ކަނޑައަޅައިދޭ މިންކުރުމެކެވެ. ވެލާނާ އިންޓަރނޭޝަނަލް އެއަރޕޯޓަކީ އޭޝިއާ ޕެސިފިކް ރީޖަންގައި މިމިންކުރުން ލިބުނު 2ވަނަ އެއަރޕޯޓެވެ.