ރާއްޖެ އިޝްތިހާރުކުރުމަށް އެމްއެމްޕީއާރުސީން ކުރިއަށްގެންދާ ފޭމް ޓްރިޕްތައް އަލުން ފަށައިފި

ރާއްޖޭގެ ފަތުރުވެރިކަން އިޝްތިހާރުކުރުމަށް އެމްއެމްޕީއާރުސީން ފެމިލިއަރައިޒޭޝަން ޓްރިޕްތައް އަލުން ފަށައިފިއެވެ. މި ފޭމް ޓްރިޕްތައް ކުރިއަށްގެންދާނީ ބޯޑަރު އަލުން ހުޅުވާލުމާއިއެކު ކުރިއަށްގެންދާ ކެންޕެއިން “ރީ ޑިސްކަވަރ މޯލްޑިވްސް، ދަ ސަނީ ސައިޑް އޮފް ލައިފް” ގެ ތީމްގެ ދަށުންކަމަށް އެމްއެމްޕީއާރުސީން ބުނެއެވެ. 

އެކި މާކެޓްތަކަށް އަމާޒުކޮށްގެން ކުރިއަށްގެންދާ މި ފޭމް ޓްރިޕްތަކަކީ ކޯވިޑް19 އަށްފަހު ފަތުރުވެރިކަން ފަށާފައިވާއިރު ރައްޖެއަކީ ރައްކާތެރި މަންޒިލެއްކަން ބުނެދިނުމެވެ. މި ފޭމް ޓްރިޕްގެ ދަށުން އެންމެ ފުރަތަމަ ނޫސްވެރިންގެ ގުރޫޕް މިއަދު ވަނީ ރާއްޖެ އައިސްފައެވެ. އެންމެ ފުރަތަމަ އައިސްފައިވަނީ އިންޑިއާގެ ނޫސްވެރިންނެވެ. އިންޑިއާގެ ދަ ޕައިނިޔާ، ޓައިމްސް ޓްރެވެލް، ހިންދުސްތާން ޓްރެވެލްސް، އަދި ކޮންޑެނާސްޓް އިންޑިއާ ފަދަ ނޫސްތަކުގެ ނޫސްވެރިން ވަނީ ރާއްޖެ އައިސްފައެވެ. މި ނޫސްވެރިން ރާއްޖޭގައި ކުރާ ތަޖުރިބާތަކުގެ އެ ނޫސްތަކުގައި ލިޔާނެއެވެ. 

advertisement

އެމްއެމްޕީއާރުސީން އަންނަނީ “ރީ ޑިސްކަވަރ މޯލްޑިވްސް، ދަ ސަނީ ސައިޑް އޮފް ލައިފް” ތީމްގެ ދަށުން ގިނަ މާކެޓިންގ ހަރަކާތްތަކެއް ކުރިއަށްގެންދަމުންނެވެ. މި ކެންޕެއިންގެ މަޤްސަދަކީ ދިވެހިރާއްޖޭގެ މަޤްބޫލުކަން އިތުރުކޮށް، ފަތުރުވެރިންނަށް އަލުން މަރުހަބާކިޔުމަށް ރާއްޖެ ތައްޔާރަށްއޮތްތަކަން އަންގައިދިނުމެވެ. 

އިންޑިއާއާއިއެކު ރާއްޖެއިން ވެފައިވާ އެއަރ ބަބުލް އެއްބަސްވުމާއިއެކު އިންޑިއާއިން ރާއްޖެ އަންނަ ފްލައިޓްތައްވެސް މިހާރު ވަނީ އިތުރުވެފައެވެ. އިންޑިއާގައި ރާއްޖެ އިޝްތިހަރުކުރުމަށް އެމްއެމްޕީއާރުސީން އަންނަނީ ގިނަ މަސައްކަތްތަކެއް ކުރަމުންނެވެ.