މިއަދަކީ ބޮޑުތިލަދުންމަތި ބޮޑުކޮށް ދިއްލުމުގެ ފެށުން ފާހަގަކުރާ ދުވަސް: މިނިސްޓަރު ޝާހިދު

މިއަދަކީ ދިވެހިރާއްޖެއަށް އާ ދިރުމެއް ލިބިގެންދާ ދުވަހެއް ކަމަށާއި މިއަދަކީ “ބޮޑުތިލަދުންމަތި ބޮޑުކޮށް ދިއްލުމުގެ ފެށުން ފާހަގަކުރާ ދުވަސް” ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.

އިންޑިއާގެ ކޮޗިން އާއި ރާއްޖެއާ ދެމެދު މިހާރު ފަށާފައިވާ ފެރީ ދަތުރުގެ ތެރެއިން ފުރަތަމަ ދަތުރުގައި އިންޑިއާގެ ބޯޓު ހދ. ކުޅުދުއްފުށީގައި ބަނދަރުކުރުމާ ގުޅީގެން މިއަދު ބޭއްވި ވާޗުއަލް ރަސްމިއްޔާތުގައި ވާހަކަ ދައްކަވަމުން ޝާހިދު ވިދާޅުވީ އިންޑިއާގެ ފެރީ ކުޅުދުއްފުށީގައި ބަނދަރުކުރުމުން އެ ސިޓީ އާއި މުޅި ބޮޑުތިލަދުންމަތި ތަރައްގީކުރުމުގެ ބިންގާ އެޅިއްޖެ ކަމަށެވެ. އުތުރު ތަރައްގީކުރުމަށް މި ސަރުކާރުން ގެންގުޅެނީ ވަރަށް އުފާވެރި ވިސްނުމެއް ކަމަށާއި ފެރީގެ މަޝްރޫއަކީ ވެސް އެފަދަ މަޝްރޫއެއް ކަމަށެވެ.

advertisement

މިނިސްޓަރު ވިދާޅުވީ ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހަކީ ވައުދު ފުއްދަވާ ބޭފުޅެއްކަން މިއަދު ތާރީހުގައި ލިޔެވިގެން ހިނގައްޖެ ކަަމަށެވެ. ހުޅުވާލެވޭ މިފަދަ ކޮންމެ ފާލަމަކީ އެތައް ފައިދާއެއް ލިބިގެންދާ ކަމެއް ކަމަށާއި މި ފެރީގެ ފައިދާ އެތައް ގޮތަކުން ފެނިގެންދާނެ ކަމަށް ވެސް ޝާހިދު ވިދާޅުވިއެވެ.

ޝާހިދު ވިދާޅުވީ މާލެ އަށް ބަރޯސާވެގެން ކަންކަން ކުރަމުން އައި އައުން މި ފެރީގެ ސަބަބުން ނިމުމަކަށް ގެނެވޭނެ ކަމަށާއި މީގެ ނަތީޖާ މުސްތަގުބަލުގައި ފެނިގެންދާނެ ކަމަށެވެ. އަދި ފެރީގެ އިތުރުން އުތުރުގެ އަތޮޅުތައް ތަރައްގީކުރުމަށް ސަރުކާރުން ގެންގުޅެނީ އުފާވެރި މަޝްރޫއުތަކެއް ކަމަށް ވެސް މިނިސްޓަރު ވިދާޅުވިއެވެ. އެގޮތުން އިންޑިއާގެ އެހީތެރިކަމާ އެކު ހަނިމާދޫ އިންޓަނޭޝަނަލް އެއާޕޯޓް ތަރައްގީކުރުމުގެ މަސައްކަތްތައް ވެސް މިހާރު ފެށިގެން ގޮސްފައިވާ ކަމާއި ދިރާސާތައް ނިމި އަމަލީ މަސައްކަތް ދާދި އަވަހަށް ފެށިގެންދާނެ ކަަމަށް ވެސް ޝާހިދު ވިދާޅުވިއެވެ.

މިނިސްޓަރު ވިދާޅުވީ އެޕޯޓެއްގައި އިންޓަނޭޝަން ބޯޑު އެޅުވުމަކުން ނުފުދޭ ކަމަށާއި ސަރުކާރުން ބޭނުން ވަނީ ބައިނަލްއަގުވާމީ އެއާޕޯޓެއްގެ ގޮތުގައި ހަނިމާދޫ އެއާޕޯޓް ތަރައްގީކުރުމަށް ކަމަށެވެ. އަދި އެއާޕޯޓް ބޮޑުވެ ބޮޑެތި ބޯޓު ފަހަރުތައް ޖައްސައި ބޮޑުތިލަދުންމަތި ފަތުރުވެރިކަމުގެ މުއްސަނދިކަމުން ފުރާލަން ކަމަށް ވެސް މިނިސްޓަރު ވިދާޅުވިއެވެ.

ކޮޗިން އާއި ރާއްޖެއާ ދެމެދު ކުރާ ފެރީ ދަތުރު ރާއްޖެ އައިސް ފުރަތަމަ ބަނދަރުކޮށްފައި މިއަދު ހެނދުނު ކުޅުދުއްފުށީގައެވެ. އެ ބޯޓުން 500 ޓަނުގެ މުދާ ގެނެސްފައިވާ އިރު އެނބުރި އިންޑިއާ އަށް ދިއުމުގެ ކުރިން މާލޭގައި ވެސް ބަނދަރުކުރާނެއެވެ. މި ދަތުރުތައް ކުރާނީ އިންޑިއާގެ ގައުމީ ޝިޕިން ކުންފުނި އިންޑިއާ ޝިޕިން ކޯޕަރޭޝަން އިންނެވެ. ރާއްޖޭގެ އެޖެންޓެއްގެ ގޮތުގައި ހަރަކާތްތެރިވާނީ ގައުމީ ޝިޕިން ކުންފުނި މޯލްޑިވްސް ސްޓޭޓް ޝިޕިންއެވެ.