މާލެ ސަރަހައްދުގައި އެއްގަމު އުޅަނދު ދުއްވޭ ވަގުތައް ބަދަލުގެނެސްފި

މާލެ ސަރަހައްދުގައި އެއްގަމު އުޅަނދު ދުއްވޭ ވަގުތައް ބަދަލުގެނެސްފިއެވެ.

މާލެ ސަރަހައްދުގައި ކޯވިޑް-19 ހުއްޓުވުމަށް އެޅި ފިޔަވަޅެއްގެ ގޮތުން، ރޭގަނޑު 8:00 އިން ފަތިހު 5:00 އަށް އެއްގަމު އުޅަނދުފަހަރު ދުއްވުން އެޗްޕީއޭއިން ވަނީ މަނާކޮށްފައެވެ. ނަމަވެސް މިހާރު މި ވަގުތައް ވަނީ ބަދަލު ގެނެސްފައެވެ. އެޗްޕީއޭއިން ވިދާޅުވީ މިހާރު މާލޭ ސަރަހައްދުގައި އެއްގަމު އުޅަނަދު ފަހަރު ދުއްވުން މަނާވާނީ ރޭގަނޑު 10:00 އިން ފެށިގެން ފަތިހު 05:00 އަށްކަމަށެވެ.

މާލެ ސަރަހައްދުގައި އެއްގަމު އުޅަނދު ދުއްވުން މަނާކޮށްފައި އޮތް ވަގުތައް ބަދަލުގެނައި ނަމަވެސް ބޭރަށް ނިކުތުން މަގާ ވަގުތައް އަދި ބަދަލެއް ނުގެނެއެވެ. އެހެންކަމުން މާލެ ސަރަހައްދުގައި ރޭގަނޑު 22:00ން ފަތިހު 5:00 އަށް ބޭރަށް ނުކުމެ އުޅުން އަދި މަނާ ވާނެކަމަށް އެޗްޕީއޭއިން ވިދާޅުވެއެވެ.

މާލެ ސަރަހައްދުގައި ކޯވިޑް-19އަށް ޕޮޒިޓިވްވާ މީހުންގެ އަދަދު އިތުރުވަމުން ދިޔުމާއި ގުޅިގެން، ރޭގަނޑު 8:00 އިން ފަތިހު 5:00 އަށް އެއްގަމު އުޅަނދުފަހަރު ދުއްވުން މަނާކުރީ 22 އޮގަސްޓް އިން ފެށިގެންނެވެ.

ރޭގަނޑު އެއްގަމު އުޅަނދު ދުއްވުން މަނާކުރުމުގެ އެންމެ މުހިއްމު ބޭނުމަކީ އެންމެ ބޮޑަށް ބަލި ފެތުރޭކަމަށް ރެކޯޑުކުރެވިފައިވާ ޒުވާނުންގެ އެއްވުންތައް ވީހާވެސް މަދުކުރުންކަމަށް އެޗްޕީއޭއިން ވަނީ ހާމަކޮށްފައެވެ.

advertisement