މޯލްޑިވްސް ވަރޗުއަލް ޓުއަރގެ މެއިން ސްޕޮންސަރަކަށް އުރީދޫ ހަމަޖައްސައިފި

މޯލްޑިވްސް ވަރޗުއަލް ޓުއަރގެ މެއިން ސްޕޮންސަރަކަށް އުރީދޫ މޯލްޑިވްސް ހަމަޖައްސައިފިއެވެ.

މޯލްޑިވްސް ވަރޗުއަލް ޓުއަރއަކީ ރާއްޖޭގެ މަންޒަރުތައް 360 ޑިގްރީގައި ވަރޗުއަލްކޮށް ފެންނާނެ ޓުއަރއެކެވެ. މި ޓުއަރގެ ތެރެއިން ރާއްޖޭގެ 150 އާއި ގާތްކުރާ އަދަދަކަށް ރަށުގެ 2000 ޓުއަރ ހަދާނެއެވެ.

advertisement

މޯލްޑިވްސް ވަރޗުއަލް ޓުއަރ ގެ ސަބަބުން ފަތުރުވެރިން ރާއްޖެ އައުމުގެ ކުރިން އެމީހުންނަށް ރާއްޖޭގެ ރީތި މަންޒަރުތައް ވާޗުއަލްކޮށް ފެންނާނެއެވެ.  

އުރީދޫގެ މެނޭޖިންގ ޑިރެކްޓަރ އަދި ސީއީއޯ ނަޖީބް ހާން ވިދާޅުވީ، މޯލްޑިވްސް ވަރޗުއަލް ޓުއަރގެ މެއިން ސްޕޮންސަރަކަށް ވުމުން އުރީދޫއިން އުފާވާކަމަށެވެ. ރާއްޖޭގެ ރީތި ރަށްތަކުގެ 360 ޑިގްރީ ވަރޗުއަލް ޓުއަރއެއް ހެދުމަކީ ރާއްޖެ ޑެސްޓިނޭޝަންއެއްގެ ގޮތުގައި ޕްރޮމޯޓްކުރުމަށް ވަރަށް މުހިންމު ކަމެއްކަން އޭނާ ފާހަގަކުރެއްވިއެވެ. މި ޕްރޮޖެކްޓްގެ ސަބަބުން ދުނިޔޭގެ އެކި ކަންކޮޅުތަކުގެ ފަތުރުވެރިންނަށް ރާއްޖެ އިޝްތިހާރު ވެގެންދާނެކަން ނަޖީބް ވިދާޅުވިއެވެ. އޭނާ އިތުރަށް ވިދާޅުވީ، އޯރކާ މީޑިއާގެ މި މަސައްކަތުގައި ޕާޓްނަރެއްގެ ގޮތުގައި ބައިވެރިވެ ރާއްޖޭގެ ފަތުރުވެރިކަން ޕްރޮމޯޓްކުރުމަށް އެހީވެދެވޭތީ އުރީދޫއިން އުފާވާކަމަށެވެ.

މި ވެވުނު ޕާޓްނަރޝިޕްގެ ދަށުން އުރީދޫ މޯލްޑިވްސްއިން ރާއްޖޭގެ ފަތުރުވެރިކަން ޕްރޮމޯޓްކުރުމަށް އެހީތެރިވެދޭނެއެވެ. އުރީދޫ މޯލްޑިވްސްއިން ވަނީ ދާދިފަހުން ރާއްޖޭގެ ފަތުރުވެރިކަން ޕްރޮމޯޓްކުރުމަށް ޙާއްސަ ކެންޕެއިނެއްވެސް ފަށާފައެވެ. “ވިޒިޓް މޯލްޑިވްސް ނައު” ގެ ނަމުގައި ފެށި މި ކެންޕެއިނަކީ ދުނިޔޭގެ 10 ގައުމެއްގެ 117 މިލިއަން މީހުންނަށް ރާއްޖެ ޕްރޮމޯޓްކުރުމަށް ފެށި ކެންޕެއިނެކެވެ.

މޯލްޑިވްސް ވަރޗުއަލް ޓުއަރ ޕްރޮޖެކްޓް ރަސްމީކޮށް ލޯންޗްކުރުމަށް ހަމަޖެހިފައިވަނީ މިއަހަރުގެ ޓީޓީއެމް ޓްރެވެލް ސަމިޓްގެ ތެރެއިންނެވެ. މި ޕްރޮޖެކްޓް ނިންމުމަށް ހަމަޖެހިފައިވަނީ އަންނަ އަހަރުގެ ތެރޭގައެވެ.

މޯލްޑިވްސް ވަރޗުއަލް ޓުއަރ އަކީ އޯރކާ މީޑިއާއިން ކުރިއަށްގެންދާ ޕްރޮޖެކްޓެކެވެ. މި ޕްރޮޖެކްޓްގައި ޓޫރިޒަމް މިނިސްޓްރީއާއި މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަންއިންވެސް ވަނީ ބައިވެރިވެފައެވެ.