އިންކަމް ސަޕޯޓު އެލަވަންސް ދޫކުރާ މުއްދަތު ޑިސެމްބަރ މަހަށް އިތުރުކުރަން ވަނީ ނިންމާފައި – މިނިސްޓަރ އަމީރު

އިންކަމް ސަޕޯޓު އެލަވަންސް ދޫކުރާ މުއްދަތު މިއަހަރުގެ ޑިސެމްބަރުމަހާ ހަމައަށް އިތުރުކުރުމަށް ނިންމާފައިވާކަމަށް ފިނޭންސް މިނިސްޓަރ އިބްރަހީމް އަމީރު ވިދާޅުވެއްޖެއެވެ.
އިންކަމް ސަޕޯޓް އެލަވަންސް އަކީ ކޯވިޑް-19އާ ގުޅިގެން އާމްދަނީއަށް ނުރަނގަޅު އަސަރު ކޮށްފައިވާ މީހުންނަށް ސަރުކާރުންދޭ ހާއްސަ އިނާޔަތެކެވެ.

ރައްޔިތުންގެ މަޖިލީހުގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން މިނިސްޓަރ އަމީރު ވިދާޅުވީ،
އިންކަމް ސަޕޯޓް އެލަވަންސް ޑިސެމްބަރުމަހާ ހަމައަށް އިތުރުކުރުމަށް ނިންމާފައިވާ ކަމަށާއި، އެމުއްދަތަށްވުރެ އިތުރުކުރަން ޖެހިއްޖެ ނަމަ އެކަންވެސް ކުރައްވާނެ ކަމަށެވެ.

advertisement

އިންކަމް ސަޕޯޓް އެލަވަންސް ލިބޭނީ ކޯވިޑް19 ގެ ސަބަބުން ވަޒީފާއިން ވަކިކޮށްފައިވާ، މުސާރަ ނުލިބޭ ގޮތަށް ސަސްޕެންޑް ކޮށްފައިވާ، ނޯޕޭ ލީވްއަށް ފޮނުވައިފައިވާ މީހުންގެ އިތުރުން މުސާރައިގެ ގޮތުގައި ލިބޭ ޢަދަދުން ބައެއް އުނިކޮށްފައިވާ މީހުންނަށެވެ. ވަޒީފާއަށް ނުރަނގަޅު އަސަރު ކޮށްފައިވާ މީހުންނަށް އެލަވަންސް ދިނުމުގެ ޝަރުޠުތަކުގެ ތެރޭގައި، ދިވެހި ރައްޔިތަކަށް ވުމާއެކު، ޢުމުރުން 18 އަހަރާއި، 65 އަހަރާއި ދެމެދުގެ މީހަކަށް ވާންޖެހެއެވެ.