ބްރޮޑްކޮމް އާއި އެމްއެމްސީ އެއްކޮށްލައި އޮތޯރިޓީއެއް!

މޯލްޑިވްސް ބްރޯޑްކާސްޓިން ކޮމިޝަން (ބްރޮޑްކޮމް) އާއި މޯލްޑިވްސް މީޑިއާ ކައުންސިލް (އެމްއެމްސީ) އެއްކޮށްލުމަށް ފަހު މޯލްޑިވްސް މީޑިއާ އެންޑް ބްރޯޑްކާސްޓިން އޮތޯރިޓީގެ ނަމުގައި ވަކި އިދާރާއެއް އުފެއްދުމަށް ބިލަށް ހުށަހެޅުމަށް ނިންމައިފިއެވެ.

މަޖިލީހުގެ މި ދައުރަށް ދައުލަތުގެ ފަރާތުން ހުށަހަޅާ 20 ބިލްގެ މައުލޫމާތު އެޓާނީ ޖެނެރަލް އޮފީހުން ހާމަކޮށްފައިވާ އިރު އޭގެ ތެރޭގައި މޯލްޑިވްސް މީޑިއާ އެންޑް ބްރޯސްކާސްޓިން އޮތޯރިޓީ ވެސް ހިމެނެއެވެ. ނަމަވެސް މިއީ މިހާރު އޮތް ކޮމިޝަނާއި ކައުންސިލް އުވާލުމަށް ފަހު މުޅިން އާ އޮތީރިޓީއެއް ވުޖޫދަށް ގެނައުމަށް ހުށަހަޅާ ބިލެއްތޯ ނުވަތަ ދެ ކޮމިޝަން އެއްކޮށްލުމަށް ހުށަހަޅާ ބިލެއްކަން އަދި ވަނީ ސާފު ނުވެއެވެ. އޭޖީ އޮފީހުން ބުނީ ކޮންމެ ބިލެއް ވެސް މަޖިލީހަށް ފޮނުވުމަށް ފަހު އޭގެ މައުލޫމާތު އާންމުކުރާނެ ކަމަށެވެ.

advertisement

އެމްއެމްސީ އާއި ބްރޮޑްކޮމް އެއްކުލުމާ ގުޅޭ ބިލަކާ ބެހޭ ގޮތުން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ވެސް މަޝްވަރާތަކެއް ކުރިއެވެ. އަދި މީޑިއާތަކާއި ކަމާ ބެހޭ ފަރާތްތައް ކޮމިޓީ އަށް ހާޒިރުކޮށް ވެސް މައުލޫމާތު ހޯދާފައި ވެއެވެ. އަދި ކޮމިޓީ އަށް ފެންނަ ކަންތައްތައް އޭޖީ އޮފީހަށް ވަނީ ހުށަހަޅާފައެވެ. އޭޖީ އޮފީހަށް އެ ކޮމިޓީން ކުރިން ހުށަހަޅާފައި ވަނީ އެމްއެމްސީ އާއި ބްރޮޑްކޮމްގެ އިތުރުން އިންފޮމޭޝަން ކޮމިޝަނަރގެ އޮފީސް ވެސް ހިމެނޭ ގޮތަށް މީޑިއާ ކޮމިޝަނެއް އުފެއްދުމަށެވެ. ނަމަވެސް އެނގިފައިވާ ގޮތުގައި ދައުލަތުގެ ވިސްނުން ހުރީ އައިކޮމް މިހާރު ވެސް އޮތް ގޮތަށް ބޭއްވުމަށެވެ.