އިންޑިއާގެ ހަދިޔާތައް: މި ސަރުކާރަށް ފޫޅުކެނޑޭކަށް ނެތް!

އިންޑިއާއަކީ އަބަދު ވެސް ދިވެހިންގެ މިތުރެކެވެ. އެއީ ސާބިތުކޮށްދޭން އިތުރު ހެކިތަކެއް ބޭނުންވާ ކަމެއް ނޫނެވެ. އެއީ ދިވެހިން ސަރަހައްދީ ރޮނގު ހުރަސްކޮށް ދަތުރުކުރަން ފެށި ޒަމާނުން ފެށިގެން ވެސް އެކަން އޮތް ގޮތެވެ. ތަފާތު އެކި ދުވަސްވަރު އެކި ކަންކަމުގައި ކުނި ޖެހުނަސް ރައްޔިތުންނާއި ރައްޔިތުންގެ މެދުގައި އޮތީ ހިތާ ހިތުގެ ގުޅުމެކެވެ. އެ ގުޅުން އޮތް މިންވަރުގެ ހާމަކަން ފެންނަނީ އެ އިރެއްގައި އޮންނަ ސަރުކާރެއްގެ ސިޔާސަތުންނެވެ.

ދިވެހި ރާއްޖެއާ ކަނޑުގެ ގޮތުން އިންވެގެން އޮތް ގައުމަކަށް ވުމުން ކަމަށް ވެސް ވެދާނެއެވެ. އަދި ސަރަހައްދުގައި ބާރުގަދަ އަދި ދުނިޔޭގެ ނިސްބަތުން ވެސް ބިޔަ ގައުމަކަށް ވުމާއި ގައުމެއްގެ ހައިސިއްޔަތުން ދިވެހި ރާއްޖެ އަށް ވުރެ އިގްތިސާދީ އަދި ވަސީލަތްތަކުގެ ގޮތުން ވެސް މުއްސަނދި ގައުމަކަށް ވުމުން އިންޑިއާ އިން އަބަދު ވެސް އައީ ރާއްޖެ އަށް އެހީތެރިވެ “ހިމާޔަތް” ފޯރުކޮށްދެމުންނެވެ. އަޅުވެތިކަމަކުން ދިވެހިން ސަލާމަތްކުރުމުގައި ވެސް ތާރީހުގައި ނަން އޮތީ އިންޑިއާގެ ނަމެވެ. އެއީ ބަދަލުވާނެ ކަމެއް ނޫނެވެ.

advertisement

ވިސްނަންޖެހޭ ކަމަކީ މިއެވެ. ބަޔަކު އެހީތަކެއް ދޭ ނަމަ އޭގެ އަގު ވަޒަންކުރާނެކަމުގެ ކޮންމެ ވެސް ވަރެއްގެ އުންމީދެއް ވެސް ކުރާނެއެވެ. އެހެން ނަމަވެސް އޭގެ ބަދަލުގައި ގައުމުގެ މައްޗަށް ވެރިވެ ގަތުމަކީ އޮތް ފުރުސަތެއް ނޫނެވެ. ދިވެހިން އަދި ދިވެހި ސަރުކާރަކުން ވެސް އެކަމަކަށް ފުރުސަތެއް ނުދޭނެއެވެ. އަދި ދޭކަށް ނުވެސް އުޅެއެވެ.

އިންޑިއާގެ ކަނޑުގެ ސަރަހައްދުގައި އިންޑިއާގެ މަސްލަހަތު އޮތްކަން އެއީ ވެސް ހަގީގަތެކެވެ. އިގްތިސާދީ އަދި އަސްކަރީ ގޮތުން ވެސް ދުނިޔޭގެ ބާރު ގަދަ ގައުމުތަކުގެ ތެރޭގައި އިންޑިއާ ހިމެނޭ އިރު ބައިނަލްއަގުވާމީ ދުނިޔޭގައި އެ ބާރު ދެމެހެއްޓުމަށް އިންޑިއާ އިން އަބަދުވެސް މަސައްކަތްކުރާނެއެވެ. އެކަން ކުރުމަށްޓަކައި ބައިނަލްއަގުވާމީ މަސްރަހުގައި ބޮޑެތި ގައުމުތަކަކޭ އެއްގޮތަށް ރާއްޖެ ފަދަ ކުދި ގައުމުތަކުގެ އެހީ އާއި އެއްބާރުލުން އިންޑިއާ އަށް ވެސް ބޭނުން ވެއެވެ. އެހެންކަމުން ކުދި ގައުމުތައް ހާއްސަކޮށް ރާއްޖެ ފަދަ އަވަށްޓެރި ގައުމުތަކުގެ ހިތް ރުއްސުމަކީ ވެވުނު ވަރަކުން ކުރާނެ ކަމެކެވެ. އެއީ ކޮންމެހެން އެ ގައުމުތަކުގެ މައްޗަށް ވެރިވެ ގަނެ، ހަންފެތުރުުގެ ބޭނުމުގައި ކުރާ ކަމެއް ނޫނެވެ.

