ގެސްޓްހައުސް ހިންގާ ރަށްރަށުގެ މީހުން ބޭރަށް ނިކުންނައިރު މާސްކް އެޅުން މަޖުބޫރުކޮށްފި

ގެސްޓްތައް ހުޅުވުމުން ގެސްޓް ހައުސް ހިންގާ ރަށްރަށުގެ މީހުން ބޭރަށް ނިކުންނައިރު މާސްކު އަޅަން މަޖުބޫރުކޮށްފިއެވެ. މިގޮތައް ނިންމާފައިވަނީ އެޗްޕީއޭ އިން އާންމުކޮށްފައިވާ ޓޫރިޒަމް ސެކްޓާ އާއި ގުޅޭ އާ އެސްއޯޕީގައެވެ.

މި އެސްއޯޕީގައި ބުނެފައިވަނީ ގެސްޓް ހައުސްތައް ހުޅުވުމުން ގެސްޓް ހައުސް ހިންގާ ރަށްރަށުގެ މީހުން ބޭރަށް ނިކުމެ އުޅޭއިރު މާސްކު އަޅަން ޖެހޭނެ ކަމަށެވެ. އަދި ގިނަ މީހުން އެއްވެ އުޅޭ ތަންތަނުގައިވެސް މާސްކު އަޅަން ވަނީ ލާޒިމް ކޮށްފައެވެ.

advertisement

މި އެސްއޯޕީގައި ވާގޮތުން ގެސްޓްހައުސް ހުރި ރަށަކުން ގެސްޓްހައުސް ނެތް ރަށަކަށް ދާނަމަ 14 ދުވަހުގެ ކަރަންޓީނުގެ މުއްދަތު ފުރިހަމަކުރަންޖެހެއެވެ. ނަމަވެސް އާ އެސްއޯޕީގައި އެޗްޕީއޭގެ ހާއްސަ ހުއްދައެއްގެ ދަށުން ވަކި ބަޔަކަށް ކަރަންޓީން ނުވެ އެފަދަ ރަށްރަށަށް ދެވިދާނެ ކަމަށް ވަނީ ބުނެފައެވެ. އެއީ އިމާޖަންސީ ފަރުވާއެއް ހޯދުމަށް ނުވަތަ އެފަދަ މުހިންމު ކަމެއްގައި ދަތުރުކުރާނަމައެވެ. ނަމަވެސް ގެސްޓް ހައުސް ހިންގާ ރަށަކުން ގެސްޓް ހައުސް ހިންގާ ރަށަކަށް ދާނަމަ ކަރަންޓީންވާން ނުޖެހޭނެ އެވެ.

ގެސްޓް ހައުސް ހިންގާ ރަށަކުން ގެސްޓް ހައުސް ނުހިންގާ ރަށަކަށް އެއްވެސް ފަތުރުވެރިއަކަށް ނުދެވޭނެ އެވެ. ނަމަވެސް އެޗްޕީއޭގެ މޮނިޓަރިންގައި ނެތް ގެސްޓް ހައުސް ހިންގާ ރަށަކުން އެފަދަ އެހެން ރަށަކަށް ފަތުވެރިންނަށް ދަތުރު ކުރެވިދާނެކަމަށް މި އެސްއޯޕީގައި ވަނީ ބުނެފައެވެ.

ކޯވިޑަށް ޕޮޒިޓިވްވާ ފަތުރުވެރިންނާއި ކަރަންޓީންވާން ޖެހޭ ފަތުރުވެރިންނަށް ވަކި އަދަދަކަށް ކޮޓަރި ހާއްސަކުރަން ޖެހޭނެކަމަށް އައު އެސްއޯޕީގައި ވަނީ ބުނެފައެވެ. އެ ކޮޓަރިތައް ބަހައްޓަން ޖެހެނީ އެ ކަމަށް ހާއްސަކޮށްގެންނެވެ.

އަންނަ މަހުގެ 15 ވަނަ ދުވަހު ރަށްރަށުގެ ގެސްޓްހައުސްތައް ހުޅުވާލަން ސަރުކާރުން މިހާރު ވަނީ ހުއްދަދީފައެވެ.