މިއަހަރުގެ މިހާތަނަށް 399252 ފަތުރުވެރިން ރާއްޖެ ޒިޔާރަތްކޮށްފި

މިއަހަރުގެ މިހާތަނަށް 399252 ފަތުރުވެރިން ރާއްޖެއަށް ޒިޔާރަތްކޮށްފައިވާކަމަށް ތަފާސްހިސާބުތަކުން ދައްކައިފިއެވެ. މީގެތެރެއިން 16405 ފަތުރުވެރިންނަކީ އަލުން ރާއްޖޭގެ ބޯޑަރު ހުޅުވާލުމުން ރާއްޖެ އައިސްފައިވާ ފަތުރުވެރިންނެވެ. އެއީ ޖުލައިމަހުގެ 15 ވަނަ ދުވަހުން މިމަހުގެ 23 ވަނަ ދުވަހުގެ ނިޔަލަށް ރާއްޖެ އައިސްފައިވާ ފަތުރުވެރިންނެވެ.

މިއަހަރުގެ ޖަނަވަރީ މަހު ރާއްޖެ އައިސްފައިވަނީ 173347 ފަތުރުވެރިންނެވެ. ފެބްރުއަރީ މަހު 149786 ފަތުރުވެރިން ރާއްޖެ އައިސްފައިވާއިރު މާރޗްމަހު ރާއްޖެ އައީ 59،627 ފަތުރުވެރިންނެވެ. އޭފްރީލް އަދި ޖޫން މަހު ރާއްޖެއަށް އެއްވެސް ފަތުރުވެރިއަކު އައިސްފައިނުވާއިރު މޭމަހު ރާއްޖެ އައީ 36 ފަތުރުވެރިންނެވެ.

ބޯޑަރު ހުޅުވާލި ޖުލައިމަހު ރާއްޖެ އައިސްފައިވަނީ 1752 ފަތުރުވެރިންނެވެ. އޮގަސްޓް މަހު 7628 ފަތުރުވެރިން ރާއްޖެ އައިސްފައިވާއިރު މިމަހުގެ 1 އިން 23 ގެ ނިޔަލަށް ޖުމްލަ 7076 ފަތުރުވެރިން ވަނީ ރާއްޖެ އައިސްފައެވެ.

advertisement

ރާއްޖޭގެ ބޯޑަރު ހުޅުވާލިފަހުން މިހާތަނަށް އެންމެ ގިނައިން ފަތުރުވެރިން ރާއްޖެ އައިސްފައިވަނީ ޔޫއޭއީ އިންނެވެ. އެއީ މުޅި ޖުމްލަ 2607 ފަތުރުވެރިންނެވެ. 1745 ފަތުރުވެރިންނާއިއެކު 2 ވަނަ އަށް އެންމެ ގިނަ އަދަދެއްގެ ފަތުރުވެރިން އައީ ރަޝިއާއިންނެވެ. 3 ވަނައިގައި އުޅެނީ އެމެރިކާއެވެ. އެމެރިކާއިން ޖުމްލަ 1597 ފަތުރުވެރިން ރާއްޖެ އައިސްފައިވާކަމަށް ތަފާސްހިސާބުތަކުން ދައްކައެވެ.