ރާއްޖެ އަށް އިގްތިސާދީ އަދި އަސްކަރީ ގޮތުން ވެސް އިންޑިއާ އިން އަންނަނީ އެހީތެރިކަން ފޮރުކޮށްދެމުންނެވެ. މި އެހީތަކުގެ ކުޑަބޮޑު މިން ބިނާވަނީ އެއިރެއްގައި އޮންނަ ސަރުކާރަކުން ނުވަތަ ވެރިކަމުގައި ތިބޭ ފަރާތްތަކުކުން ގުޅުން ބާއްވާ މިންވަރެއްގެ މައްޗަށެވެ. އެ ގޮތުން ކުރީގެ ސަރުކާރުތަކުން ވެސް އަދި މި ސަރުކާރުން ވެސް އިންޑިއާއާ އެކު ބާއްވަނީ ގާތް ގުޅުމެކެވެ. ކުރީގެ ރައީސް އަބްދުﷲ ޔާމީންގެ ވެރިކަމުގައި ވެސް އިންޑިއާއާ އެކު ގާތް ގުޅުމެއް އޮތެވެ. ނަމަވެސް “ބޭނުންވާހާ ގޮތަކަށް” ކަންކަން ނުހިނގާތީ އެ ފުރުސަތު ދޭ ގައުމަކާ ދިމާ އަށް އެ ސަރުކާރުން ދިޔައީ އަތް ދިއްކުރަމުންނެވެ. އެ ގޮތުން ޗައިނާއާ އެކު ބޭއްވި “މާވަރުގަދަ” ގުޅުމެއްގެ ސަބަބުން އިންޑިއާއާ އެކު އޮތް ގުޅުމަށް ކޮންމެ ވެސް ވަރެއްގެ ބުރުލެއް އެރިއެވެ. ނަމަވެސް އެއީ އިންޑިއާ އިން ދެމުން ގެންދިޔަ އެހީތަކަށް ހުއްޓުމެއް އައި ކަންކަމެއް ނޫނެވެ.

ކުނިތަކެއް ޖެހުނު ނަމަވެސް ކުރީގެ ސަރުކާރުން ވެސް އައީ އެކި ކަންކަމުގައި އިންޑިއާގެ އެހީތެރިކަމަށް އެދެމުންނެވެ. އެ ގޮތުން އަސްކަރީ ގާބިލްކަން އިތުރުކުރުމުގެ އެހީތެރިކަން ހިމެނެއެވެ. މިއަދު ހދ. ހަނިމާދޫ އަށް އައިސް ޖެއްސި ޑޯނިއާގެ މަތިންދާބޯޓާ ގުޅިގެން ރައީސް ޔާމީން ސަރުކާރުގެ އިސްވެރިން މާ މޮޅެތި ވާހަކަތައް ދައްކާ އިރު ހަގީގަތް އޮތީ ދިމާ އިދިކޮޅަށެވެ. އެ ބޯޓަކީ ވެސް އެކަމާ ދެކޮޅަށް މިއަދު އަޑު އުފުލާ ފަރާތްތައް އިސްވެ ތިބެ ކުރި މަޝްވަރާތަކުގެ ނަތީޖާއެވެ.

އެފަދަ ބޯޓެއްގެ މުހިންމުކަމުގެ ވާހަކަ އެންމެ ފުރަތަމަ އިންޑިއާއާ އެކު ހިއްސާކޮށްފައި ވަނީ ވެސް ރައީސް ޔާމީންގެ ސަރުކާރުންނެވެ. ލިޔެކިޔުންތަކުން އެނގެން އޮތް ގޮތުގައި 2013 ވަނަ އަހަރު ވެރިކަމަށް އައިސް މާ ގިނަ ދުވަހެއް ނުވެ އޭރުގެ ސަރުކާރުން 2014 ވަނަ އަހަރު އޭރުގެ ޑިފެންސް މިނިސްޓަރު ކާނަލް ރިޓަޔަޑް މުހައްމަދު ނާޒިމް އިންޑިއާ އަށް ކުރެއްވި ދަތުރުފުޅެއްގައި އެކަން އިންޑިއާ ސަރުކާރާ އެކު ހިއްސާކުރެއްވިއެވެ.

