މަގުމަތީގައީގައި ހިނގަން ވެސް ދުވަން ވެސް ދަސްކުރަންޖެހިފައި!

ފޮޓޯ އިން އެ ފެންނަނީ ބޭރު ގައުމެއްގެ ސަބްވޭއެއްގެ ސިޑިން ބަޔަކު އަރާ މަންޒަރެވެ. އެ ސިޑި އެ ވަނީ ދެ ބަޔަކަށް ބެހިފައެވެ. އެއް ފަޅި މީހުން އެރުމަށެވެ. އަނެއް ފަޅި ފައިބާ މީހުންނަށް ހާއްސަކޮށްފައެވެ. ދެ ބައި ބޭނުންކުރަން ވެސް ހުރަހެއް ނެތެވެ. ހަމައެކަނި ލިޔުމަކުން އެކަން ފާހަގަކޮށްފައިވާތީ އެ ކަމަށް އިހްތިރާމްކުރަނީއެވެ. ބޭނުން ނަމަ ކޮންމެ ފަޅިއަކުން ވެސް އަރަންވީއެވެ. ކޮންމެ ފަޅިއަކުން ވެސް ފައިބަންވީއެވެ. ނަމަވެސް ތަރައްގީ އާއި ތަހުޒީބާއި އަދަބު އަހްލާގުގެ ބަޔަކަށް ވާތީ ލިޔުމަކުން އަންގާފައިވާ އެންގުމަށް ބޯލަނބަނީއެވެ. ތަރައްގީއަކީ އެއީއެވެ.

ތަރައްގީއަކީ އިންސާނާ އަށް ވާ ގޮތެކެވެ. ވިސްނުމާއި ފިކުރަށް އަންނަ ބަދަލެކެވެ. އިންސާނާގެ އަދަބާއި އަހްލާގަށް ތަރައްގީ ނައިސް އުމްރާނީ ގޮތުން ކިތަންމެ ބިނާއެއް ހެދިޔަސް އޭގެ ހަގީގީ ފައިދާ އަށް ވުރެ ގެއްލުންތައް ބޮޑުވާނެއެވެ. މާލެއަކީ ރާއްޖޭގެ އެންމެ ތަރައްގީވެފައިވާ ތަނެވެ. ނަމަވެސް އިންސާނީ ތަރައްގީ އަށް ބަލާ ނަމަ އެކަން ސިފަކުރާނީ ކިހިނެއް ހެއްޔެވެ؟ ދިރިއުޅުމުގެ އާދަކާދަ އާއި އަދަބު އަހްލާގަށް ނަޒަރުކުރާ ނަމަ އެހެން ބުނެވެން އެބަ އޮތް ހެއްޔެވެ؟

advertisement

އުސް އިމާރާތްތައް ލޮލުކޮޅުން ގެއްލޭ ވަރަށް އުފުލެމުން ދިޔަ ނަމަވެސް ތޮއްޖެހިފައިވާ މި މާލޭގައި އިންސާނުންގެ އަދަބު އަހްލާގަށް މާ ބޮޑު ތަރައްގީއެއް އައިކަމާ މެދު ސުވާލު އުފެދެއެވެ. ހަމައެކަނި މަގުމަތީގެ އަދަބުތަކަށް ބަލައިލި ނަމަވެސް އެކަން ފާހަގަކުރެވޭނެއެވެ. މަގު ހިނގާ މީހުންނަށް ކަސްރަތަށް ނުކުމެ ދުވެ އުޅޭ މީހުން ވެސް ސަމާލުވާންޖެހޭ އެތައް ކަމެއް އެބަހުއްޓެވެ.

