އުލިގަމުގައި ސިޓީ ހޮޓަލާއި ޔޮޓް މެރީނާއެއް ތަރައްގީކުރުމަށް ހުޅުވާލައިފި

މޯލްޑިވްސް ޓުއަރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ)ގެ ފަރާތުން މީގެ ކުރިން ހއ. އުލިގަމުގައި ތަރައްގީކުރުމުގެ މަސައްކަތް ކުރި ސިޓީ ހޮޓަލާއި ޔުޓް މެރީނާއެއް ހެދުމުގެ މަސައްކަތް ބައިނަލްއަގުވާމީ ބީލަމަށް ހުޅުވާލައިފިއެވެ.

ޓުއަރިޒަމް މިނިސްޓްރީގެ ފަރާތުން މި މަޝްރޫއު ބީލަމަށް ހުޅުވާލާފައި ވަނީ ރާއްޖޭގެ އިތުރުން ބޭރުގެ ކުންފުނިތަކަށް ކުރިމަތިލެވޭ ގޮތަށެވެ. ބިޑަ ހުށަހެޅުމަށް އެއް މަސް ދުވަހުގެ މުއްދަތެއް ވަނީ ދީފައެވެ. ނޮވެމްބަރު މަހުގެ 5 ވަނަ ދުވަހު ހަމަވާ ބީލަމާ ބެހޭ ގޮތުން މައުލޫމާތު ދިނުމުގެ ސެޝަނެއް މި މަހުގެ 22 ވަނަ ދުވަހު ބޭއްވުމަށް ވެސް މިނިސްޓްރީން ވަނީ ނިންމާފައެވެ.  

advertisement

ބޭރުގެ ޔޮޓްތައް އެންމެ ގިނަ އަދަދަކަށް ބަނދަރުކުރާ އުލިގަމުގައި ސިޓީ ހޮޓަލެއް ތަރައްގީކުރުމަށް އެ ރަށުގެ ބިމުން ބޮޑު ބައެއް ނަގައި އެމްޓީޑީސީން މަސައްކަތްތަކެއް ވެސް ކުރިއެވެ. އަދި ސްޓާފް އޭރިޔާ އާއި ގެސްޓް ރޫމްތަކުގެ ވެސް ބޮޑު ބައެއް ނިމިފައި ވަނިކޮށް ދިމާވި ތަފާތު އެކި މައްސަލަތަކާ ގުޅިގެން އެ މަޝްރޫއު ވަނީ ހުއްޓިފައެވެ. މަޝްރޫއު ހުއްޓުމަކަށް އައި އިރު ގާތްގަނޑަކަށް ފަސް ވަރަކަށް މިލިއަން ޑޮލަރު އެ ކުންފުނިން ހޭދަކޮށްފައިވާ ކަމަށް ކުރިން ބުނެފައި ވެއެވެ. އެ މަޝްރޫއު ހުއްޓިފައި އޮންނަތާ އަހަރުތަކެއް ވެފައިވާ އިރު ހަދާފައިވާ ތަންތަން ވެސް ވަރަށް ބޮޑަށް ވީރާނާވެ އެ ސަރަހައްދު ހެދުމަށް ބޭނުންކުރި ގިނަ އަދަދެއްގެ ސާމާނު ހަލާކުވެ މުޅި ސަރަހައްދު ވަނީ ޖަންގައްޔަކަށް ބަދަލުވެފައެވެ.

ރާއްޖެ އަށް ޔޮޓްތައް ޒިޔާރަތްކުރާ މޫސުމުގައި އުލިގަމަށް މިހާރު ވެސް ރަނގަޅު އާމްދަނީއެއް ލިބެއެވެ. އެ ރަށުގައި ޔޮޓް މެރީނާއެއް ތަރައްގީކުރުމުގެ ވާހަކަ ދެކެވޭތާ ވެސް އަހަރުތަކެއް ވެއްޖެއެވެ. އެފަދަ ތަނެއް ތަރައްގީކުރެވިއްޖެ ނަމަ ރަށުގެ އިތުރުން ރާއްޖޭގެ އިގްތިސާދަށް ވެސް ފައިދާތަކެއް ކުރާނެއެވެ.