އޭގެ ފަހުން ދެ ގައުމުގެ މެދުގައި ބޭއްވި އަސްކަރީ ގުޅުންތަކުގެ ގިނަ ބައްދަލުވުންތަކެއްގައި އެ މަޝްވަރާތައް ކުރެވުނެވެ. އަދި 2016 ވަނަ އަހަރު ރައީސް ޔާމީން އިންޑިއާ އަށް ކުރެއްވި ރަސްމީ ދަތުރުފުޅުގައި އެޖެންޑާކުރެވި ރަސްމީކޮށް ޑޯނިއާ މަތިންދާބޯޓެއްގެ އެހީތެރިކަމަށް ދިވެހި ސަރުކާރުން އެދުނެވެ. އޭގެ ފަހުން އިންތިހާބުން ވެރިކަން ބަދަލުވުމާ ހަމައަށް ވެސް އެކި ފަންތީގެ ބަންދަލުވުންތަކުގައި އެކަމާ ގުޅޭ ތަފާތު މަޝްވަރާތައް އައީ ކުރެވެމުންނެވެ. އެހެން ބަހަކުން ބުނާ ނަމަ ވެރިކަން ބަދަލުވި އިރު އެކަން އޮތީ ގާތްގަނޑަކަށް ހަގީގަތަކަށް ވުމާ ހަމައިގައެވެ. އަދި އެފަދަ ބޯޓަކަށް ބޭނުންވާ ތަމްރީނުތައް ދިވެހިންނަށް ދޭން ވަނީ ފެށިފައެވެ. އެހެންކަމުން ޑޯނިޔާ މަތިންދާބޯޓަކީ މި ސަރުކާރަށް ފޫޅު ކެނޑެއް އޮތް ކަމެއް ނޫނެވެ. މި ސަރުކާރުން ކުރިހާ ވެސް ކަމަކީ ކުރީ ސަރުކާރުން އިންޑިއާއާ އެކު ކުރަމުން އައި މަޝްވަރާތަކަށް އިހްތިރާމްކުރުމެވެ. އަދި ދައުލަތަކުން ވެފައިވާ އެއްބަސްވުމަކަށް އަމަލުކޮށް އަދި އެއީ ގައުމެއްގެ ހައިސިއްޔަތުން ވެސް ގިނަ ގުނަ ފައިދާ ކުރާނެ ކަމަކަށް ވާތީ އެ މަގުން ކަންކުރުމެވެ. މަގު ދައްކައި އެ މަގު ތަނަސްވަކޮށްދިނީ މިހާރު އެކަމާ ދެކޮޅަށް އެންމެ ބޮޑަށް އަޑު އުފުލާ ފަރާތްތައް ވެރިކަމުގައި ތިބެއެވެ.

މި މަތިންދާބޯޓާއި އަދި ކުރީ ސަރުކާރުގައި ވެސް ބޭނުންކުރަމުން ދިޔަ އިންޑިއާގެ ދެ ހެލިކޮޕްޓަރުން ފައިދާ ވަނީ ވަކި ބަޔަކަށް ނޫނެވެ. އޭގެ ފައިދާ އޮތީ މުޅި ގައުމަށެވެ. ބަލިވެ ހާލުގައި ޖެހި ގޮތެއް ނެތިފައި ތިބި އެތައް ބައެއްގެ ފުރާނަ ސަލާމަތްވުމުގައި މީގެ ކުރިން ވެސް މެދުވެރިއަކަށް ވެފައި އޮތީ އިންޑިއާ ސަރުކާރުގެ ދެ ހެލިކޮޕްޓަރެވެ. އެ ތަކެތި ދުއްވައި އޮޕަރޭޓްކުރާ އަދި މަރާމާތުކުރުމަށް އިންޑިއާ ސަރުކާރުގެ އެހީގައި އިންޑިއާގެ ޓެކްނިކަލް މީހުން ހަރަކާތްތެރިވާން ފެށީ މި ސަރުކާރު އައި ފަހަކުން ނޫނެވެ. މިދިޔަ ސަރުކާރުގައި ވެސް އެކަން އޮތީ އެހެނެވެ. އަދި އެތަކެތި އޮޕަރޭޓްކުރަން ދިވެހި ތަމްރީނުގެ މަސައްކަތް ވެސް ފެށިފައި އޮތީ މި ސަރުކާރުގައެއް ނޫނެވެ. ކުރީގެ ސަރުކާރުގައި ވެސް އެކަން އޮތީ އެހެންނެވެ. އިންޑިއާގެ ހަދިޔާތަކަށް ދިވެހިން އާބަސް ބުނަން ފެށީ އިއްޔެއަކު މިއަދަކު ނޫނެވެ. ނުވަތަ އެއީ ވަކި ސަރުކާރެއް އޮތުމުން ވާ ކަމެއް ވެސް ނޫނެވެ. ދިވެހި ފަސްގަނޑުން ކައިވަތެއް ދިނުމަށް ވެސް ދިވެހިން ނޭދެއެވެ. ނަމަވެސް ދިވެހި ފަސްގަނޑު ބޭރު ބަޔަކަށް މިލްކު ކުރެވޭނެ ގޮތަށް ގާނޫނުއަސާސީ އިސްލާހުކޮށް އެ ގޮތަށް އަމަލުކުރަން މަސައްކަތްކުރި ކުރީގެ ސަރުކާރު އިސް ވެރިން މިއަދު ނުކުމެ، އެ އިސްލާހު ބާތިލްކުރި މީހުންނަށް ފޫޅުކަނޑައި “ދިވެހި ބިން މިއީ މަގޭ އުފަން ބިން” ލަވަ ކިޔައި “އިންޑިއާއައުޓް” އޭ ކިޔަކަސް އެއީ ގަބޫލުކުރަން ފަސޭހަ ކަމެއް ނޫނެވެ. ހަގީގަތް އެހުރީ ލިޔެވި ފެންނާށެވެ.