އެންޓިޖެން ޓެސްޓަށް އެންމެ ފަހުން ހުއްދަ ދީފި

ކޮވިޑް-19ގެ ވައިރަސް ހަށިގަނޑުގައި ހުރިތޯ ދެނެގަތުމަށް ކުރާ އެންޓިޖެން ޓެސްޓަށް ހުއްދަ ދީފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިހާރު ވަނީ އެންޓިޖެން ޓެސްޓްކުރާނެ ގައިޑްލައިނެއް ވެސް އެކުލަވާލައި އާންމުކޮށްފައެވެ. ކުޑަ ވަގުތުކޮޅެއްގެ ތެރޭގައި ޓެސްޓްގެ ނަތީޖާ ލިބޭ އެންޓިޖެން ޓެސްޓް ކިޓް ރާއްޖެ އަށް އެތެރެކޮށް ބޭނުންކުރުމުގެ ހުއްދަ އަށް އެދި ރާއްޖޭގެ އެންމެ ވަރުގަދަ އެއް މެޑިކަލް އިކުއިޕްމަންޓް ސަޕްލަޔާ، މެޑްޓެކް އިން ވަނީ މީގެ މަހެއްހާ ދުވަސް ކުރިން އެޗްޕީއޭގައި އެދިފައެވެ.

advertisement

އެޗްޕީއޭ އިން މީގެ ކުރިން ހުއްދަ ދީފައި އޮތީ ހަމައެކަނި ޕީސީއާރު ޓެސްޓްތަކަށެވެ. ޕީސީއާރު ޓެސްޓެކޭ އެއްގޮތަށް އެންޓިޖެން ޓެސްޓް ވެސް ހެދޭނީ އެޗްޕީއޭ އިން ހުއްދަ ދޭ ތަންތަނުގައި އެކަނި ކަމަށް ގައިޑްލައިންގައި ބުނެފައި ވެއެވެ. އަދި އެތަންތާ ބޭނުންކުރާ ޓެސްޓް ކިޓަކީ އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން ނުވަތަ ދުނިޔޭގެ ސިއްހަތު ޖަމިއްޔާ، ޑަބްލިޔުއެޗްއޯގެ އިމަޖެންސީ ޔޫސް ކިޓްގެ ތެރޭގައި ހިމަނާފައިވާ ކިޓަކަށް ވާންޖެހޭނެ ކަމަށް ވެސް އެޗްޕީއޭ އިން ކަނޑައަޅާފައިވާ ގައިޑްލައިންތަކުގެ ތެރޭގައި ހިމެނެއެވެ.

މެޑްޓެކް އިން ރާއްޖެ އެތެރެކޮށްފައިވާ އެބޮޓް ކުންފުނީގެ ބައިނެކްސްނައޮ އެންޓިޖެން ޓެސްޓް ކިޓަކީ މި މިންގަނޑަށް ފެތޭ އާލާތެކެވެ. މިއީ 15 މިނިޓްގެ ތެރޭގައި ނަތީޖާ ނެރޭ ކްރިޑިޓް ކާޑެއް ވަރުގެ ކުޑަ ޓެސްޓް ކިޓެކެވެ. އަދި ބޭރުގެ ގައުމުތަކުގައި ވެސް މިހާރު ބޭނުންކުރަމުން އަންނަ މި އާލާތް ބޭނުންކުރުން އިތުރަށް ފަސޭހަކުރުމުގެ ގޮތުން އެބޮޓް އިން ވަނީ މޮބައިލް އެޕެއް ވެސް ތައާރަފްކޮށްފައެވެ. 

އެޗްޕީއޭ އިން ބުނެފައި ވަނީ އެންޓިޖެންގެ ޓެސްޓްތަކުން ނަތީޖާ އެނގޭނީ ހަށިގަނޑުގައި ވައިރަސްގެ އަސަރު އެންމެ ބޮޑަށް ހުންނަ އިރު ކަމަށާއި އެހެންކަމުން ޓެސްޓްކުރާނީ އަލާމާތް ފެންނަތާ ހަތް ދުވަހުގެ ތެރޭގައި ކަމަށެވެ. ހަމައެހެންމެ ކޮމިއުނިޓީ ސްޕްރެޑް ނެތް ނުވަތަ ބަލި ފެތުރުމުގެ ފުރުސަތު ނެތް ތަންތަނުގައި މި ޓެސްޓް ނުކުރެވޭނެ ކަމަށް ވެސް އެޗްޕީއޭ އިން ކަނޑައަޅާފައި ވެއެވެ. މި ނޫން ހާލަތެއްގައި މި ޓެސްޓް ބޭނުންކުރެވޭނީ ސަފާރީތަކާއި، ކެއާ ހޯމްތަކާއި، ރިހެބް ސެންޓަރު އަދި ޖަލު ފަދަ ސެމީ-ކްލޯސްޑް ކޮމިއުނިޓީތަކާއި ބަލި ފެތުރިފައިވާ ތަންތަނުގައި މަސައްކަތްކުރާ ފްރަންޓްލައިން އަދި ހެލްތު ވޯކަރުންނަށް ކޮވިޑް ޖެހިފައިވޭތޯ ބެލުމަށް ކަމަށް ވެސް ގައިޑްލައިންގައި ބުނެފައި ވެއެވެ.