ހާއްސަކޮށް ކޮވިޑް-19 ފަދަ ފަސޭހައިން ގައިން ގަޔަށް އަރާ ބަލިމަޑުކަމެއްގެ ތެރޭގައި މަގުމަތީގެ އަދަބުތަކާ މެދު ވިސްނާލުން މުހިންމެވެ. އެންމެ ގިނަ ބަޔަކު އެކަކު އަނެކަކާ ބައްދަލުވެ އުޅޭ އެއް ތަނަކީ މަގުމައްޗެވެ. މި މާލެ އަށް ބަލާއިރު ކަސްރަތަށް ދުވުމަށާއި ހިނގުމަށް ނުކުންނަ މީހުންގެ އަދަދު ވަރަށް ގިނައެވެ. ބްރިޖާއި މާލެ ވަށައި ވެސް އެތައް ބަޔަކު ދުވެއެވެ. ކަސްރަތަށް ނުކުމެ އުޅޭ މީހުން މާސްކް އަޅަން ނުޖެހޭތީ ރައްކާތެރިކަމުގެ މާބޮޑު ފިޔަވަޅެއް އެ ތަންތާކު ނެތެވެ. އެކަކު އަނެއްކަކު ގައިގަ ޖެހޭ ގޮތަށް ދުވުމާއި ހިނގުމަކީ އާންމު ކަމެކެވެ. އަދި ބްރިޖްގައި ހިނގާ މީހުންނާއި ދުވާ މީހުންނަށް ހާއްސަކޮށްފައިވާ ހަނި ސަރަހައްދުގައި ދެ މީހަކު ދެ ކޮޅަށް ދުވާ ނަމަ ވެސް އެކަކު ގައިން ނެއްޓި ނުވަތަ ކޮވިޑްގެ ވައިރަސްގެ ނުރައްކާ ނުވާނެ ގޮތަކަށް އެކަން ކުރޭވޭނެ ގޮތެއް ނެތެވެ. ބްރިޖްގެ ދެ ފަޅި އޮތް ނަމަވެސް އެކި މަސައްކަތްތަކަށް ކޮންމެ ވެސް އެއް ފަޅިއެއް އަބަދު ވެސް ބަންދުކޮށްފައި އޮންނާތީ ތޮއްޖެހުން ބޮޑެވެ.

ކޮވިޑް ކޮންޓްރޯލްކުރުމަށް ގައިދުރުކަމާއި މާސްކް އެޅުން ފަދަ ކަންކަން އޮތް ނަމަވެސް ބްރިޖާއި މާލެ ވަށައި ދުވާ އެތައް ހާސް މީހުންގެ ކިބައިން މިއިން ކަމެއް ނުފެނެއެވެ. މީގެ އިތުރުން އަދަބު އަހްލާގު ވެސް ކުޑަކަން ފާހަގަ ކުރެވެއެވެ. ދުވާ އިރު އަނެކާގެ ގަޔަށް އޮށްދާ ފޮޅުމާއި ވާހަކަ ދައްކަމުން ކުޅު ބުރުވަމުން ދިޔުމާއި ނޭފަތް ފޮޅައި ކެއްސުމާއި ބީހެމުން ދިއުން ފަދަ ކަންކަން މިހާރު ވެސް ފެނެއެވެ. މިއީ ކޮވިޑްގެ ދުވަސް ވަރަށް ވީތީ ރައްކާތެރިވާންޖެހޭ ކަންކަމެއް ނޫނެވެ. މިއީ މަގުމަތީގެ އަދަބު އަހްލާގާ ގުޅިފައިވާ ކަންކަމެކެވެ. ވަކި ދުވަސްވަރަކަށް ވީތީ ސަމާލުވާންޖެހޭ ކަންކަމެއް ނޫނެވެ. މީހާގެ ކިބައިގައި ރަނގަޅު އާދަތައް އަށަގެންފައި ހުންނަ ނަމަ ވަކި ބަޔަކު އިރުޝާދު ނުދިނަސް އެކަން ކުރާނީ ތަރައްގީ އާއި ތަހުޒީބު ވެފައިވާ މުޖުތަމައުގައި ކަންކުރާ ގޮތަށެވެ. މަގެއް ހާމައަށް، ހިތަކަށް ލިބިފައި އޮތީތީ ހިތު ހުރި ގޮތަކަށް އަނެކާއާ މެދު ވިސްނާ ނުލައި އަމަލުކުރުމަކީ ތަރައްގީއެއް ނޫނެވެ. ސިޑިން ވަކި ކޮޅަކަށް އަރާ ފައިބަން ބުނެދޭނެ ފުލުހުންގެ މީހަކު ކޮންމެ ފަހަރަކު ހުންނާކަށް ނުޖެހެއެވެ.