މާލޭގެ މަގުތަކުގެ ކޮނުމާއި ވަޅުލުމުގެ ނިމުމެއް ނެތް ސިލްސިލާ!

މިއީ އާ ވާހަކައަކައެއް ނޫނެވެ. އަދި މީޑިއާތަކުގެ ސުރުހީތަކުން އަބަދު ފެންނަ މައްސަލައެކެވެ. އާންމު ރައްޔިތުން ކޮންމެ ދުވަހަކުހެން ތަހައްމަލްކުރަންޖެހިފައިވާ އުނދަގުލެކެވެ. ސޯޝަލް މީޑިއާގައި އަބަދު ވެސް ކުރާ ޝަކުވާއެކެވެ. ކެރިކޮޅެއް ވެހިލައިފި ނަމަ އަދި އެ ޝަކުވާތައް މާ ބޮޑެވެ. މާލޭގެ މަގުތަކުގައި ފެންބޮޑުވާ މައްސަލައެވެ. އަޑިގުނޑަންތައް ގިނަކަމުން އުޅަނދުފަހަރަށް ބޮޑެތި ގެއްލުންތައް ލިބި ހިނގާބިނގާވުމުގައި ވެސް ދަތިތައް ކުރިމަތިވާ ވާހަކައެކެވެ. މަގުތައް ބަންދުވުމުން ރާސްތާ ދިގުލައި ތޮއްޖެހުން ބޮޑުވާ ވާހަކައެވެ. އަޑިގުނޑަންތަކުގެ ސަބަބުން އެކްސިޑެންޓްވާ ވާހަކައެކެވެ. އަބަދު އޮންނަނީ ހޮޅި ގުޅަން މަގުތައް ކޮނުމާއި ވަޅުލުމެވެ. އިމާރާތްތައް ކުރުމަށް ފެން ބޭރުކުރުމަށް މަގުތަކުގައި އަޅާފައި އޮންނަ ހޮޅިތަކުގެ ވާހަކަ ދައްކާ ކޮޅުންނުލައެވެ. މިއީ ނިމުމެއް ނެތް ޝަކުވާއެކެވެ.

މަގުތަކުގެ ފެންވަރު ރަނގަޅުކުރުމަށް އެކި ސަރުކާރުތަކުން އެކި މަޝްރޫއުތައް ހިންގައިފިއެވެ. ބޮޑެތި ހޭދަތެކެއް ކޮށްފިއެވެ. ބިލިއަނުން ހަރަދުކޮށްފިއެވެ. ނަމަވެސް ފޫނެތް ފަޔަށް ފެން ފުރުން ނޫން ކަމެއް ނުވިއެވެ. ނޭފަތު ކުރިޔާ ހަމައަށް ވިސްނައިގެން ޕްލޭންކޮށްފައި އޮތް މި މާލޭގެ މަގުތަކަށް ފައިސާ އޮއްސި މިންވަރެއް އެނގޭނެ ގޮތެއް ވެސް ނެތެވެ. ނަމަވެސް ވަގުތީ ހައްލެއް ވެސް ލިބޭވަރެއް ނުވެއެވެ. އަބަދު ކޮނުމާއި ވަޅުލުމެވެ.

advertisement

ނިމިދިޔަ ސަރުކާރުގައި ވެސް މަގުތަކުގެ ފެންވަރު ރަނގަޅުކުރުމަށް ހޭދަތަކެއް ކޮށްފައި ވެއެވެ. މަގުތަކުގައި ފެންބޮޑުވާ މައްސަލަ ހައްލުކުރަން ވެސް މަސައްކަތްތަކެއް ކުރިއެވެ. އަދި ބައެއް މަގުތަކުގައި އަތުރާފައި ހުރި ގާތައް ނަގައި އަލުން އެތުރިއެވެ. ނަމަވެސް ކޮނުމަކަށް ނިމުމެއް ނެތެވެ. ވަޅުލުމަކަށް ނިމެއް އަންނާނެ ދުވަހެއް ވެސް ފެންނާކަށް ނެތެވެ.

މަގުތައް އެއްވަރުކޮށް ގާއެތުރުމުގެ މަސައްކަތް މި ސަރުކާރުން ވެސް އެބަ ކުރެއެވެ. މައްސަލަ އޮތީ އޮންނަތަނުގައެވެ. އެއް ބަޔަކު މަގުތައް އެއްވަރުކޮށް ގާއަތުރަނީއެވެ. އަނެއް ބަޔަކު ހޮޅި އާއި ނަރުވަޅުލަން ކޮނެފައި ދޫކޮށްލާ އިރު އަޑިގުނޑަންތަކެވެ. މި މަންޒަރު ނުފެންނާނެ ގޮތަކަށް މާލޭގެ މަގުތައް ތަރުތީބުކުރެވޭނެ ޕްލޭނެއް އަދި ފެންނާކަށް ވެސް ނެތެވެ.

ކަރުދާހުގައި ޕްލޭންތައް ކުރަހައި އެ ވާހަކަ ދައްކަމުން އަންނަތާ ދުވަސްތަކެއް ވެއްޖެއެވެ. މި ސަރުކާރު އައި ފަހުން ވެސް އެ ވާހަކަ ދައްކައިފިއެވެ. ނަމަވެސް އަދި އަމަލީ މަސައްކަތެއް ފެށޭނެ ދުވަހެއް ނޭނގެއެވެ. ކޮވިޑް-19ގެ ބަލިމަޑުކަމާ އެކު އިގްތިސާދު އަޑިއަޅާލާފައިވާ އިރު މި ހުވަފެން ހަގީގަތަކަށް ވެދާނެ ދުވަހަކާ މެދު މިހާރު ވަނީ ސުވާލު އުފެދިފައެވެ.

