ބޮޑު މުސާރަ ލިބޭ ވަޒީފާތައް ދިވެހިންނަށް ލިބެންޖެހޭ: މިނިސްޓަރ މައުސޫމް

ޓުއަރިޒަމް ދާއިރާގެ ބޮޑު މުސާރަ ލިބޭ ވަޒީފާތައް ދިވެހިންނަށް ލިބެންޖެހޭ ކަމަށާއި އެކަމަށް މަސައްކަތް ކޮށްދެއްވާނެ ކަމަށް ޓުއަރިޒަމް މިނިސްޓަރު އަބްދުﷲ މައުސޫމް ވިދާޅުވެއްޖެއެވެ.

“ބޯޑާ މައިލްސް މޯލްޑިވްސް” ލޯންޗްކުރުމަށް ބޭއްވި ރަސްމިއްުޔާތުގައި ވާހަކަ ދައްކަވަމުވުން ޑރ. މައުސޫމް ވިދާޅުވީ ޓުއަރިޒަމް ދާއިރާގައި ދިވެހި އަންހެނުންގެ ހިއްސާ ވެސް ބޮޑުކުރަންޖެހޭ ކަމަށާއި ދަނޑުވެރިންނާއި ފަންނާނުންގެ ބައިވެރިވުން ވެސް އިތުރުކުރަންޖެހޭ ކަމަށެވެ. އަދި ސަރުކާރުން މަސައްކަތްކުރަނީ އެ މަގުން ކަމަށް ވެސް މިނިސްޓާރު ވިދާޅުވިއެވެ.

advertisement

މިނިސްޓަރު މިހެން ވިދާޅުވެފައިވާ އިރު ރިސޯޓްތަކުގެ މެނޭޖްމަންޓްގައި ބިދޭސީން އިތުރުވުމުގެ މައްސަލަތައް ޓުއަރިޒަމް ދާއިރާގައި މަސައްކަތްކުރާ އެކި ޖަމިއްޔާ ޖަމާއަތްތަކުން މީގެ ކުރިން ވަނީ ފާހަގަކޮށްފައެވެ. އަދި މަތީ ފަންތީގެ މަގާމުތައް ދިވެހިންނަށް ލިބޭނެ ގޮތް ހެދުމަށާއި އެކަމަށް އެކަށީގެންވާ ދިވެހިން ތަމްރީންކުރުމަށް މަގުފަހިކުރުމަށް ވަނީ ގޮވާލާފައެވެ.

މިނިސްޓަރު ވިދާޅުވީ ކޮވިޑް-19 ގެ ސަބަބުން ކުރިމަތިވެފައި މިވާ ހާލަތުން އަރައިގަތުމަށް ރާއްޖޭގެ ޓުއަރިޒަމް ހިންގައި އިގްތިސާދަށް ދިރުން ގެނައުމަށް މަސައްކަތްކުރައްވަމުން ގެންދަވާ ކަމަށެވެ. އަދި ރާއްޖޭގެ ބޯޑަރު ހުޅުވުމަށް ސަރުކާރުން ނިންމި ނިންމުމަކީ ވަރަށް ހިތްވަރުގަދަ ނިންމުމެއް ކަމަށް ވެސް މިނިސްޓަރު މައުސޫމް ވިދާޅުވިއެވެ.

މި ދަނޑިވަޅުގައި ރާއްޖެ އަންނަ ޓުއަރިސްޓުން އިތުރުކުރުމަށް ސަރުކާރުން އަންނަނީ މަސައްކަތްތަކެއް ކުރަމުންނެވެ. އެ ގޮތުން ދޭދޭ ގައުމުތަކާ ދެމެދު އެއާ ބަބްލް އުފައްދައި ވައިގެ ދަތުރުފަތުރުގެ ގުޅުން ބަދަހިކޮށް ރާއްޖެ އަންނަ ފްލައިޓްތައް އިތުރުކުރުމަށް އަންނަނީ މަސައްކަތް ކުރަމުންނެވެ. ޖުލައި 15ގައި ބޯޑު ހުޅުވާލުމާ ގުޅިގެން ރާއްޖެ އަންނަ ޓުއަރިސްޓުންގެ އަދަދު މިހާރު އަންނަނީ ދުވަހެއް ދުވަހަކަށް އިތުރުވަމުންނެވެ. އަދި ގިނަ ރިސޯޓްތަކެއް ވެސް އަންނަނީ އަލުން ހިދުމަތަށް ހުޅުވަމުންނެވެ.