ބްރޯޑްކާސްޓިންގ އާއި ރީ-ބްރޯޑްކާސްޓިންގ ލައިސަންސަށް އެދުމުގެ ފުރުސަތު ހުޅުވާލައިފި

ބްރޯޑްކާސްޓިންގ އާއި ރީ-ބްރޯޑްކާސްޓިންގ ލައިސަންސަށް ހުށަހެޅުމުގެ ފުރުސަތު މޯލްޑިވްސް ބްރޯޑްކާސްޓިންގ ކޮމިޝަނުން މިއަދު ހުޅުވާލައިފިއެވެ.

ބައިނަލްއަގުވާމީ ބްރޯޑްކާސްޓިންގ ދުވަހުގެ މުނާސަބަތުގައި ބްރޮޑްކޮމް އިން މިއަދު ވާޗުއަލްކޮށް ބޭއްވި ނޫސްވެރިންގެ ބައްދަލުވުމުގައި އެ ކޮމިޝަންގެ ރައީސް މަރިޔަމް ވަހީދާ ވިދާޅުވީ ބްރޯޑްކާސްޓިންގ އާއި ރީ-ބްރޯޑްކާސްޓިންގެ ލައިސަންސް އަށް އެދުމުގެ ފުރުސަތު ހުޅުވައިލުމަށް އެ ކޮމިޝަނުން ނިންމީ އެކަމަށް ގިނަ ބަޔަކު އެދެމުންދާތީ ކަމަށެވެ. ބްރޮޑްކޮމްގެ ގާނޫނުގައި ބުނަނީ ބްރޯޑްކާސްޓިންގ ލައިސަންސް ދޫކުރެވޭނީ އެކަމަށް އެދި ހުޅުވާލުމުން ކުރިމަތިލާ ފަރާތްތަކަށް ކަމަށެވެ. އަދި މާލެ ސަރަހައްދުގައި ރީ-ބްރޯޑްކާސްޓިންގެ ހިދުމަތް ދެވޭނީ ވެސް ކޮމިޝަނުން ހުޅުވައިލުމުން ކުރިމަތިލާ ފަރާތްތަކަށް ކަމަށް ގާނޫނުގައި ބުނެފައި ވެއެވެ. ނަމަވެސް މާލެ ނޫން ސަރަހައްދުތަކުގައި ރީ-ބްރޯޑްކާސްޓްކުރުމުގެ ޚިދުމަތް ދިނުމަށް ކޮންމެ ވަގުތަކު ވެސް ހުށަހެޅިދާނެއެވެ.

advertisement

ކޮމިޝަނުން ބުނީ އެހެން ފަހަރުތަކާ ހިލާފަށް މި ފަހަރު ފުރުސަތު ހުޅުވައިލީ ދިގު މުއްދަތަކަށް ކަމަށާއި އޭގެ ބޭނުމަކީ އެކަން ކުރަން ބޭނުންވާ ފަރާތްތަކަށް ވީހާ ވެސް ފަސޭހައިން ލައިސަންސް ލިބޭނެ މަގު ފަހުކުރުން ކަމަށެވެ. އެ ގޮތުން ލައިސަންސަށް އެދުމުގެ ފުރުސަތު ކުރިއަށް އޮތް ފަސް އަހަރު ދުވަހު ވެސް އޮންނާނެ އެވެ.

މީގެ ކުރިން ލައިސަންސަށް ހުޅުވާލަނީ ކުރު މުއްދަތަކަށް ކަމަށް ވުމުން އެ މުއްދަތުގައި މަދު ބަޔަކު ނަގާ ލައިސަންސްތައް ފަހުން އަގު ބޮޑުކޮށް “ބްލެކް މާކެޓްގައި” ވިއްކުމުގެ މައްސަލަ ފާހަގަކުރެވިފައި ވެއެވެ. ނަމަވެސް ދިގު މުއްދަތަކަށް ހުޅުވައިލުމުން ބައެއްގެ ލައިސަންސް އަގު ބޮޑުކޮށް ގަތުމުގެ ބަދަލުގައި ސީދާ ކޮމިޝަނަށް ހުށަހަޅައިގެން ލައިސަންސް ހޯދުމުގެ ފުރުސަތު ތަނަވަސް ވެގެންދާނެއެވެ.

މީގެ އިތުރުން ކޮމިޝަނުން ވަނީ މީގެ ކުރިން ބޭނުންކުރަމުން އައި މީޑިއަމްތަކުގެ ތެރެއަށް އިންޓަނެޓް ވެސް ހިމަނާފައެވެ. މިގޮތަށް ބަދަލުކުރުމުން މިހާރު ވެސް އިންޓަނެޓް މެދުވެރިކޮށް ހިންގަމުން އަންނަ ޗެނެލްތަކާއި މީޑިއާތަކަށް ލައިސަންސަށް އެދުމުގެ ފުރުސަތު ހުޅުވިގެންދާނެއެވެ. މީގެ ކުރިން ބްރޯޑްކާސްޓިންގެ ހިދުމަތް ދިނުމުގައި މީޑިއަމްތަކުގެ ގޮތުގައި ބްރޯޑްކޮމް އިން މީޑިއަމްތަކުގެ ގޮތުގައި ބަލަމުން އައީ ޓެރެސްޓްރިއަލް އާއި ކޭބަލް ނެޓްވޯކް، ސެޓެލައިޓް، މޯބައިލް ނެޓްވޯކް އެކަންޏެވެ. ނަމަވެސް މިހާރު އިތުރު ބަދަލުވަމުން އަންނަ ޓެކްނޮލޮޖީއާ އެކު މީޑިއަމްތައް ފުޅާކުރެވިގެންދާ ގޮތަށް ވަނީ ފުރުސަތު ހުޅުވާލާފައެވެ. އަދި މިހާރު ހިދުމަތް ދޭ ފަރާތްތަކަށް ވެސް އާ ފޯމެޓަށް ބަދަލުކުރުމުގެ ފުރުސަތު އަންނަ އަހަރުގެ އޭޕްރީން 3 އާ ހަމައަށް އެއްވެސް އަގަކާ ނުލައި ވަނީ ހުޅުވާލާފައެވެ.

ބްރޮޑްކާސްޓިން އާއި ރީ-ބްރޯޑްކާސްޓިންގެ ދާއިރާ ކުރިއަރުވައި ތަރައްގީކުރުމަށް ބްރޮޑްކޮމް އިން ވަނީ އާ މަސައްކަތްތަކެއް ފަށާފައެވެ. އަދި ގާނޫނާއި ގަވާއިދުތަކަށް ގެންނަންޖެހޭ ބަދަލުތައް ގެނައުމުގެ މަސައްކަތް އަންނަނީ ކުރަމުންނެވެ.