ކޮވިޑްގެ ހާލަތުން އަރައިގަތުމަށް 500 މިލިއަނަށް ވުރެ ގިނަ ޑޮލަރު ހަމަޖެހިއްޖެ

ކޮވިޑް-19ގެ ބަލިމަޑުކަމުގައި ރާއްޖޭގެ އިގްތިސާދަށް ކުރިމަތިވެފައިވާ އަޑިގަނޑުން އަރައިގަތުމަށް ހިލޭ އެހީ އާއި ލޯނުގެ ގޮތުގައި 500 މިލިއަނަށް ވުރެ ގިނަ ޑޮލަރު (އަށް ބިލިއަނަށް ވުރެ ގިނަ ރުފިޔާ) ހަމަޖެހިފައިވާ ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.

ރައްޔިތުންގެ މަޖިލީހުގެ ޖަލްސާގައި މާފަންނު ހުޅަނގު ދާއިރާގެ މެންބަރު މުހައްމަދު ފަލާހް ކުރެއްވި ސުވާލަށް ޖަވާބު ދެއްވަމުން މިނިސްޓަރު އަމީރު ވިދާޅުވީ ލޯނާއި ހިލޭ އެހީގެ ގޮތުގައި 520 މިލިއަން ޑޮލަރު ހަމަޖެހިފައިވާ ކަމަށެވެ. ނަމަވެސް އޭގެ ތެރެއިން މިހާތަނަށް ރާއްޖެ އަށް ލިބިފައި ވަނީ ކިހާ ވަރެއް ކަމެއް މިނިސްޓަރު ވިދާޅެއް ނުވެއެވެ.

advertisement

ކޮވިޑްގެ މިހާލަތުގައި ލޯނާއި އެހީ ދީފައިވާ ފަރާތްތަކުގެ ތެރޭގައި އިންޑިއާ އާއި ޖަޕާނާއި އެމެރިކާ ފަދަ ގައުމުތައް ހިމެނެއެވެ. މީގެ އިތުރުން އޭޝިއަން ޑިވެލޮޕްމަންޓް ބޭންކް (އޭޑީބީ) ޔޫރަޕިއަން އިންވެސްޓްމަންޓް ބޭންކާއި، އިންޓަނޭޝަނަލް ފައިނޭންސް ކޯޕަރޭޝަނާއި އިންޓަނޭޝަނަލް މަނިޓަރީ ފަންޑް ފަދަ ބައިނަލްއަގުވާމީ މާލީ އިދާރާތަކާއި ޖަމިއްޔާ ޖަމާއަތްތައް ހިމެނެއެވެ.

ޓުއަރިޒަމަށް ބަރޯސާވެފައިވާ ރާއްޖޭގެ އިގްތިސާދަށް ބޮޑު ލޮޅުމެއް އެރީ ކޮވިޑްއާ ގުޅިގެން ބޯޑަރު ބަންދުވެ ގިނަ ދުވަސްތަކެއް ވަންދެން ޓުއަރިޒަމުން ލިބޭ އާމްދަނީ ހުއްޓުމަށް އައުމާ ގުޅިގެންނެވެ. އަލުން ބޯޑަރު ހުޅުވާލައި ދަތުރުތައް ފެށި ނަމަވެސް ޓުއަރިސްޓުން އަންނަ ނިސްބަތް މަދެވެ. އެހެންކަމުން އިގްތިސާދު ހަމައަކަށް އެޅެން ދުވަސްތަކެއް ނަގާނެ ކަމަށް ތަޖުރިބާކާރުން ލަފާކޮށްފައި ވެއެވެ.