މާލޭގެ މަގުތައް ނުކޮނެ ވާނެ ގޮތަކަށް މަގުތައް ތަރުތީބުކުރުމަށް ކުރަންޖެހޭ މަސައްކަތް ބުރައެވެ. ތަފާތު ހިދުމަތްތައް ދިނުމާއި ސަރުކާރު ކުންފުނިތަކާއި އަމިއްލަ ކުންފުނިތަކުން މަގުތަކުގައި ވަޅުލާފައިވާ ނަރުތަކާއި ފެން ފޯރުކޮށްދިނުމަށް ވަޅުލާފައިވާ ހޮޅިތަކާއި ނަރުދަމާގެ ނިޒާމާއި ކަރަންޓް ވިއުގައިގެ މަސައްކަތައްތަކަކީ ވެސް ދުވަހަކު ނިމުމެއް ނެތް މަސައްކަތްތަކެކެވެ. އެހެން ކަމުން އެކަންކަން ތަރުތީބުކޮށް، މާލޭގެ މަގުތަށް ނުކޮނެ، އެ މަސައްކަތް ކުރެވޭނެ ގޮތަކަށް މަގުތައް ޑިޒައިންކޮށް ބުރަ މަސައްކަތަތަކެއް ކުރަން ޖެހެއެވެ. އަދި މިއީ ޖާގައިގެ ގޮތުން ވެސް ވިސްނަންޖެހޭ ކަމެކެވެ.

މާލޭގެ ވަށައިގެން އޮތް ބޮޑުތަކުރުފާނު މަގުގެ ބޮޑު ބައެއްގައި މިހާރު ވަނީ ތާރު އަޅާފައެވެ. އެހެންކަމުން މަގުތައް ނުކޮނެ ފަރުޖެއްސޭނެ ކަމަށް ގިނަ ބަޔަކު އުންމީދުކުރިއެވެ. ނަމަވެސް ކަންވީ އެހެނެއް ނޫނެވެ. އެތައް ހޭދައެއްކޮށްގެން މިދިޔަ ސަރުކާރުން އެ މަގު ހެދި ނަމަވެސް އަދިވެސް މަގު ނުކޮނެއް ނުވަތަ މަގު ހުރަހަށް ހޮޅު ނާޅައި ފަރުޖެއްސޭނެ ގޮތެއް ނެތެވެ. މިހާރު ވެސް ތާރުގަނޑު ކެނޑުމަށް ފަހު ދޫކޮށްލި ބައެއް ތަންތަނުގައި ވަނީ އަޑިގުނޑަށް ހެދެން ފަށައިފައެވެ. އިމާރާތްތައް ހެދުމަށް ފެން ބޭރުކުރުމަށް އަދިވެސް ޖެހެނީ މަގު ހުރަސްކޮށް ހޮޅި އަޅައި އޭގެ މަތިން ސިމެންތި ނޫނީ ތާރު އަޅައިގެން ފަރުބަދައެއްހެން އުސްކޮށް ސްޕީޑް ބްރޭކަރުހެން ހަދަންށެވެ. ޒަމާނީ ފެންވަރަށް މަގު ހެދި އިރު ހަނދާން ނެތުނީ ކަމަށް ވެދާނެއެވެ. ހޮޅިތަކުގެ މައްސަލައަށް ހައްލެއް ހޯދޭނެ ގޮތެއް ނުފެނުނެވެ. އާ މަޝްރޫއަކަށް ތައްޔާރުވާ އިރު ވެސް މިއީ ފަސޭހައިން ހައްލުވާނެ ކަމެއް ނޫނެވެ.

ބައެއް ފަރާތްތަކުން ދެކޭ ގޮތުގައި މާލޭގެ މަގުތަކަށް އޮތީ ކެންސަރު ޖެހިފައެވެ. ކެންސަރު ޖެހުނީމާ ޖެހޭނީ އެތަނެއް ނަގަންށެވެ. މާލޭގެ މަގުތަކަށް ވެސް ބޭނުން ވަނީ އެފަދަ ހައްލެކެވެ. ހޮޅިތަކާއި ނަރުތައް ނަގައި އަލުން ތަރުތީބުކުރުން ނޫން ގޮތެއް ނެތެވެ. ނޭފަތުގެ ކުރިއަށް ނުވިސްނައި ތަންކޮޅެއް ދުރު މުސްތަގުބަލަށް އަމާޒުކޮށް މަގުތައް އަލުން ކޮންނަންނުޖެހޭނެ އިންތިޒާމްތަކެއް ހަމަޖައްސަންޖެހެއެވެ. ފެނާއި ނަރުދަމާއި ކަރަންޓާއި އިންޓަނެޓާއި އަދި ގޭސް ހޮޅިތަކަށް ވެސް ޖާގަ ދީގެން އެކަން ކުރަން އެބަޖެއެވެ. ތޮއްޖެހިފައި މިވާ މާލޭގެ މަގުތަކުން އަބަދު ކޮނުމާއި ވަޅުލުން ނޫން މަންޒަރެއް ފެންނަން އެބަޖެހެއެވެ.